Bua tshinyi kuikala ne muoyo wa didifila?

Bill ntatu wa dîku wa bidimu 50 ne pamutu, ne utu wenza mudimu wa kulongesha bantu mua kuibaka nzubu. Ku tshidimu tshionso, ne makuta ende yeye nkayende, utu wenza mbingu ya bungi wambuluisha bua kuenza plan ne kuibaka Nzubu ya Bukalenge ya bisumbu bia Bantemu ba Yehowa. Emma nnsongakaji mujike wa bidimu 22 ne mmulonge bikole. Pamutu pa yeye kukeba masanka ne malu adi amutangila yeye nkayende, udi wenza mêba mapite pa 70 ku ngondo yonso bua kuambuluisha bantu bua bumvue Bible. Maurice ne Betty bakadi bangate pansio. Mpindieu pamutu pa buobu kushala basombe patupu, mbaye mu ditunga dikuabu bua kulongesha bantu malu enza Nzambi pa buloba.

BANTU aba kabatu badimona bu bantu ba pa buabu nansha. Badi anu mutu bantu bonso, benza malu adibu bamona ne: mmimpe. Bua tshinyi badi bafila dîba diabu, bukole, mamanya ne mpetu yabu bua kuambuluisha bakuabu? Tshidi tshibasaka bua kufila bintu ebi ndinanga dikole didibu banange nadi Yehowa ne muntu nabu. Dinanga edi ndipeshe bantu bonso aba lungenyi lua didifila.

Lungenyi lua didifila ntshinyi? Bushuwa, kuikala ne muoyo wa didifila kakuena kulomba bua muntu ikale udikisa anyi udikengesha to. Kakuena kutulomba didipidia dinekeshe didi ditupangisha disanka nansha. Anu mudi nkonga-miaku mukuabu (The Shorter Oxford English Dictionary) wamba, kudifila kudi patupu kumvuija ne: “muntu udi ulekela ende malu, disanka ne ende majinga bua kukuatshila bakuabu mudimu anyi bua diakalenga diabu.”

Yezu Kristo udi tshilejilu tshitambe buimpe

Yezu Kristo, Muana mulela umue wa Nzambi, udi tshilejilu tshitambe buimpe tshia muntu uvua ne lungenyi lua didifila. Kumpala kua kuluaye pa buloba, uvua ne bua kuikala ne nsombelu muimpe ne wa disanka kadiyi kuamba. Uvua mu malanda mashême ne Tatuende ne bifukibua bikuabu bia mu nyuma. Kabidi, Muana wa Nzambi eu wakenza midimu milenga ivua isankisha ne mamanya ende bu “muena mudimu wa dilambu.” (Nsumuinu 8:30, 31, NW) Kakuyi mpata, uvua ne nsombelu mubandile bikole kupita bintu bionso bidi mubanji wa kumpala pa buloba apa kayi muanji kupeta. Bu mudiye mulondele Yehowa Nzambi, uvua ne muanzu munene mu diulu.

Kadi, Muana eu wa Nzambi ‘wakadiumushila bimanyinu bia butumbi buende, pakangataye mubidi wa mupika, pakaluaye mu tshifuanyikiji tshia muntu.’ (Filipoi 2:7) Wakitaba bua kulekela masanka ende onso, kuluaye muntu ne kulambulaye muoyo wende bu tshia-bupikudi bua kujikija bubi budi Satana mukebeshe. (Genese 3:1-7; Mâko 10:45) Muanda eu uvua umulomba bua kulua kusomba munkatshi mua bantu bena mpekatu pa buloba budi ku bukokeshi bua Satana Diabolo. (1 Yone 5:19) Uvua umulomba kabidi bua kutantamena malu avua amutonda ne amutatshisha. Kadi, Yezu Kristo uvua mupangadike bua kuenza disua dia Tatuende nansha bia munyi. (Matayo 26:39; Yone 5:30; 6:38) Malu aa akateta bikole dinanga ne lulamatu lua Yezu. Wakitaba bua kudifila too ne penyi? Mupostolo Paulo wakamba ne: ‘Wakadipuekesha, wakalua mutumikidi too ne ku lufu, ku lufu mene lua pa mutshi.’​—Filipoi 2:8.

‘Nuikale ne lungenyi elu munda muenu’

Badi batukankamija bua kulonda tshilejilu tshia Yezu. Paulo wakafila mubelu eu: ‘Nuikale ne [lungenyi] elu munda muenu luakadi kabidi munda mua Kristo Yezu.’ (Filipoi 2:5) Ntshinyi tshitudi mua kuenza bua kuikala ne lungenyi elu? Mushindu umue utudi mua kuikala nalu ngua kubenga ‘kukeba bidi bitulengelela tuetu bine, apu muntu yonso ele meji ku bidi bilengelela bakuabu.’ (Filipoi 2:4, MMM) Dinanga dilelela “kadiena dikeba diakalenga diadio [nkayadi].”​—1 Kolinto 13:5, MMM.

Bantu ba dinanga batu misangu mivule badifila ne muoyo mujima bua kukuatshisha bakuabu. Kadi lelu bantu ba bungi batu basue anu disanka diabu nkayabu. Bena panu batu ne lungenyi lua didianjila kukeba anu abu masanka. Tudi ne bua kuepuka lungenyi lua bena panu elu bualu luolu lufike ku dishintulula luetu lungenyi, pamu’apa netufike ku dipesha majinga etu mushinga wa bungi menemene. Dîba adi bualu buonso butudi tuenza ne dîba, bukole ne mpetu yetu nebutambe kuimanyina anu pa masanka etu nkayetu. Nunku tudi ne bua kuluangana mvita mikole bua kuluisha lungenyi elu.

Nansha mibelu mifila ne meji mimpe imue misangu idi mua kukepesha lungenyi luetu lua didifila. Pakamanya mupostolo Petelo kuvua Yezu mutangile ne nsombelu wende wa didifila, wakamuambila ne: ‘[Kudienzedi bibi], Mukalenge.’ (Matayo 16:22) Uvua umona bikole bua kuitaba bualu buvua Yezu muitabe bua kuya too ne ku lufu bua malu adi atangila bumfumu bua Tatuende ne bua lupandu lua bantu. Ke bua tshinyi wakakeba bua kufikisha Yezu ku ditaba bua kadishimi kenji nanku to.

‘Udipidie’

Yezu wakamuandamuna munyi? Bible udi wamba ne: ‘Wakatshinguluka; pakamonaye bayidi bende, wakabela Petelo ne: Satana, yila kunyima kuanyi, bualu bua wewe kuena welangana meji a malu a Nzambi, udi welangana meji anu a malu a bantu.’ Pashishe Yezu wakabikila tshisumbu tshia bantu ne bayidi bende e kubambila ne: ‘Biasua muntu kundonda, adipidie, ambule mutshi wende, andonde.’​—Mâko 8:33, 34.

Bidimu bitue ku 30 kunyima kua yeye mumane kupesha Yezu mubelu au, Petelo wakaleja ne: kubangila dîba adi uvua mumvue tshivua kuikala ne muoyo wa didifila kumvuija. Kakakankamija bena Kristo nende bua bashale bavunge maboko ne kakabambila ne: kabadienzedi bibi nansha. Pamutu pa nanku, Petelo wakababela bua kutekabu meji abu ku mudimu ne bua kulekela kulonda majinga a panu avuabu nawu kumpala. Nansha muvuaku ntatu, bavua ne bua kuteka disua dia Nzambi pa muaba wa kumpala mu nsombelu wabu.​—1 Petelo 1:6, 13, 14; 4:1, 2.

Nsombelu udi utamba kusankisha utudi tuetu bonso ne bua kulonda ngua kupesha Yehowa bionso bitudi nabi, kulonda Yezu Kristo ne lulamatu ne kulekela Nzambi ulombola malu etu onso. Paulo wakatushila tshilejilu tshimpe mu muanda eu. Dimanya divuaye nadi dia se: nkushale dîba dikese ne dianyisha diende bua malu avua Yehowa mumuenzele biakamusaka bua kulekela dikeba malu a panu avua mua kumupangisha bua kuenza disua dia Nzambi. Wakamba ne: “Meme panyi, nensanke bua kufila bionso bindi nabi ne kudifila meme muine” bua bakuabu. (2 Kolinto 12:15, MML) Paulo wakenza mudimu ne mamanya ende bua kutuma malu a Nzambi kumpala pamutu pa ende yeye.​—Bienzedi 20:24; Filipoi 3:8.

Mmunyi mutudi mua kudikonkonona bua kumona ni tudi ne lungenyi lua buena lua mupostolo Paulo? Tudi mua kudiela nkonko ya buena eyi: Ntshinyi tshindi ngenza ne dîba dianyi, bukole buanyi, mamanya anyi ne mpetu yanyi? Ntu mbiangata ne mapa makuabu a mushinga anu bua masanka anyi nkayanyi, anyi ntu ngambuluisha nabi bantu bakuabu? Nkadiku muele meji bua kuenza ne muoyo mujima mudimu udi upandisha bantu wa kumanyisha lumu luimpe, pamu’apa kuikala mumanyishi wa Bukalenge wa ku dîba ne ku dîba anyi? Ndiku mua kuditua panyi mu midimu bu mudi wa kuibaka anyi kulongolola Nzubu ya Bukalenge anyi? Ndiku nkeba mishindu ya kuambuluisha bakengi anyi? Ntuku mpesha Yehowa bintu bitambe buimpe bindi nabi anyi?​—Nsumuinu 3:9.

“Disanka dia kupa”

Kadi kuikala ne lungenyi lua didifila mbualu bua meji menemene anyi? Eyowa mbualu bua meji! Paulo nkayende wakadimuena ne: lungenyi elu lutu lupetesha malu mimpe a bungi. Luakamupetesha disanka divule. Wakumvuija bakulu ba mu Efeso bualu ebu pakasangilaye nabu ku Mileto. Paulo wakabambila ne: “Mvua munuleje mishindu yonso ne: pa kutata nanku [mu didifila] ke mutudi mua kuambuluisha bakengi, ne kuvuluka miaku ya Mfumu Yezu ivuaye yeye muine muambe ne: Disanka dia kupa ndipite dia kupeta.” (Bienzedi 20:35, MMM) Bantu miliyo ne miliyo mbamone ne: kuikala ne lungenyi lua mushindu’eu kudi kufila disanka dia bungi kubangila anu ku mpindieu. Nekubatuadile kabidi disanka mu matuku atshilualua pikala Yehowa mua kusankisha badi bateka malu ende ne a bakuabu kumpala kua abu buobu.​—1 Timote 4:8-10.

Pakebejabu Bill bua kumanya tshivuaye mudifidile mu diambuluisha bakuabu bua kuibaka Nzubu ya Bukalenge, wakandamuna ne: “Kuambuluisha bisumbu bitu pa tshibidilu bitambe bukese mu mushindu’eu kudi kumpesha disanka divule. Bidi binsankisha bua kuambuluisha bakuabu ne mamanya onso andi nawu.” Bua tshinyi Emma mmusungule bua kufila makanda ne mamanya ende bua kulongesha bakuabu bulelela bua mu Bible? Udi wamba ne: “Tshivua mua kuela meji bua kuenza tshikuabu tshintu to. Bu muntshidi nsonga ne mutshikale ne bukole bua kuambuluishangana, ndi musue kuenza muanyi muonso bua kusankisha Yehowa ne kuambuluisha bantu nanyi. Kulekela bimue bintu kakuena kuntatshisha bikole menemene to. Tshindi ngenza etshi ke tshindi anu ne bua kuenza bua bionso bidi Yehowa mungenzele.”

Maurice ne Betty kabena banyingalala bua mudibu balekele nsombelu wa bantu bikishe, kunyima kua bidimu bia bungi bia mudimu mukole wa kukolesha ne kudisha bana. Mpindieu ukadibu bangate pansio, mbasue kufila mioyo yabu ne kutungunuka ne kuenza bualu kampanda buimpe budi buikale ne diambuluisha mu nsombelu yabu. Badi bamba ne: “Katuena basue mpindieu kusomba panshi ne kuikisha to. Kuambuluisha bantu bakuabu bua kulonga malu a Yehowa mu ditunga dia bende kudi kutupesha mushindu wa kutungunuka ne kuenza bualu bua mushinga.”

Udiku mupangadije bua kuikala ne muoyo wa didifila anyi? Kabiakuikala bipepele to. Kudi mvita ya munanunanu pankatshi pa majinga etu a bantu bapange bupuangane ne dijinga dikole ditudi nadi dia kusankisha Nzambi. (Lomo 7:21-23) Kadi tudi mua kutshimuna mvita eyi tuetu balekele Yehowa utulombola. (Galatia 5:16, 17) Bushuwa neavuluke mudimu utudi bamuenzele ne didifila ne neatupeshe mabenesha a bungi. Bulelela, Yehowa Nzambi ‘neatunzuluile bibi bia mu diulu, neatulokeshile masanka, katuyi tukengela bintu bikuabu kabidi.’​—Malaki 3:10; Ebelu 6:10.

[Tshimfuanyi mu dibeji 23]

Yezu uvua ne lungenyi lua didifila. Kadi wewe?

[Bimfuanyi mu dibeji 24]

Paulo wakatamba kudifila mu mudimu wa diyisha Bukalenge