Bikadilu bilenga bidi bienda bikepa

“BUALU bua buena abu kabuvua buanji kuenzeka nansha!” Mêyi aa nga kavula-mbedi wa kale wa ditunga dia Allemagne, Helmut Schmidt. Uvua unyingalala bikole bua malu a diibila dia banene ba mbulamatadi adi menzeke matuku adi panshi aa (malu aa avua mitu minene ya malu mu bikandakanda). Wakamba ne: “Mikenji idi iludika bantu bua kuikala ne nsombelu mulenga idi yenda ijimina. Bionso ebi anu bua lukuka.”

Bantu ba bungi badi bitaba tshidiye wamba etshi. Bikadilu bimpe bidi bishindamene pa Dîyi dia Nzambi, ne bitu bantu ba bungi bitaba katshia kuonso eku se: biobi ke bidi bijadika tshidi tshimpe ne tshidi tshibi kabena kabidi babitua mushinga to. Ke tshidi tshienzeka too ne mu matunga adibu bamba ne: nga bena Kristo.

Tshikadilu tshidi Bible ulomba tshidi ne mushinga anyi?

Patudi ne tshikadilu tshidi tshiashila pa malongesha a mu Bible, tudi tulua bena bululame ne bena muoyo-mutoke. Kadi, bantu ba bungi badi bakosangana mishiku ne kabidi biibila. Tshikandakanda kampanda tshia mu Londres (Angleterre) tshidi tshiamba ne: bamue bampulushi “batu bamba mutu mpulushi yonso upeta makuta a mu Angleterre (Livre sterling) mapite pa 100 000 musangu wonso udibu babapanyishila diamba divuabu bakuate anyi udibu basokoka bena bilumbu banene.” (The Times) Diibila mu ditunga dia Autriche ndilue bu tshilele. Mu Allemagne, bena malu a siyanse bakakoseka mikaba pavua

bakebuludi batandule matuku mashale aa “bumue bualu bua mponono bua diibila mu malu a siyanse mu Allemagne.” Bakafunda mulongeshi mukuabu wa mu iniversite, uvua “ku mutu kua bamanyi bena Allemagne ba ngikadilu ya ku tshifukilu,” bua muvuaye mushime anyi mufuikakaje malu a bungi.

Tshikadilu tshishindamene pa Bible tshidi kabidi tshiumvuija kuikala ne lulamatu mu dibaka, malanda adi ne bua kuikala a kashidi. Pabi mabaka a bungi ngowu aa enda amu afua ku tubadi. Tshikandakanda tshikuabu tshia bena Katolike tshidi tshileja ne: “nansha mu ditunga dia Suisse ditubu bamba ne: ‘ndilame bilele biadi bia kale,’ mabaka adi afuamu bungi bua dikema.” (Christ in der Gegenwart) Mu ditunga dia Pays-Bas, mabaka 33 pa lukama atu afuamu. Muntu mukaji mukuabu wakamona mudi malu mashintuluke mu Allemagne mu bidimu bikese bishale ebi, wakafunda bualu buvua bumutonda, e kuamba ne: “Mpindieu bantu badi bamona dibaka bu muanda wa kale udi kauyi muakanyine tshikondo tshietu etshi to. Bantu kabatshiena baselangana kabidi bua kushala mu dibaka too ne ku lufu nansha.”

Kadi, bua bantu bakuabu miliyo mivule, mêyi a nsombelu mulenga adi Bible ulongesha nga kueyemena ne adi ne dikuatshisha mu nsombelu wa lelu. Mulume mukuabu ne mukajende badi basombele ku mikalu ya ditunga dia Suisse ne dia Allemagne bakajingulula se: kulonga mua kuikala ne nsombelu mumvuangane ne bikadilu bidi Bible ulomba kuvua kubavuije bena disanka dia bungi. Bakamba ne: buetu tuetu, “kudi anu tshintu tshimue tshidi tshiludika bantu mu malu onso. Tshintu atshi m’Bible.”

Kadi wewe udi wamba bishi? Bible udiku mua kukuludika bimpe anyi? Tshikadilu tshidi tshishindamene pa Bible tshidiku ne mushinga lelu anyi?