Bua tshinyi kudienzeja bua kuikala ne buimpe?

MUNTU mulume mukuabu mushindame, diende Kunihito, mmumbuke kuabu ku Japon matuku adi panshi aa muye mu États-Unis.a Mbingu mikese kunyima kua difika diende, wakapeta lutatu luvua luambe kumunyangila mudimu. Kunihito udi ulonda ne: “Pavua mfumuanyi wa mudimu mungebeje bua kumanya ni mvua mua kukokesha bua kuenza mudimu kampanda, mvua ndiumvua ne: mvua mua kuwenza. Kadi, bu muvuabu bankoleshe kuetu ne tshibidilu tshia kuangata budipuekeshi bu ngikadilu muimpe, ngakamuandamuna ne: ‘Tshiena mujadike ni ndi mua kuwenza to, kadi nengenze muanyi muonso bua kuwenza.’ Mfumuanyi wa mudimu eu (uvua muena Amerike) yeye wakumvua bu se: tshivua mumanye mudimu au to, mvua ngelakana. Pangakamanya bualu ebu, ngakamona ne: mbimpe meme kushintulula amue malu.”

Maria (muntu mukaji mukuabu wa mu tshimenga tshia New York) uvua mulongi wa meji a bungi pavuaye ulonga, kabidi misangu yonso uvua anu ne muoyo wa kuambuluisha balongi nende. Mulongi nende mukuabu, diende Juan, uvua ku misangu umulomba diambuluisha. Kadi wakatuadija kabidi kumunanga bua alue mukajende ne kuenzaye bua Maria abange kumuanyisha. Nansha muvua Maria muikale ne dijinga dia kushala mudilame bimpe, mêyi a ntekesha a Juan akamukuata, buobu kufika ku dienda nende.

Mbikole menemene bua kuikala ne buimpe munkatshi mua bantu ba ngikadilu mibi ne bibidilu bishilangane. Kadi, bua tshinyi tudi ne bua kudienzeja bua kuikala ne buimpe? Bualu ngikadilu eu udi usankisha Nzambi, ne bantu ba bungi batu basue bua Nzambi abanyishe.

Bible udi usaka badi bamubala bua badienzeje bua kuikala ne buimpe. Tshilejilu, mupostolo Paulo wakafunda ne: ‘Bikalaku buimpe ne bikalaku butumbi, nuelangane meji a malu aa.’ (Filipoi 4:8) Mupostolo Petelo pende udi utubela bua ‘tusuminyine [muetu muonso] bua kutentakaja buimpe ku ditabuja dietu.’ (2 Petelo 1:5) Kadi buimpe buine ntshinyi? Badi mua kubulongeshangana mu kalasa anyi? Netubupete bishi?

[Mêyi adi kuinshi]