Nkonko ya babadi
Tudi tubala mu 1 Petelo 4:3 (MMM) ne: bamue bena Kristo bavua baditue mu “ditendelela dibi dia mpingu.” Katutu tuamba ne: ditendelela dionso dia mpingu ndibi, ne Nzambi mmudibenge ne mmudikandike anyi?
Eyowa, ku mêsu kua Nzambi, ditendelela dionso dia mpingu ndibi. Bantu badi basue bua Nzambi abanyishe kabena ne bua kutendelela mpingu to.—1 Kolinto 5:11; Buakabuluibua 21:8.
Kadi bidi bimueneka ne: mupostolo Petelo uvua wakula bua ditendelela mpingu dia mushindu mukuabu. Tshilejilu, mu matunga a bungi a kale, bantu bavua batendelela mpingu bikole ne bakokeshi kabavua belele bualu ebu mukandu to. Mbuena kuamba ne: mikenji ya ditunga kayivua ikandika ditendelela mpingu dia mushindu’au nansha. Ditendelela dia mpingu dikuabu divua mene mu malu avua ditunga anyi mbulamatadi ulomba. Mu mushindu’au ke muvua bamue baditue mu ‘ditendelela dia mpingu kadiyi dielela mukandu’ kumpala kua kuluabu bena Kristo. (bilondeshile Traduction du monde nouveau wa mu 1950) Tshilejilu, tudi bamanye ne: Nebukadenesâ Mukalenge wa Babulona uvua muase lupingu lua ngolo bua bantu balutendelele, kadi basadidi ba Yehowa, Shadalaka, Meshaka ne Abedenego bakabenga bua kulutendelela.—Danyele 3:1-12.
Mushindu mukuabu ngua se: mikiya ya bungi ya ditendelela mpingu ivua ne bilele bibi menemene bivua bibengangana ne mikenji ya ku tshifukilu anyi ditapulula dia tshidi tshimpe ne tshidi tshibi ku diambuluisha dia kuondo kabu ka muoyo. (Lomo 2:14, 15) Mupostolo Paulo wakafunda bua bibidilu bibi bivua ‘kabiyi biumvuangana ne [malu a ku] tshifukilu’ ne bivua “bualu bua bundu,” ne misangu mivule bivua mu bilele bia mu bitendelelu. (Lomo 1:26, 27, MMM) Balume ne bakaji bavua baditue mu ditendelela dibi dia mpingu kabavua balonda tshivua kuondo kabu ka muoyo kabambila pa bidi bitangila tshimpe ne tshibi to. Ke bualu kayi bantu bavua balua bena Kristo bavua ne bua kulekela bibidilu bibi bia nanku.
Pa kumbusha malu atudi baleje aa, mishindu ya ditendelela dia mpingu ivua Yehowa Nzambi mukandike ivua mitangalake bikole munkatshi mua bantu bavua kabayi bena Yuda. Mikenji ya Nzambi ivua mikandike ditendelela dia mpingu.a—Kolosai 3:5-7.
[Mêyi adi kuinshi]
a Mu tshiena-Gelika, mêyi adi mu 1 Petelo 4:3 adi umvuija ne: “ditendelela dia mpingu dikandika kudi mikenji.” Mbakudimune tshiambilu etshi mu imue Bible ya mu Mfualansa mushindu’eu: “ditendelela dia mpingu kadiyi dianyisha,” “ntendelelu wa mpingu mukandika,” ne “ditendelela dia mpingu dibenga kudi mikenji.”