Nkonko ya babadi

Makenga a Yobo avua menze matuku bungi kayi?

Bamue batu bela meji ne: makenga a Yobo avua menze bidimu bia bungi, kadi mukanda wa Yobo kawena wakula bua makenga avua mashale mutantshi bule ebu to.

Tshitupa tshia kumpala tshia ntatu yende ndifua dia bana bende bonso ne dijimija dia bintu biende; tshitupa etshi tshidi tshimueneka tshiotshi tshîpi bikole. Tudi tubala ne: ‘Dituku dikuabu pakadi bana [ba Yobo] ba balume ne bana bende ba bakaji badia bidia ne banua mvinyo mu nzubu wa mukulu wabu.’ Yobo wakapeta mikenji milondangane bamumanyisha bua dijimija dia bintu biende: ngombe, mpunda, mikoko, tumelo, ne difua dia bena mudimu bavua balama nyama eyi. Bidi bimueneka ne: malu aa akenzeka diakamue panyima pa Yobo mumane kumvua lumu bua lufu lua bana bende ba balume ne ba bakaji bavua ‘badia ne banua mvinyo mu nzubu wa mukulu wabu.’ Bidi bimueneka kabidi ne: malu onso aa avua menzeke dituku dimue.​—Yobo 1:13-19.

Tshitupa tshibidi tshia makenga a Yobo tshivua ne bua kuikala tshiotshi tshinenge matuku a bungi. Satana wakaya kudi Yehowa ne kuambaye ne: Yobo uvua mua kulenduka makenga wowu mamukuate yeye buludi, mmumue ne: wowu malenge mubidi wende. Pashishe Yobo wakapeta ‘biuja binene pa mbidi ponso, munda mua makasa too ne ku lubombo lua mutu wende.’ Ditampakana dia disama edi mubidi wende mujima divua mua kuikala dinenge mutantshi. Ne divua ne bua kuikala dienze matuku a bungi bua lumu lua “makenga au onso akamukuata” kufikalu kudi bamusambi ba dishima bavua balue kumutangila.​—Yobo 2:3-11.

Elifaza uvua mufume ku Temana mu buloba bua Edome, ne Sofâ uvua mufume ku Nord-Est kua ditunga dia Arabie, nunku misoko yabu kayivua kule ne Usa muaba uvua Yobo, uvua pamu’apa lua ku Nord kua Arabie. Kadi Biledada yeye uvua muena Shuhi, ne bidi biumvuika ne: bena Shuhi bavua base ku muelelu kua musulu wa Pelata. Bu Biledada muikale mu musoko wabu dîba adi, bivua ne bua kuikala bimuangate mbingu anyi ngondo ya bungi bua yeye kumvua malu avua mafikile Yobo ne kuenza luendu mutangile ku Usa. Kakuyi mpata, bidi mua kuikala se: bantu basatu aba kabavua mutantshi mule ne muaba uvua Yobo pakabanga makenga ende to. Mu mishindu yonso, pakafika balunda basatu ba Yobo aba, ‘bakasomba panshi pavuaye. Kushalabu nanku matuku muanda mutekete malondangane a butuku ne munya,’ kabayi bamba bualu nansha bumue.​—Yobo 2:12, 13, MMM.

Pashishe tshitupa tshia ndekelu tshia makenga a Yobo, malu adibu bafunde bua kutshiumvuija mmuuje nshapita ya bungi ya mukanda eu. Kuvua dikokangana ku mêyi ne miyuki yakenza basambi ba mafi aba, ne misangu ya bungi Yobo uvua anu ubandamuna. Kunyima kua miyuki eyi mimane kujika, nsonga Elihu wakafila mibelu, ne Yehowa wakalulamija lungenyi lua Yobo wakuila mu diulu.​—Yobo 32:1-6; 38:1; 40:1-6; 42:1.

Nenku makenga a Yobo ne dijika diawu bidi mua kuikala bienzeke munkatshi mua ngondo mikese, ne pamu’apa kayiyi ikumbana tshidimu tshijima to. Makenga makole wowu makuate muntu, udi mua kuamona bu adi menze bidimu ne bidimu. Kadi katuena bua kupua muoyo se: atu ajika anu muakajika a Yobo. Kadi nansha makenga adi matukuate wowu matungunuke, tuvulukayi bua se: Nzambi udi utuambuluisha, anu mudibu baleje mu mêyi aa mafundisha ku nyuma: “Dikenga dipepele ne dia tshitupa tshipi ditudi tumvua didi ditulongoluela butumbi buvule ne bua tshiendelele, bunene butambe dikenga edi.” (2 Kolinto 4:17, MML) Mupostolo Petelo wakafunda ne: “Nuenu bamane kukenga nanku kakese, [Nzambi] muena bulenga buonso, neanujadike yeye nkayende, anushindike, anukoleshe, anujadike kabidi, bualu yeye ngudi munubikile bua nupete lumu lua kashidi mu buobumue ne Kristo.”​—1 Petelo 5:10, MMM.