Bampasata babidi bakanyisha mikanda ya Russell

MU 1891, Charles Taze Russell, eu wakenza mudimu wa dikema munkatshi mua bena Kristo batendeledi ba Yehowa, wakaya bua musangu wa kumpala mu matunga a ku mputu. Bilondeshile imue luapolo, pavua Russell mutudile mu tshimenga tshia Pignerol, mu Italie, wakapetangana ne Mulongeshi Daniele Rivoire, uvua mpasata kale mu tshitendelelu tshivuabu babikila ne: ba-Vaudois.a Nansha muakashala Rivoire udisangisha anu ne ba-Vaudois kunyima kua yeye mumane kulekela bumpasata, uvua anu ne lungenyi lunzuluke ne wakabala mikanda mivule ivua Charles Russell mufunde.

Mu 1903, Rivoire wakakudimuna mukanda wa Russell wa Le Divin Plan des Âges mu tshiena-Italie ne wakaupatuisha ku makuta ende nkayende. Wakaupatuisha nunku bidimu bia bungi kumpala kua nkudimuinu uvua ne bukenji kupatukaye mu tshiena-Italie. Mu mêyi ende a ntuadijilu, Rivoire wakafunda ne: “Tudi tuteka mukanda wa kumpala eu mukudimuna mu tshiena-Italie mu bianza bia Mukalenge. Aubeneshe bua se: nansha mudiwu ne bilema, wambuluishe bua kutumbisha dîna diende ditambe bunsantu ne bua usake bana bende badi bakula tshiena-Italie ku dimulamata bikole. Bonso babala mukanda eu mitshima yabu ibasake bua kujingulula buondoke bua bubanji, meji ne dimanya bia dilongolola ne dinanga bia Nzambi, ne bua kuikala ne dianyisha kudi Nzambi, eu udi muambuluishe bua kupatula mukanda eu.”

Rivoire wakabanga kabidi kukudimuna tshibejibeji tshia Tshibumba tshia Nsentedi tshia Siyona ne tshia dikalaku dia Kristo mu tshiena-Italie. Tshibejibeji etshi (tshidi tshilue lelu Tshibumba tshia Nsentedi) tshivua tshipatuka misangu inayi ku tshidimu mu 1903. Nansha mutu Mulongeshi Rivoire kayi muanji kulua Mulongi wa Bible (muvuabu babikila Bantemu ba Yehowa tshikondo atshi), wakaleja dijinga dikole dia kutangalaja mukenji wa mu Bible anu muvuabu bumvuije mu mikanda ya Balongi ba Bible.

“Bivua bienze anu bu se: bilamulamu bivua biumbuke ku mêsu kuanyi”

Mpasata mukuabu wa ba-Vaudois wakanyisha mikanda ya Russell uvua Giuseppe Banchetti. Tatuende wa Giuseppe (uvua mumbuke mu Katolike), wakamulongesha malu a ba-Vaudois. Mu 1894, Giuseppe wakalua mpasata wa ba-Vaudois ne wakenza mudimu miaba ya bungi ivuabu: mu Apulia ne Abruzzi ne mu tshidila tshia Elbe ne tshia Sicile.

Pakapatulabu nkudimuinu muanyisha wa tshiena-Italie wa mukanda wa Russel wa Le Divin plan des Âges mu 1905, Banchetti wakafunda malu avuaye muanyishe mu mukanda eu. Malu avuaye mufunde aa akapatuka mu tshikandakanda tshia bena Mishionyi tshia La Rivista Cristiana. Banchetti wakafunda ne: “Buetu tuetu, [mukanda wa Russell] udi mulombodi wa butoke ne mushindame udi muena Kristo yonso mua kupeta bua kutuadija nawu dilonga dia Mifundu Minsantu didi mua kumuambuluisha ne kumupetesha masanka . . . Pangakaubala, bivua bienze anu bu se: bilamulamu bivua biumbuke ku mêsu kuanyi, njila udi ufikisha kudi Nzambi kuluaye mululame ne mupepele be. Nansha malu avua amueneka bu avua abengangana pa tshibidilu akumvuika bimpe. Malongesha avua makole kumpala akamueneka mapepele bua kuitaba. Malu avua kaayi umvuika kumpala akalua matoke. Dilongolola dilenga dia lupandu lua bantu mu Kristo diakamueneka kumpala kuanyi ditekete be, kunsakabi ne kukema pamue ne Mupostolo ne: Monayi ndondo wa bubanji bua meji ne lungenyi bia Nzambi!”​—Lomo 11:33.

Anu muakamba Remigio Cuminetti mu 1925, Banchetti wakaleja “dianyisha dia bungi” bua mudimu wa Balongi ba Bible ne uvua “mutuishibue bikole” bua malongesha avuabu bumvuije. Banchetti pende wakakeba bua kutangalaja malongesha aa mu wende mushindu.

Anu bu Bantemu ba Yehowa, Banchetti wakalejila ku mikanda yende ne: uvua witaba ne: nekuikale dibika dia bafue pa buloba apa, anu mudi Bible ulongesha. Uvua upetangana kabidi ne Balongi ba Bible pavuaye umvuija ne: tshidimu tshia lufu lua Yezu tshikavua tshijadika ne tshileja kudi Nzambi mu mulayi wa Danyele wa mbingu 70. (Danyele 9:24-27) Misangu ya bungi uvua wamba (nansha muvuabi bibengangana patoke ne malongesha a tshitendelelu tshiende) ne: Tshivulukilu tshia lufu lua Yezu Kristo tshidi ne bua kuenzeka anu musangu umue ku tshidimu, “mu dituku dia ngondo dijalame dia kuenza mufikilu eu.” (Luka 22:19, 20) Wakabenga dilongesha dia Darwin dia bidimenene, ne wakamba ne: bena Kristo balelela kabena ne bua kubuelakana mu mvita ya bena panu nansha.​—Yeshaya 2:4.

Umue musangu, Banchetti uvua uyukila ne muntu mukuabu diende Campbell Wall bua mikanda ya Russell. Bu muvua Wall muikale uyibipisha, Banchetti wakamuandamuna ne: “Ndi mujadike ne: wewe mubale mikanda isambombo ya Russell, neupete disanka dia bungi, ne neulue kungela tuasakidila ne disanka bua bualu ebu. Tshiena ntumbisha malongesha; kadi mvua mubale mikanda eyi kukadi bidimu dikumi ne tshimue, ne ntu ngela Nzambi tuasakidila dituku dionso bua mudiye muteke butoke ebu ne busambi ebu ku mpala kuanyi ku diambuluisha dia mukanda udi wakula wonso mujima anu bua malu a mu Mifundu Minsantu.”

“Kuleja, kuleja, kuleja”

Mbia mushinga bua muvua bampasata babidi aba ba-Vaudois, Daniele Rivoire ne Giuseppe Banchetti, baleje dianyisha bua mushindu uvua Russell mumvuije Bible. Banchetti wakafunda ne: “Ndi ngamba ne: kakuena muntu nansha umue wa kutudi ba-evanjeliste, nansha bampasata betu anyi balongeshi betu ba teoloji, kakuena muntu nansha umue udi mumanye tshintu. Tòo, tudi ne malu a bungi, malu makuabu a bungi a kulonga. . . . [Tuvua ne bua] . . . kusomba ne kuteleja, katuyi tudiamba ne: tudi bamanye bionso, ne katuyi tubenga bidibu batupesha bua kukonkonona. Kadi tudi ne bua kuleja, kuleja, kuleja.”

Tshidimu tshionso, bantu binunu bivule batu bateleja mukenji wa Bukalenge udi Bantemu ba Yehowa babatuadila ku nzubu yabu. Muntu wa lungenyi lunzuluke wa muaba wonso udi ne nyota ya bulelela bua mu Bible udi witaba dibikila dia Yezu dia ne: “Ulue kundonda meme.”​—Mâko 10:17-21; Buakabuluibua 22:17.

[Mêyi adi kuinshi]

[Tshimfuanyi mu dibeji 28]

Mulongeshi Daniele Rivoire

[Tshimfuanyi mu dibeji 29]

Giuseppe Banchetti

[Mêyi a dianyisha]

Banchetti: La Luce, dia 14 Tshisanga 1926