Didia dia Mukalenge ntshinyi?

DIDIA dia Mukalenge ntshinyi, ne didi ne diumvuija kayi kudi bantu badi ne muoyo mu bidimu bia 2000 ebi? Bibungu ne nkonga-miaku nebikuambile ne: Didia dia Mukalenge ndidia divua Yezu Kristo mudie ne bapostolo bende dilolo dia dituku dia kumpala kua lufu luende bu mulambu. Bu muvua didia adi dikale dia ndekelu dia dilolo divua Yezu mudie ne bayidi bende ba lulamatu, batu kabidi badibikila ne: Didia dia ndekelu dia Dilolo. Ne bu muvuadi dibanjija kudi Mukalenge Yezu Kristo nkayende, dîna dia Didia dia Mukalenge ndiakanyine.

Munkatshi mua bidimu bivule, bantu ba bungi mbalambule mioyo yabu bua bivuabu bangata bu malu a mushinga. Lufu lua bamue luakapetesha banga bantu diakalenga munkatshi mua tshikondo kampanda. Kadi lufu lua didilambula nansha lumue lua umue wa ku bantu aba (nansha luolu mua kuikala lua lumu lua mushindu kayi) kaluena mua kuikala ne mushinga wa buena wa lufu lua Yezu Kristo to. Kabidi, kakuena lufu nansha lumue ludi lumanyike mu nsombelu wa ntatu ne makenga wa bantu ludi mua kuikala ne bukole bua kutangalaka mu buloba bujime nansha. Bua tshinyi?

Bua kuandamuna lukonko elu ne kukuambuluisha bua kumanya diumvuija didi nadi Didia dia Mukalenge kuudi, tudi tukulomba bua kubala tshiena-bualu tshidi tshilonda.