Yezu udi wenza Pasaka wa ndekelu

Bena Yuda bavua benza Pasaka tshidimu tshionso mu dituku dia 14 dia ngondo wa Nisana. Bualu ebu buvua bubavuluija muvua Yehowa mubumbushe mu bupika mu Ejipitu muye nabu mu Buloba Bulaya. Mu tshidimu tshia 33 panyima pa Yezu, Yezu ne bapostolo bende bakadiila Pasaka mu nzubu kampanda wa kuulu mu Yelushalema. Pakavuabu bakeba kujikija kudia, Yezu wakamba ne: ‘Umue wa kunudi neantungile tshitungu.’ Bualu ebu buakatonda bapostolo bikole, kukonkabu Yezu ne: ‘Nnganyi au?’ Yezu wakamba ne: ‘Mmuntu undi mpesha diampa edi.’ Pashishe wakapesha Yudasa Isakaliote tshipese tshia diampa. Yudasa wakajuka diakamue, kupatukaye mu nzubu amu.

Pashishe Yezu wakenza disambila, kutshibulaye diampa divua dishale adi bitupa bitupa, kudipeshaye bapostolo bavua bashale. Kuambaye ne: ‘Diayi diampa edi. Didi dileja mubidi wanyi ungafila buenu nuenu.’ Wakalua kuenza kabidi disambila bua mvinyo, kumupeshaye bapostolo bende. Kuambaye ne: ‘Nuayi mvinyo eu. Udi uleja mashi anyi angafila bua dibuikidibua dia mpekatu. Ndi nnulaya ne: nenuikale bakalenge pamue nanyi mu diulu. Ikalayi nuenza nunku tshidimu tshionso bua kumvuluka.’ Bayidi ba Yezu batshitu anu badisangisha dilolo dia buena adi tshidimu tshionso. Bakadi babikila tshisangilu atshi lelu ne: Didia dia dilolo dia Mukalenge.

Panyima pa didia adi, bapostolo bakakokangana bua kumanya uvua munene kupita bakuabu. Kadi Yezu wakabambila ne: ‘Muntu udi munene munkatshi muenu ngudi udimona mushadile ku bonso, udi ne mushinga mukese ku bonso.

‘Nuenu nudi balunda banyi. Ndi nnuambila malu onso adi Tatu wanyi musue bua nnuambile. Nkadi pa kuya mu diulu kudi Tatu wanyi. Nuenu nenushale, ne bantu nebamanye ne: nudi bayidi banyi ku dinanga dinuikala banangangana nadi. Nudi ne bua kunangangana anu bu mundi mununange.’

Bua kujikija, Yezu wakasambila, ulomba Yehowa bua alame bayidi bonso. Wakalomba Yehowa bua abambuluishe bua benze mudimu pamue mu ditalala. Wakasambila bua dîna dia Yehowa dijidibue. Pashishe Yezu ne bapostolo bende bakatumbisha Yehowa ne misambu, bobu kupatuka. Dîba dia kukuatabu Yezu dikavua disemene.