Bakenza disua dia Yehowa
Dilonda mêyi a ndayilu a Yezu
KU DILOLO dia 14 Nizan 33 B.B., Yezu Kristo ne bapostolo bende ba lulamatu 11 bakadiunguija ku mêsa mu nzubu kampanda wa kuulu mu Yeruzaleme. Mudianjile kumanya ne: lufu luende lukavua pabuipi, wakabambila ne: ‘Nengikale nenu tshitupa tshîpi.’ (Yone 13:33) Bushuwa, Yudase Iskariote ukavua mumane kuditua mu njila wende bua kuya kuela tshitungu pamue ne bantu babi bavua basue bua Yezu ashipibue.
Muntu nansha umue mu nzubu au wa kuulu kavua mujingulule disemena pabuipi dia nsombelu eu kupita Yezu. Uvua mumanye bimpe ne: ukavua pabuipi ne kukenga. Yezu uvua kabidi mumanye ne: bapostolo bende nebamunyeme butuku abu mene. (Matayo 26:31; Zekâya 13:7) Bu muvua musangu eu muikale wa ndekelu wa Yezu bua kuakulaye ne bapostolo bende kumpala kua lufu luende, tudi mua kujadika se: mêyi ende a ndayilu akashindamena pa malu a mushinga mutambe bunene.
“Tungunukayi ne kuenza nunku bua kumvuluka”
Pamue ne bapostolo bende ba lulamatu, Yezu wakabanjija disekelela dipiadipia divua ne bua kupingana pa muaba wa Kupita kua Yehowa kua bena Yuda. Mupostolo Paulo wakadibikila ne: “didia dia dilolo dia Mukalenge.” (1 Kolinto 11:20, NW) Pakangataye mulungu wa diampa dikena luevene, Yezu wakenza disambila. Pashishe wakatshibula mulungu eu ne kupesha bapostolo bende diampa edi. “Angatayi, nudie. Etshi tshidi tshileja mubidi wanyi,” ke muakambaye. Pashishe wakangata dikopo dia mvinyo, kuela tuasakidila pa kuenza disambila ne kudipesha bapostolo, wamba ne: “Nuayi buonso buenu; bualu etshi tshidi tshileja ‘mashi anyi a tshiovo,’ adi ne bua kumuangalajibua bua ba bungi bua dijimija dia mpekatu.”—Matayo 26:26-28, NW.
Bualu ebu buvua ne diumvuija kayi? Anu bu muakaleja Yezu, diampa divua dileja mubidi wende ukena mpekatu. (Ebelu 7:26; 1 Petelo 2:22, 24) Mvinyo uvua tshimfuanyi tshia mashi mapumuna a Yezu, avua ne bua kupetesha njila bua dijimija dia mpekatu. Mashi ende mafila bu mulambu avua kabidi ne bua kubanjijija tshiovo tshipiatshipia pankatshi pa Yehowa Nzambi ne bantu 144 000, bavua ne bua kukokesha ndekelu wa bionso pamue ne Yezu mu diulu. (Ebelu 9:14; 12:22-24; Buakabuluibua 14:1) Pa kubikila bapostolo bende bua kudiabu didia edi, Yezu wakaleja ne: bavua ne bua kutumika nende pamue mu Bukalenge bua mu diulu.
Pa bidi bitangila didia edi dia tshivulukilu, Yezu wakatuma dîyi ne: “Tungunukayi ne kuenza nunku bua kumvuluka.” (Luka 22:19, NW) Eyowa, Didia dia Dilolo dia Mukalenge divua ne bua kuikala bualu bua kuenza musangu umue ku tshidimu, amu bu muvua Kupita kua Yehowa. Pavua eku Kupita kua Yehowa kuvuluija dipikudibua dia bena Izalele ku bupika mu Ejipitu, Didia dia Dilolo dia Mukalenge divua diodi dikoka ntema ku dipikudibua ditambe bunene—edi dia bukua-bantu budi buakanyine kupikudibua ku bupika bua mpekatu ne lufu. (1 Kolinto 5:7; Efeso 1:7) Kupita apu, aba badi badia diampa ne banua mvinyo bia tshimanyishilu badi bavuluijibua masanka abu a mudimu atshilualua bu bakalenge ne bakuidi mu Bukalenge bua mu diulu bua Nzambi.—Buakabuluibua 20:6.
Lufu lua Yezu Kristo luvua bushuwa bualu bua mushinga mutambe bukole mu muyuki wa bantu. Aba badi banyisha tshivua Yezu muenze badi balonda dîyi-dituma diende pa bidi bitangila Didia dia Dilolo dia Mukalenge: “Tungunukayi ne kuenza nunku bua kumvuluka.” Bantemu ba Yehowa batu bavuluka lufu lua Yezu ku tshidimu tshionso mu dituku didi diakanangane ne dia 14 Nizan. Mu 1996 dituku edi nedikale mu dia 2 Tshisanga, kunyima kua dibuela dia dîba. Udi mubikidibue ne musangelu wonso bua kubuela mu Nzubu wa Bukalenge udi pabuipi nebe.
‘Ndi nnushila dîyi dipiadipia’
Kusakidila ku dibanjija dia Didia dia Dilolo dia Mukalenge, Yezu uvua ne imue mibelu ya ndayilu bua bapostolo bende. Nansha mukavuabu balongeshibue bimpe, bantu aba bavua ne bia bungi bia kulonga. Kabavua bajingulule tshishiki dilongolola dia Nzambi bua Yezu, buabu bobu, anyi bua matuku atshivua alua. Kadi Yezu kakateta bua kutokesha malu onso au tshikondo atshi. (Yone 14:26; 16:12, 13) Pamutu pa nanku, wakakula pa bualu kampanda bua mushinga mukole. “Ndi nnushila diyi dipiadipia,” ke muakambaye, “nunangangane. Bu mundi mununange meme, nuenu penu nunangangane.” Pashishe Yezu wakasakidila ne: “Bonso nebanumanye munudi balongi banyi ku dinanga dinuikala banangangane.”—Yowanese 13:34, 35, MMM.
Mmu mushindu kayi uvuadi “diyi dipiadipia”? Ee, Mikenji ya Mozese ivua ituma dîyi ne: “Unange muntu nebe muudi mudinange.” (Bena Levi 19:18, MMM) Kadi, Yezu wakalomba bamulondi bua kuleja dinanga dia kudilambula didi mua kufika too ne ku difila muoyo wabu bua bena nkristo nabu. Bushuwa, ‘mukenji wa dinanga’ uvua kabidi utangila nsombelu ikena mitambe kukola. Mu nsombelu yonso mulondi wa Yezu Kristo udi ne bua kudianjila kuela tshiidia bua kuleja dinanga pa kuambuluisha bakuabu mu nyuma ne mu mishindu mikuabu.—Galatia 6:10.
Mu butuku ebu bua ndekelu bua matuku a muoyo wa Yezu pa buloba, dinanga diakasaka Yezu bua kusambila Yehowa Nzambi bua bayidi bende. Mu tshitupa kampanda tshia disambila diende, wakamba ne: ‘Badi pa buloba, meme ndi ndua kûdi. Tatu wanyi wa tshijila, ubalame mu dîna diebe diwakumpa, bua bobu kuikala bamue bu mutudi bietu bamue.’ (Yone 17:11) Mbikumbanyine kubambisha ne: mu dilomba edi kudi Tatuende, Yezu wakasambila bua buobumue mu dinanga bua bamulondi. (Yone 17:20-23) Bavua ne bua ‘kunangangana bu muvua yeye Yezu mubanange.’—Yowanese 15:12, MMM.
Bapostolo ba lulamatu bakalonda mêyi a ndayilu a Yezu. Tuetu petu tudi ne bua kutumikila mêyi-matuma ende. Mu “matuku a ku nshikidilu” aa makole mua kupita nau, dinanga ne buobumue munkatshi mua batendeledi balelela bidi ne mushinga kupita tshikondo kayi tshikuabu kumpala. (2 Timote 3:1) Bushuwa, bena nkristo balelela badi batumikila mêyi-matuma a Yezu ne balejangana dinanga dia buena-muntu. Ebi bidi bikonga ditumikila dîyi-dituma dia kusekelela Didia dia Dilolo dia Mukalenge.