Ndikuatshisha dia mushindu kayi ditudi mua kutekemena kudi Nzambi?

MU BIDIMU bia 700 kumpala kua bikondo bietu ebi, disama dia lufu diakakuata Hezikiya Mukalenge wa Yuda pavuaye ne bidimu 39. Ne dibungama dia bungi bua disama adi, Hezikiya wakasambila Nzambi bua amuondope. Nzambi wakamuandamuna ku butuangaji bua muprofete wende ne: ‘Ngakumvua kulomba kuebe, ngakutangila binsonji biebe; tangila, nententekaje bidimu dikumi ne bitanu pa mutu pa matuku a muoyo webe.’​—Yeshaya 38:1-5.

Bua tshinyi Nzambi wakamuambuluisha mu lutatu alu? Bidimu bivule kumpala, Nzambi uvua mulaye Mukalenge muimpe Davidi ne: ‘Nzubu webe ne bukalenge buebe nebijadikibue ku mêsu kuebe tshiendelele; nkuasa webe wa butumbi neajadikibue tshiendelele.’ Nzambi wakaleja kabidi ne: Masiya uvua ne bua kuledibua mu ndelanganyi ya Davidi. (2 Samuele 7:16; Musambu 89:20, 26-29; Yeshaya 11:1) Pakasama Hezekiya, kavua muanji kupeta muana to. Nanku, ndelanganyi ya mu dîku dia bukalenge bua Davidi ivua mu njiwu ya kujimina. Nzambi wakambuluisha Hezikiya bua kulama ndelanganyi ivua ne bua kufikisha too ne ku Masiya.

Mu bikondo bia kumpala kua buena Kristo, Yehowa uvua wambuluisha misangu ya bungi bantu bende bua kukumbaja milayi yende. Mose wakamba bua dipikula dia bena Isalele ku bupika mu Ejipitu ne: ‘Bualu bua Yehowa udi munusue ne bualu bua yeye utu watumikila mulayi wakalayaye batatu benu, Yehowa wakanupatula ne tshianza tshikole.’​—Dutelonome 7:8.

Bia muomumue, mu bidimu lukama bia kumpala, Nzambi wakadikuatshila malu ne bianza bua kukumbaja disua diende. Tshilejilu, mu njila wa ku Damaseke, Shaula, muena Yuda mukuabu wakapeta mu tshishima tshikena-kumona bua kulekelaye kukengesha bayidi ba Kristo. Dikudimuna mutshima dia muntu eu (wakalua mupostolo Paulo) diakambuluisha bikole bua kumuangalaja lumu luimpe munkatshi mua bantu ba bisamba bia bende.​—Bienzedi 9:1-16; Lomo 11:13.

Diambuluishangana divua bu tshilele anyi?

Nzambi uvua ne tshilele tshia kuambuluisha bantu anyi uvua ubambuluisha mu mpukapuka? Mukanda wa Nzambi udi uleja patoke ne: katshivua tshilele to. Nansha muvua Nzambi mupandishe bansonga bena Ebelu basatu mu tshikutu tshia kapia ne mupandishe kabidi muprofete Danyele mu buina bua ntambue, kakenza bualu nansha bumue bua kupandisha baprofete bakuabu ku lufu to. (2 Kulondolola 24:20, 21; Danyele 3:21-27; 6:16-22; Ebelu 11:37) Wakapatuisha Petelo mu buloko mu tshishima muvua Helode Agipa I mumuele. Kadi mukalenge umue umue eu wakashipa mupostolo Yakobo, ne Nzambi kakamuepula ku lufu alu to. (Bienzedi 12:1-11) Nansha muvua Nzambi mupeshe bapostolo bukole bua kuondopa masama ne kujula bafue, kakitaba bua kumbusha “dieba mu mubidi” divua ditatshisha mupostolo Paulo, dieba divua mua kuikala disama dia ku mubidi.​—2 Kolinto 12:7-9; Bienzedi 9:32-41; 1 Kolinto 12:28.

Nzambi kakepula bayidi ba Kristo ku dikenga divua Amperere Néron wa bena Lomo mubakebele to. Bavua bakengesha bena Kristo, babuosha ne muoyo ne babela miaba ivua nyama ya luonji. Kadi buluishi ebu kabuakakemesha bena Kristo ba kumpala ne kabuakakepesha ditabuja divuabu nadi dia ne: Nzambi udiku to. Yezu ukavua mudimuije bayidi bende ne: bavua ne bua kuya nabu ku tubadi ne se: bavua ne bua kuikala badiakaje bua kukenga nansha kufua bua ditabuja diabu.​—Matayo 10:17-22.

Anu muvuaye muenze ku kale, lelu Nzambi udi ne bukokeshi bua kuepula basadidi bende ku njiwu ne katuena mua kujana aba badi bamona ne: mbapete bukubi buende to. Kadi, mbikole bua kuamba ne dishindika dionso bikala Nzambi uvua mubakuatshishe anyi to. Basadidi ba lulamatu ba Yehowa ba bungi bakatapika pavua tshiapu kampanda tshikuate kapia mu tshimenga tshia Toulouse, mu ditunga dia France, ne binunu ne binunu bia bena Kristo ba lulamatu bakafua mu maloko a bena Nazi ne ba-Koministe anyi mu njiwu mikuabu, kadi Nzambi kakabepula ku njiwu yonso ayi to. Bua tshinyi Nzambi katu ukuatshisha misangu yonso bantu badiye wanyisha?​—Danyele 3:17, 18.

Kudi ‘bikondo bidi malu atulukila’ bantu

Padi bipupu bimueneka, muntu yonso udi mua kupeta njiwu, ne lulamatu ki ndudi mua kupandula muntu to. Pakakuata tshiapu tshia mu Toulouse mudilu, Alain ne Liliane bakapanduka, bantu 30 bakafua, ne nkama ne nkama bakatapika kabiyi bua bualu bubi kampanda buvuabu benze. Pa buloba bujima, bantu binunu ne binunu badi bashipibua kudi bantu bakuabu, bua diendesha dibi dia mashinyi, anyi bua mvita ne katuena mua kuamba ne: Nzambi ke udi ubakebela njiwu eyi to. Bible udi utuvuluija ne: bantu bonso “badi ne bikondo bidi malu abatulukila.”​—Muambi 9:11.

Bualu bukuabu kabidi, bantu batu basama, bakulakaja ne bafua. Nansha muvua bakuabu bela meji ne: Nzambi uvua mubapandishe anyi mubuondope mu tshishima, ndekelu wa bionso bakalua kufua. Dijikija masama, lufu ne dikupula ‘bisonji bionso’ ku mêsu kua bantu nedienzeke mu matuku atshilualua.​—Buakabuluibua 21:1-4.

Bua malu aa kuenzekawu, bidi bikengela bualu kampanda bunene kuenzekabu, ki mbua mu lupitapita to. Bible udi wakula bua muanda kampanda udibu babikila ne: “dituku dinene dia Yehowa.” (Sefanya 1:14) Mu dituku edi, Nzambi neumbushe malu onso mabi pa buloba bujima. Bantu nebapete mushindu wa kuikala ne muoyo wa tshiendelele mu nsombelu mupuangane muikala bantu kabayi mua ‘kuvuluka malu avua menzeke kale, kaayi abavuila kabidi mu lungenyi’ nansha. (Yeshaya 65:17, Mukanda wa Mvidi Mukulu [Katolike, MMM]) Nansha bafue nebajuke, nunku Nzambi neajikije kakuyi mpata dikenga ditambe makenga onso a bantu bunene. (Yone 5:28, 29) Bua dinanga diende dinene ne buimpe buende bikena kuelekeja, Nzambi neajikije ntatu yonso ya bantu bua kashidi.

Mushindu udi Nzambi wambuluisha bantu lelu

Kadi kabiena biumvuija ne: mpindieu Nzambi udi utangila bantu bakenga patupu kayi ne tshidiye wenza to. Lelu, Nzambi udi upesha bantu bonso mushindu wa kumumanya ne wa kudia nende malanda mimpe, kayi usunguluja tshisamba anyi muaba udi nawu muntu to. (1 Timote 2:3, 4) Yezu wakumvuija bualu ebu mu mêyi aa: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ (Yone 6:44) Nzambi udi ukoka bantu badi ne mitshima mimpe ku diambuluisha dia mukenji wa Bukalenge udi basadidi bende bamanyisha pa buloba bujima.

Nzambi udi kabidi ukuatshisha bantu badi basue bua abalombole. Ku diambuluisha dia nyuma wende muimpe, Nzambi udi ‘ubulula mitshima yabu’ bua kujingululabu disua diende ne kutumikilabu malu adiye ulomba. (Bienzedi 16:14) Nzambi udi ufila tshijadiki tshia mudiye uditatshisha bua yonso wa kutudi ne dinanga dionso pa kutupesha mushindu wa kumumanya, kumanya Dîyi diende ne malu adiye mulongolole bua kuenza.​—Yone 17:3.

Bualu bua ndekelu, Nzambi udi wambuluisha basadidi bende lelu pa kubapesha nyuma wende muimpe ne ‘bukole bupite’ bua kutantamena nsombelu kayi yonso udi mua kubafikila, kadi ki mpa kubapandisha mu tshishima to. (2 Kolinto 4:7, MMM) Mupostolo Paulo wakafunda ne: ‘Ndi mumanye mua kuenza malu onso [bua Yehowa Nzambi] udi unkolesha.’​—Filipoi 4:13.

Nunku tudi ne bua kuleja Nzambi dianyisha dietu matuku onso bua muoyo ne ditekemena didiye utupesha dia kuikala ne muoyo wa kashidi mu buloba muikala kamuyi makenga. Mufundi wa Misambu wakakonka ne: ‘Nempingajile Yehowa tshinyi bua malu ende mimpe onso akungenzelaye? Nengambule lupanza lua lupandu, nembikile dîna dia Yehowa.’ (Musambu 116:12, 13) Wewe ubala tshibejibeji etshi pa tshibidilu, neumanye tshivua Nzambi muenze, tshidiye wenza ne tshikalaye ne bua kuenza tshidi mua kukupesha disanka mpindieu ne ditekemena dishindame bua matuku atshilualua.​—1 Timote 4:8.

[Lungenyi lunene lua mu dibeji 6]

“Bantu kabakuvuluka malu avua menzeke kale, kaakubavuila kabidi mu lungenyi.”​—Yeshaya 65:17, MMM.

[Bimfuanyi mu dibeji 5]

Mu tshikondo tshivuabu bafunda Bible, Yehowa kakenza bua kabashipi Zekâya ne mabue to . . .

ne kakenza bua kabashipi bana bavua kabayi ne bualu kudi Helode

[Tshimfuanyi mu dibeji 7]

Tshikondo tshikadi pabuipi tshikala makenga kaatshiyiku kabidi; nansha bafue nebajuke