Dibenga kubuelakana mu malu a tshididi didi dipangisha bena Kristo bua kuleja dinanga anyi?

KUIKALA muena Kristo kakuena kushikidila anu pa kubala kua Bible, kusambila ne kuimba misambu ya Nzambi mu Dia lumingu dionso to. Kudi kabidi kulomba kuenzela Nzambi ne bantu malu kampanda. Bible udi wamba ne: ‘Katunanganganyi ku mêyi anyi ku ndimi; kadi tunangangane mu bienzedi ne mu bulelela.’ (1 Yone 3:18) Yezu uvua uditatshisha ne muoyo mujima bua bakuabu, ne bena Kristo mbasue kumuidikija. Mupostolo Paulo wakabela bena Kristo nende bua ‘kudifila misangu yonso ku mudimu wa Mfumu.’ (1 Kolinto 15:58, Mukanda wa Mvidi Mukulu [Katolike, MMM]) Kadi mudimu wa Mfumu ntshinyi? Mudimu eu udiku ukongoloja dikeba kushintulula malu a mbulamatadi bua kupesha bapele anyi badibu bakengesha diakalenga anyi? Ke tshiakenza Yezu anyi?

Nansha muakambilabu Yezu bua kubuela mu malu a tshididi, wakabenga. Wakabenga bumfumu bua makalenge onso a pa buloba buvua Satana musue kumupesha, kubengaye bua kukokangana ne bantu bua dilambula dia bitadi ne kunyemaye pakajinga bantu kumuteka mukalenge. (Matayo 4:8-10; 22:17-21; Yone 6:15) Kadi dibenga kubuelakana diende mu malu a tshididi kadiakamupangisha bua kuenza mudimu bua diakalenga dia bakuabu to.

Yezu uvua wimanyina pa malu avua mua kutuadila bantu disanka dia kashidi. Nansha muvua didisha diende dia bantu binunu bitanu ne diondapa bavua basama bituadile bantu disulakana dia tshitupa tshîpi, dilongesha diende diakapetesha bukua-bantu buonso mushindu wa kupeta masanka a tshiendelele. Yezu wakamanyika ki mbu mulongolodi wa malu a dipetesha bantu disulakana, kadi bu “Muyishi.” (Matayo 26:18; Mâko 5:35; Yone 11:28) Wakamba ne: “Tshidibo bandelele, kabidi tshindi muvuile panu apa, mbua kujadikila bantu bulelela.”​—Yone 18:37, MMM.

Dilongesha malu mimpe mapite a tshididi

Bulelela buakalongesha Yezu kabuvua malu a tshididi to. Kadi buvua bushindamene pa Bukalenge buvuaye yeye muine ne bua kuikala Mfumuabu. (Luka 4:43) Bukalenge ebu mbulamatadi wa mu diulu, ne nebupingane pa muaba wa mbulamatadi yonso ya bantu ne nebutuadile bukua-bantu ditalala dia kashidi. (Yeshaya 9:6, 7; 11:9; Danyele 2:44) Nunku, Bukalenge ebu ke ditekemena dimuepele dia bukua-bantu. Ki nkuleja dinanga dia bungi pa kumanyisha ditekemena dishindame edi pamutu pa kusaka bantu ku dieyemena bakuabu bua babapeshe ditalala mu matuku atshilualua anyi? Bible udi wamba ne: ‘Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye. Mupuya wende udi upatuka, udi upingana ku dimfuenkenya diende; mu dituku dine adi malu akadiye upangadija adi ajimina. Disanka didi kudi muntu udi ne dikuatshisha diende kudi Nzambi wa Yakoba, udi ne ditekemena diende mu Yehowa Nzambi wende.’ (Musambu 146:3-5) Nunku pamutu pa kutuma bayidi bende bua kuyisha mushindu muimpe wa kulongolola malu a mbulamatadi, Yezu wakabalongesha bua kuyisha ‘lumu luimpe lua bukalenge.’​—Matayo 10:6, 7; 24:14.

Nunku eu ke “mudimu wa Mfumu” udibu bapeshe bayishi bena Kristo bua kuenza. Bu mudibu balombe bena mu Bukalenge bua Nzambi bua kunangangana, Bukalenge nebujikije bupele pa kuabanyina bukua-bantu bintu mu mushindu muimpe. (Musambu 72:8, 12, 13) Bushuwa, elu ndumu luimpe lutudi ne bua kuyisha.

Lelu eu Bantemu ba Yehowa mbalongolola bua kuenza “mudimu wa Mfumu” eu mu matunga 235. Mu diumvuangana ne mukenji wa Yezu, badi banemeka mbulamatadi yonso. (Matayo 22:21) Kadi badi kabidi banemeka ne batumikila mêyi avua Yezu muambile bayidi bende aa: ‘Nuenu kanuena ba pa buloba, ngakanusungula mu ba pa buloba.’​—Yone 15:19.

Bamue bavua bayisha malu a tshididi bakalekela kunyima kua buobu bamane kukonkonona Bible ne muoyo mujima. Muena tshididi mukuabu uvua muena mu bulongolodi bua Midimu ya Katolike wakamba ne: “Ngakaditua mu malu a tshididi, ngela meji ne: bidi bikengela kuambuluisha bikole menemene bua malu a tshididi ne a nsombelu wa bantu kuyawu kumpala.” Kunyima kua yeye mumane kulekela mudimu wa mulombodi wa tshimenga bua kuyisha Bukalenge bua Nzambi bu Ntemu wa Yehowa, wakumvuija bua tshinyi malu adi bena tshididi ba muoyo muimpe benza kaena aya kumpala to. Wakamba ne: “Malu pa buloba adi anu mudiwu emu, ki mbualu bantu bimpe mbapange kuakaja nsombelu to, kadi bualu madikolela mimpe a bakese mmajibakaja kudi malu mabi a ba bungi.”

Dibenga kubuelakana mu malu a tshididi bua kuyisha ditekemena dimuepele dia bukua-bantu kadiena dipumbisha bena Kristo balelela bua kuambuluisha bakuabu mu mishindu mimpe to. Aba badibu bambuluisha bua kulua bena mu Bukalenge bua Nzambi badi balonga mua kulekela ngikadilu mibi, kunemeka bumfumu, kulengeja nsombelu wa dîku diabu ne kuikala ne mmuenenu wa nkatshinkatshi pa bibi bitangila bubanji. Tshidi ne mushinga mutambe ntshia se: Bantemu ba Yehowa badi bambuluisha bantu bua kuikala mu malanda mashême ne Nzambi.

Bayishi ba Bukalenge bua Nzambi aba badi bambuluisha bantu badibu basombe nabu. Kadi tshidi tshipite bionso ntshia se: badi bafikisha bantu ku dieyemena mbulamatadi mulelela ne wikala mua kupesha bonso badi banange Nzambi ditalala dia kashidi. Nunku, bua dibenga kubuelakana dia bena Kristo mu malu a tshididi, badi ne budikadidi bua kupesha bantu diambuluisha dimpe ne didi dinenga lelu’eu.

[Kazubu/​Tshimfuanyi mu dibeji 7]

Wakalekela malu a tshididi kubanga kuyisha Bukalenge bua Nzambi

Patshivua Átila nsonga, wakalonga teoloji wa dipikula kudi bansaserdose ba mu parwase wabu mu tshimenga tshia Belém, mu Brésil. Uvua munange kumvua pavua bantu bamba ne: dimue dituku bantu nebapikudibue ku tshinyangu, yeye kubuela mu tshisumbu kampanda tshia bena tshididi, kulongaye mua kulongolola ngendu ya ditontolola ne malu a disaka bantu ku dibenga kutumikila mbulamatadi.

Kadi Átila uvua kabidi munange kulongesha bana ba mu tshisumbu etshi ne mukanda wa Telejayi Mulongeshi munene.a Mukanda eu uvua wakula bua ngikadilu muimpe ne bua ditumikila bamfumu ba mbulamatadi. Muanda eu wakasaka Átila bua kudikonka bua tshinyi aba badi batua teoloji wa dipikula nyama ku mikolo kabena batumikila mêyi manene a nsombelu a kudi Yezu ne bua tshinyi bamue patubu badia bumfumu kabatu kabidi bavuluka bantu badibu bakengesha. Wakapatuka mu tshisumbu atshi. Pashishe, Bantemu ba Yehowa bakakokola ku tshiibi tshiende ne kuakulabu nende bua Bukalenge bua Nzambi. Diakamue, wakatuadija kulonga Bible ne kulonga bua kumanya tshintu tshilelela tshidi mua kujikija makenga a bukua-bantu.

Tshikondo tshivua Átila ulonga Bible, wakabuela mu tshisangilu kampanda tshia bena Katolike tshia malu a ntendelelu ne a tshididi. Balongeshi ba mu tshisangilu etshi bakamba ne: “Eyi mmishindu ibidi mishilangane ya kumona bualu bumue.” Wakabuela kabidi mu bisangilu ku Nzubu wa Bukalenge. Wakasanganaku dishilangana dinene be! Kakuvua muishi wa makanya, maluvu anyi manaya a bundu to. Wakangata dipangadika dia kubalonda mu mudimu wa diyisha, ne kunyima kua matuku makese, wakatambula. Mpindieu mmumanye bua tshinyi teoloji wa dipikula kêna mua kujikija ntatu idi nayi bapele.

[Mêyi adi kuinshi]

[Bimfuanyi mu dibeji 6]

Dibenga kubuelakana mu malu a tshididi dia bayishi ba lumu luimpe bena Kristo kadiena dibapangisha bua kuambuluisha bakuabu to