Badi babanda mu tshiondokondoko mu Saba

TSHIDILA tshia Saba tshidi ku bukokeshi bua ditunga dia Pays-Bas tshivua ku kale tshisokomenu tshia banyengianganyi ba bintu bavua benda mu matu pa mâyi a Caraïbes mu dikeba bintu bia kupawula. Lelu mu tshidila etshi tshikese tshidi mutantshi wa kilometre 240 ku est kua ditunga dia Porto Rico mudi bantu 1 600, batanu ba kudibu bikale Bantemu ba Yehowa. Kadi bambi ba lumu luimpe ba dikima aba badi benda bakeba tshintu tshia mushinga mukole kupita bintu bia kupawula. Mbaditue ne tshisumi mu dikeba dia bantu badi ne ‘meji adi akengela bua kupeta muoyo wa tshiendelele.’​—Bienzedi 13:48, NW.

Lumu luimpe lua Bukalenge bua Nzambi luakafika mu tshidila etshi mu dia 22 Kabalashipu 1952 pavua buatu bua metre 18 buvuabu babikila ne: Sibia bufikemu. Bavua babuendesha kudi Bantemu ba Yehowa. (Matayo 24:14) Misionere Gust Maki ne Stanley Carter bakabanda pa Tshibandilu, mbuena kuamba ne: kajila ka bidiatshilu bia mabue bipite pa 500 kavua kabanda katangile ku musoko wa The Bottom udi tshimenga tshikulu tshia Saba.a Kajila aka kavua anu nkayaku kavua kafika mu muaba uvua bantu mu tshidila etshi munkatshi mua nkama ya bidimu.

Luapolo lua kumpala lumanyike lua mudimu wa buambi wa bena Kristo luakapatuka mu mukanda wa Annuaire des Témoins de Jéhovah 1966. Bilondeshile luapolo alu, kuvua anu Ntemu umue uvua uyisha mu tshidila etshi. Panyima pa matuku, dîku kampanda divua difumine mu ditunga dia Canada diakayishamu lumu luimpe bidimu ndambu. Matuku adi panshi aa, Russel ne mukajende Kathy (bakadi bakulakaje) ba mu ditunga dia États-Unis bakaya mu Saba ne kuenzabu mudimu wa buambi muine amu. Tumone tshidibu batulondela.

Luendu luetu mu Saba

Meme ne mukajanyi tuakenza luendu ku ndeke ne tuvua benyi ba Ronald, Ntemu umuepele uvua mu tshidila etshi mu tshitupa tshinene tshia bidimu bia 1990. Uvua mutuindile ku tshipalu. Bisekiseki bikese bituvua bamutuadile biakamusankisha bualu kabatu bapana bia pa madimi mu tshidila etshi to. Tuakabuela mu kaminyo kakese, kubangisha kubanda mantonya mantonya mu tshibadi tshia mukuna uvua uluka kapia ku kale, too ne ku lusongo luawu.

Tuakimana mu musoko mukuabu (wa Hell’s Gate) eku Ronald utangila ku dibaya ditubu balamika mamanyisha bua kumona ni batshivua balamike dibeji dia kubikila nadi bantu ku muyuki wa patoke uvua ne bua kuenzeka mu Dia lumingu. Tuakumvua disanka bualu ditshivuaku. Wakatumpika kubuela kabidi mu mashinyi, tuetu kutungunuka ne dibanda too ne mu musoko munene menemene wa mu tshidila etshi: wa Windwardside. Dîna edi didi dileja ne: musoko eu utu muimpe bualu udi ku luseke lua tshidila kudi lupepele lututshila mu bule bua metre 400 kulu pa mukuna. Patuakabuela mu kajila ka mashinyi kadi katangile ku nzubu wa Ronald, tuakamona tshimanyinu tshia mekala a bungi kumpala kua tshibueledi tshia nzubu tshivua tshileja ne: Nzubu wa Bukalenge wa Bantemu ba Yehowa.

Patuvua tudia munda munya, ngakajula lukonko luvua lutusake bua kulua mu tshidila etshi: “Mmunyi muuvua mulue mumanyishi wa Bukalenge mu Saba?”

Ronald udi wamba ne: “Pakajika dibaka dia biro bia Bantemu ba Yehowa mu Porto Rico mu 1993, meme ne muena kuanyi tuvua basue kushala tuenzela mudimu wetu mu ditunga dienyi. Kumpala tukavua bamane kuya mu Saba ne bena dibaka bakuabu babidi bavua bampanda-njila. Tuakumvua ne: muvua bantu 1 400, kadi kamuvua Bantemu to. Nunku tuakayikila ne Komite wa filiale wa mu Porto Rico bua tuetu kulua mu tshidila etshi.

“Malu kuendawu bimpe, kunyima kua matuku kutuitabilabu bua kulua kusombela mu tshidila etshi. Kadi kunyima kua bidimu bibidi disama dikole diakakuata mukajanyi ne tuakapingana mu ditunga dia Californie. Kunyima kua lufu luende, ngakalukila mu Saba. Meme tshitu musue kutuadija bualu tshiyi mbujikija to.”

Diyisha ku nzubu ne ku nzubu mu Saba

Nzubu wa tshisombedi wa Ronald ke uvua kabidi Nzubu wa Bukalenge.b Nzubu wende eu ukavua muenze bidimu lukama. Patudi tudia mu dinda ne tudilongolola bua kuya mu buambi, kavula kadi kaloka ne kabolesha tshikuku tshia pambelu. Panyima pa didia ne mavuba a mvula mamane kutangalaka, tudi tuya kuyisha ku tshiibi ne ku tshiibi mu The Bottom. Ku nzubu yonso, Ronald udi wela muena nzubu muoyo utela dîna diende. Tudi tutamba kuakula bua mianda idi mienzeke matuku au. Bantu ba bungi mbamanye Ronald ne mudimu wende wa buambi, ne bavule badi bitaba mikanda ya malu a mu Bible itudi tubapesha.

Kumanya bantu badi basankidila mukenji wa Bukalenge kudi mua kuikala lutatu paudi kuyi muibidilangane ne bena musoko. Bua tshinyi? Ronald udi wamba ne: bualu “mbulamatadi mmuele mukenji bua nzubu yonso ikala milaba mukubu wa muomumue.” Ngakamona ne: mbulelela pangakela mêsu eku ne eku ne kumona nzubu yonso ya mu Saba mitoke ne malata makunze.

Kunyima kua bamane kuyikila malu a mu Bible, tudi tubikila muena nzubu bua alue kumvua muyuki wa patoke mu Dia lumingu ku Nzubu wa Bukalenge. Patu Ronald kayi muye ku luendu, utu wenza muyuki wa patoke lumingu luonso. Mpindieu bantu 17 badi balonga Bible mu Saba. Bantu 20 bavua babuele mu Tshivulukilu tshia lufu lua Kristo mu 2004. Nansha mudi bungi ebu mua kumueneka bukese, budi buleja muntu umue pa lukama ku bonso badi mu tshidila.

Bushuwa Bantemu ba Yehowa mbadienzeje bikole bua kufikisha mukenji wa lupandu wa Nzambi kudi bantu ba bungi menemene. Nansha bikale mu tshidila tshikese bu mudi Saba anyi mu tshitupa tshinene tshia buloba, Bantemu ba Yehowa badi bakumbaja ne lulamatu mudimu wabu wa ‘kuvuija ba bisamba bionso bayidi.’​—Matayo 28:19.

Diakabi, luendu luetu mu tshidila etshi ludi lutua ku tshibungubungu. Patudi tubanda mu ndeke, tudi tukupa bianza bua kulayangana. Netuikale tuvuluka misangu yonso luendu luetu lua mu Saba ne dîba dituvua tubanda ku The Bottom.

[Mêyi adi kuinshi]

[Tuarte mu dibeji 10]

(Bua kumona malu bimpe, tangila mu mukanda)

PORTO RICO

[Mêyi a dianyisha bua tshimfuanyi mu dibeji 10]

Tshimfuanyi tshidi panyima: www.sabatourism.com