Nkonko ya babadi

Davidi, muntu uvua usankisha mutshima wa Nzambi wakenzela bantu bavuaye mukuate mu mvita malu ne tshikisu bu mudi bamue bafika ku diamba bilondeshile 2 Samuele 12:31 ne 1 Kulondolola 20:3 anyi?

Tòo. Davidi wakapesha patupu bena Amona bavuaye mukuate mu mvita midimu mikole. Bantu batu bumvuija bibi tshivuaye muenze bua mushindu udi imue Bible mikudimune mvese eyi.

Bible eyi idi ileja Davidi bu muena tshikisu ne tshinyangu padiyi yakula bua dinyoka diakafundilaye bena Amona. Tshilejilu, mu Bible mukuabu tudi tubala mu 2 Samuele 12:31 ne: “Wakaya ne bantu bavuamu, ne kubateka muinshi mua nsele, muinshi mua nkasu ya biamu, muinshi mua tusuyi tua tshiamu ne kubapitshishaye mu mfulu wa madioto: ne ke muakenzaye mu misoko yonso ya bana ba Amona.” (Bible du roi Jacques) Mbakudimune kabidi 1 Kulondolola 20:3 mushindu umue eu.

Kadi, anu mudi mumanyi wa malu a mu Bible kampanda (Samuel Rolles Driver) mufunde, “bilondeshile bionso bitudi bamanye pa bumuntu bua Davidi ne ngikadilu yende, kavua muena” tshikisu to. Ke bualu kayi mukanda mukuabu udi wamba ne: “Davidi udi wabanya bantu bakuata mu mvita mu bisumbu bia bena mudimu bua benze mudimu mu tshitupa tshia buloba tshivuaye mukuate, ne bidi bimueneka ne: bakalenge bavua batshimuna mvita bavua ne tshibidilu tshia kuenza nunku.” (The Anchor Bible) Mufundi mukuabu (Adam Clarke) udi wamba mu luidi lumue elu ne: “Nunku bidi biumvuija ne: Wakavuija bantu bapika, kubapesha mudimu wa dikosa bintu ne nsele, dienza nkasu ya biamu anyi diumbula dia tubanda, . . . ne dikosa dia mitshi ne dienza madioto. Miaku eyi kayena yakula bua dikosa bantu bitupa ne nsele anyi ne biamu bikuabu peshi dibasaya to, ne malu aa kaena apetangana ne avua Davidi muenzele bena Amona to.”

Bible kabukabu ya lelu idi ne lungenyi lupetangana ne ngumvuilu mujalame eu idi ileja ne: kabena ne bua kubanda Davidi bu muena tshikisu to.a Tangila mudi Bible mukuabu wamba: “Kuyaye ne bantu bavuamu, kubatekaye bapandi ba mabaya, bapandi ba mabue, bakoshi ba nkunyi ne bakumi ba tushola. Uvua muenzele bimenga bionso bia bena Amone mushindu wa muomumue.” (2 Samuele 12:31, MMM) ‘Davidi kuya ne bantu bavua base mu tshimenga etshi ku bupika; uvua ubenzeja midimu mikole ne miele ya nsele, mpiki ne bisuyi. Uvua wenza nanku mu bimenga bionso bia bena Amona.’ (1 Kulondolola 20:3, MMM) Mushindu udibu bakudimune mêyi aa mu Mukanda wa Nzambi udi mu diumvuangana ne ngumvuilu wa matuku etu aa wa bamanyi ba malu a mu Bible: ‘Yeye wakangata bantu bakadimu, wakabenzeja mudimu wa kupandabu biamu bia kuipila nabi ne bisuyi, ne bua kuenzabu tushola.’ (2 Samuele 12:31) ‘Yeye wakapatuka ne bantu bakadimu, wakabatuma ku mudimu ne scies ne nkasu ya biamu ne bisuyi. Davidi wakenzela ba mu misoko yonso ya bena Amona nunku.’​—1 Kulondolola 20:3.

Davidi kakenzela bena Amona bavuaye mutshimune malu a tshikisu ne kubashipa mu mushindu uvua wenza buôwa nansha. Kakidikija bilele bia tshikisu ne bia tshinyangu bia mu tshikondo tshivuaye ne muoyo to.

[Mêyi adi kuinshi]