Dijingulula bimanyinu mbualu bua mushinga mukole!

“Kumpala mvua ngela meji ne: muananyi Andreas uvua anu usama mutu patupu. Kadi mubidi uvua umutema kapia kakole, kayi kabidi umvua nzala ya biakudia. Mutu uvua umusama wakamunemenena bikole, meme kubanga kupampakana. Pakapingana bayanyi kumbelu, tuakaya ne Andreas kudi doktere. Wakamuenza mateta ne kumutuma diakamue mu lupitadi. Disama divua nadi Andreas divua dinene dipite dia mutu. Uvua ne menenjite. Bakamuondapa, yeye kumvua bimpe.”​—Gertrud, mamu wa mu Allemagne.

BUALU buvua buenzekele Gertrud ebu butu pamuapa buenzekela baledi ba bungi. Batu bamona bimanyinu bitu bileja ne: muanabu udi mua kuikala usama. Nansha mutubi se: disama dionso kaditu anu dikole, baledi kabena ne bua kulengulula bimanyinu bia disama didi nadi muanabu to. Kujingulula bimanyinu ne kuenza tshidi tshikengedibua kudi mua kuambuluisha bikole. Ebu mbualu bua mushinga mukole.

Bitu bikengela kuenza nanku nansha mu malu adi kaayi a bukole bua mubidi. Tshilejilu tshiakanyine ntshia mâyi avua masapalale mu Tshisua-munene 2004 mu matunga a pabuipi ne Mbuu wa Inde. Bibambalu bia mbulamatadi bia mu ditunga bu mudi dia Australie ne dia Hawaii bikavua bisangane ne: tshikumina tshinene tshivua ne bua kuenzeka ku nord kua Sumatra ne bibambalu ebi bikavua bimone ntatu ivua njiwu mua kulua kukebesha. Kadi kakuvua mushindu wa bantu bavua miaba ya njiwu ayi kupetabu didimuija ne kuditumikila to. Ke bua tshinyi bantu bapite pa 220 000 bakafua.

Bimanyinu bia mushinga mukole menemene

Pavua Yezu Kristo pa buloba, wakalongesha bantu bavua bamuteleje bua kukenketa bimanyinu ne kuenza tshivua tshikengedibua. Dituku adi uvua wakula bua bualu bua mushinga mukole menemene. Bible udi wamba ne: ‘Bafalese ne Basadoke bakalua, bakamuteta munda, bakamuambila ne: Utuleje tshimanyinu tshia mu diulu. Kadi yeye wakabandamuna ne: Mu dilolo nutu nuamba ne: Mvula kêna ulua, bualu bua diulu didi dikunze; mu dinda nutu nuamba ne: Lelu mvula nealue, bualu bua diulu didi dikunze kunzu, mvula udi mufinde. Nudi bamanye mua kujingulula mpala wa diulu, kadi kanuena bamanye mua kujingulula bimanyinu bia bikondo.’​—Matayo 16:1-3.

Pakakula Yezu bua “bimanyinu bia bikondo,” uvua uleja ne: bena Yuda ba mu bidimu lukama bia kumpala bavua bamuteleje bavua ne bua kuikala bamanye ne: bavua mu tshikondo tshivua tshilomba mitalu. Malu a bena Yuda avua ne bua kupeta kabutu kanene kavua ne bua kubakuata buonso buabu. Yezu wakakula ne bayidi bende matuku makese kumpala kua lufu luende bua tshimanyinu tshikuabu: tshimanyinu tshia dilua diende. Malu akambaye musangu au adi ne mushinga wa bungi kudi yonso wa kutudi lelu.