Ndilongesha kayi didi mua kututshisha nsombelu webe diakalengele?

UDIKU mupete ntatu mikupite bungi ikufikisha ku didimona bu muntu mudine mu mâyi anyi? Elabi meji bua bungi bua makenga audi mua kukebesha wewe muenze tshilema mu dikeba kujikija lumue anyi mivule ya ku ntatu eyi! Kakuena muntu udi muledibue ne bukole bua kujikija bimpe ntatu yonso nkong, anyi kuangata mapangadika mimpe misangu yonso. Mu bualu ebu ke mudi dilongesha dikale ne mushinga wa bungi. Kadi nkuepi kuudi mua kupetela dilongesha diakuambuluisha bua kujikija ntatu?

Bantu ba bungi, bana ne bakulumpe, batu bangata tulasa tubandile ne mushinga wa bungi. Bamue bamanyi bapiluke badi mene bamba ne: badi “bitaba ne muoyo mujima ne: kuena mua kupeta mudimu [muimpe] paudi kuyi mulonge iniversite to.” Kadi kudi majinga a bungi a bantu adibu kabayi mua kukumbaja kudi dipeta dia bintu bia ku mubidi! Tshilejilu, tulasa tua iniversite tudiku tukuambuluisha bua kuikala muledi muimpe, muena dibaka wa nsongo peshi mulunda mulenga anyi? Bushuwa, bantu batubu banyisha bikole bua tulasa tudibu balonge badi mua kupeta bikadilu bibi, bapangila mua kulengeja nsombelu wa mu dîku diabu, anyi ndekelu wa bionso badi mene mua kufika ku didishipa.

Bu mutu bitendelelu bilongesha bantu malu, bamue batu bayamu bua kukeba diambuluisha, kadi batu bedibua mâyi ku makasa bualu kabena bapeta tshidi mua kubambuluisha bua kujikija ntatu yabu nansha. Tshilejilu, Emiliaa wa mu ditunga dia Mexique udi wamba ne: “Kukadi bidimu 15 bimvua mmona ne: meme ne bayanyi katuvua mua kusomba kabidi muaba umue nansha. Tuvua tutanda dîba dionso. Ngakapangila bua kumulekesha dinua dia maluvu. Misangu ne misangu mvua nshiya bana betu batekete nkayabu bua kuya kumukeba. Lungenyi luanyi lukavua lushikile! Misangu ya bungi mvua nya mu nzambi ngenda nkeba tshivua mua kungambuluisha bua kujikija lutatu elu. Nansha muvuabu babalamu Bible mu mpukampuka, tshivuaku mumvue mubelu nansha umue uvua utangila buludiludi lutatu luanyi; ne muntu nansha umue kavuaku muanji kusemena pabuipi nanyi bua kungambila tshimvua mua kuenza. Kusomba mu tshitanda mutantshi ne kuambulula amue masambila kakuvua kungambuluishe to.” Bakuabu badi mua kubungama padibu bamona balombodi ba tshitendelelu tshiabu kabayi ne nsombelu wa tshitembu. Ke bualu kayi bantu ba bungi kabatu bangata tshitendelelu bu muaba wa kupetela malongesha anyi mibelu idibu nayi dijinga bua kuikala ne nsombelu muimpe to.

Nanku udi mua kudiela nkonko eyi: ‘Ndilongesha kayi dindi ne bua kupeta bua kututshisha nsombelu wanyi diakalengele?’ Buena-Kristo bulelela budiku ne diandamuna dia lukonko elu lua mushinga anyi? Tshiena-bualu tshidi tshilonda etshi netshiakule bualu ebu.

[Mêyi adi kuinshi]