Mmunyi muudi mua kufikisha bana bebe ku dinanga Nzambi ne muoyo mujima?

LELU eu mbikole bua muntu kudia bulunda ne Yehowa Nzambi. (Musambu 16:8) Anu bu mukavuabu bamanyishe, tudi mu ‘matuku a malu makole.’ Bantu ba bungi ‘mbanangi ba masanka, kabayi banangi ba Nzambi.’ (2 Timote 3:1-5) Bushuwa, mbikole bua kupeta bantu badi banange Nzambi ne muoyo mujima lelu eu.

Tuetu basue bua bana betu banange Yehowa ne wabu muoyo mujima, tudi ne bua kudienzeja bikole. Tuetu ke badi ne bua kufikisha bana ku dinanga Yehowa Nzambi. Mmushindu kayi?

Kuyukila nabu ne muoyo mujima

Tudi mua kufikisha bana betu ku dinanga Nzambi bituikale tuetu bine bamunange ne muoyo wetu mujima. (Luka 6:40) Mukanda wa Nzambi udi uleja bualu ebu wamba ne: ‘Sua Yehowa Nzambi webe ne mutshima webe wonso ne muoyo webe wonso ne bukole buebe buonso. Mêyi au angakukuambila lelu eu ikale mu mutshima webe; wewe newayishe bana bebe.’​—Dutelonome 6:4-7.

Mmunyi mutudi mua kufikisha bana betu ku dinanga Nzambi ne muoyo wabu mujima? Tshia kumpala, tudi ne bua kumanya tshidi mu muoyo wa muana. Tshibidi, tudi ne bua kumuleja tshidi mu muoyo wetu tuetu bine.

Pavua Yezu Kristo mu njila wa ku Emau ne bayidi bende babidi, tshia kumpala wakabela nkonko bua kumanya malu avuabu batekemena ne avua abenza buôwa. Yezu wakanji kubateleja mutantshi, pashishe yeye kubumvuija tshidi Mifundu yamba bua kulongolola meji avuabu bela. Pashishe bobu kuamba ne: ‘Mitshima yetu kayakadi itema munda muetu pakadiye utuambila malu anyi?’ Muyuki eu udi tshilejilu tshimpe tshia mua kuyukila ne muana ne muoyo mujima. (Luka 24:15-32) Mmunyi mutudi mua kufika ku dimanya meji adi muana wela?

Matuku mashale aa, tuvua bele baledi badi ne bana bakadi bakulumpe anyi badi bipatshila ku bukulumpe ne badi bikale tshilejilu tshimpe mu tshisumbu nkonko bua tshilumbu tshia diyukila ne bana ne muoyo mujima. Tshilejilu mu ditunga dia Mexique, Glen udi ne bana banayi.a Udi wamba ne: “Diyukila dia baledi ne bana kaditu didiluila nkayadi to. Meme ne mukajanyi tuvua tuteke malu adi kaayi ne mushinga ku luseke bua kusomba ne bana betu bikole. Pavuabu ne bidimu 13 too ne 19, tuvua imue misangu tusomba nabu dilolo dijima, tuyukila nabu bua kumanya meji adibu bela. Bia muomumue patuvua tudia, tuvua tuteleja malu avuabu bayukila bua kumanya meji avuabu bela ne pashishe tuakaja ngikadilu yabu mu buimpe, misangu ya bungi kabayi bamanye to.”

Kuyukila ne bana ne muoyo mujima kudi kabidi kulomba kubambila tshidi mu muoyo wetu tuetu baledi. Yezu wakamba ne: ‘Muntu muimpe udi upatula tshintu tshimpe mu tshibutshilu tshimpe tshia mutshima wende; bua mukana muende mudi muamba anu malu adi matambe kuvulangana mu mutshima wende.’ (Luka 6:45) Toshiki, udi ne bana basatu badi mu mudimu wa ku dîba ne ku dîba mu ditunga dia Japon udi wamba ne: “Misangu ya bungi mvua mbambila tshivua tshimfikishe ku ditabuja Yehowa ne mumvua mufike ku ditaba ne muoyo wanyi mujima ne: udiku ne mudi malu andi mudimuene mu nsombelu wanyi mafike ku dingitabijija ne: Mukanda wa Nzambi udi wamba malu malelela ne udi ulombola bantu bimpe.” Mu ditunga dia Mexique, Cindy udi wamba ne: “Misangu yonso bayanyi uvua usambila ne bana. Pavuabu bumvua masambila avuaye wenza ne muoyo mujima, bakamanya ne: Yehowa mmuntu mulelela.”

Tshilejilu tshietu tshidi ne bukole bua bungi

Nsombelu wetu udi ne bukole bua bungi kudi bana kupita bitudi tubambila bualu udi ubaleja mutudi banange Yehowa. Bantu bakamona muvua Yezu Kristo munange Yehowa pakamonabu umutumikila. Yezu wakamba ne: ‘Bua ba pa buloba bamanye ne: Ndi musue Tatu, ne bu muakampa Tatu mukenji, nunku mmundi ngenza.’​—Yone 14:31.

Gareth, Ntemu wa Yehowa wa mu ditunga dia Galles udi wamba ne: “Bana badi ne bua kumona mutudi banange Yehowa ne mutudi tudienzeja bua kuenza malu mudiye musue. Tshilejilu, bana banyi mbamone muntu ntumikila malu adi Yehowa utuambila ne ngitaba bilema bianyi. Mpindieu badi baditatshisha pabu bua kuenza mushindu eu.”

Greg, wa mu ditunga dia Australie udi wamba ne: “Tutu basue bua bana betu bamone ne: tudi tuteka ntendelelu mulelela wa Yehowa pa muaba wa kumpala. Patudi tusungula midimu ya kuenza anyi mishindu ya kujikija lutetuku, tudi tuanji kukonkonona bua malu aa kaangatshi muaba wa midimu yetu ya bena Kristo. Bidi bituenza disanka bua kumona ne: ke tshidi muanetu wa bakaji udi ne bidimu 19 wenza mu mudimu wende wa bumpanda-njila buambuluishi.”

Tuambuluishe bana betu bua bamanye Nzambi

Katuena mua kunanga anyi kueyemena muntu utudi katuyi bamanye to. Bu muvua mupostolo Paulo musue bua bena Kristo ba mu Filipoi banange Yehowa bikole, wakabafundila ne: ‘Ndi ndomba bualu ebu ne: Luse [anyi dinanga] luenu lutambe kudiundadiunda mu dimanya ne mu dijingulula dia malu onso.’ (Filipoi 1:9) Falconerio udi musombele mu ditunga dia Pérou mudiye udikoleshila bana bende banayi udi wamba ne: “Kuikala ne tshibidilu tshia kubala Mukanda wa Nzambi ne kuulonga ne bana kudi kukolesha ditabuja diabu. Imue misangu pantu ndengulula bua kulonga nabu, ntu mmona dinanga diabu kudi Yehowa dikepela.” Gary wa mu ditunga dia Australie udi wamba ne: “Ntu ndeja bana banyi misangu yonso ne: malu adi Mukanda wa Nzambi mulaye atu anu akumbana. Ntu kabidi mbaleja masanka adi muntu upeta padiye utumikila mikenji ya Nzambi. Kulonga pa tshibidilu mu dîku ke kudi kutuambuluisha bua kukolesha ditabuja diabu.”

Dimanya nedilenge muoyo wa muana padi dilonga dienzeka mu mushindu muimpe udi usankisha. (Yakobo 3:18) Shawn ne Pauline mbasombele mu ditunga dia Grande Bretagne ne badi ne bana banayi. Badi bamba ne: “Patudi tulonga mu dîku, tutu tudienzeja bua kubenga kutandisha bana nansha padibu benza disalu. Tutu tushintulula mishindu ya kulombola dilonga. Imue misangu tutu tuambila bana bua kusungula tshiena-bualu tshia tuetu kulonga. Tutu tutangila bande ya bulongolodi bua Yehowa. Imue misangu tutu tunayilule malu atudi tumona anyi tuanji kuimanyika bande ne tuyukila bua bitudi bamone.” Anu muomu mu ditunga dia Grande Bretagne amu, mamu mukuabu diende Kim udi wamba ne: “Ntu ndongolola dilonga dia dîku bimpe menemene bua kumona mua kuela bana nkonko idi ibeleshisha meji. Tutu basue kulonga! Tutu tusekeshangana bikole.”

Disungula dia balunda

Bua bana betu kunangabu Yehowa ne kuangata ntendelelu mulelela ne mushinga, badi ne bua kusomba ne bantu badi badie nende bulunda. Ki mbitekete bua kupetela bana betu balunda bimpe badibu mua kusomba nabu ne kunaya nabu to. Kadi kuenza nunku kudi ne mushinga. Nunku, mbimpe kukeba mishindu idi bana mua kuikala basomba ne Bantemu ba Yehowa badi basungule bua kuenza mudimu wa ku dîba ne ku dîba mu nsombelu wabu mujima. Bana betu ba bungi badi benza mudimu eu mbafike ku diwenza bualu bavua badie bulunda ne Bantemu bakavua mu mudimu eu. Muanetu wa bakaji mukuabu udi mulue misionere udi wamba ne: “Baledi banyi bavua babikila bampanda-njila kuetu misangu ya bungi bua tuetu kudia nabu. Bavua bamueneka bikale ne disanka dia bungi bua mudimu uvuabu benza ne ngakumvua panyi dijinga dia kuenzela Nzambi mudimu bu bobu.”

Bushuwa, bantu badi bana betu basomba nabu badi mua kubanyanga anyi kubavuija bantu bimpe. Kadi tumanye ne: padi bana basomba ne bantu babi, bantu abu nebabasake bua kubenga kutumikila bitudi tuetu baledi tubalongesha. (1 Kolinto 15:33) Mbimpe kudienzeja bua kulongesha bana bua kubenga kudia bulunda ne bantu badi kabayi banange Yehowa anyi kabayi bamumanye. (Nsumuinu 13:20) Shawn, utukavua batele kulu eku udi wamba ne: “Tutu tulongesha bana betu mua kusomba bimpe ne balongi nabu mu tulasa, kadi tubambila ne: bulunda buabu abu budi ne bua kushikila anu mu tulasa amu. Bana betu mbumvue bimpe bua tshinyi kabena mua kuya kuenza bibilu anyi kuya kunaya manaya adibu balongolole mu tulasa tuabu mêba adibu kabayi mu tulasa to.”

Mushinga udi nawu dilongesha

Patudi tulongesha bana mua kuyisha, tudi tubambuluisha bua kuleja mudibu banange Nzambi. Mark udi musombele mu États-Unis udi wamba ne: “Tudi basue bua bana betu bamanye ne: badi ne bua kuyisha dîba dionso, ki nganu padibu bavuale bimpe bua kuya mu buambi to. Ke bualu kayi, patutu tuya bua kujikija lutetuku bu mudi miaba idibu balengeje bimpe ne bilongo, ku tshitudilu tshia mazuwa anyi muitu, tutu tuambula Bible ne mikanda yetu ne tuyisha bantu batudi tusangana miaba ayi. Bana betu ba balume batu basue kuyisha netu mushindu eu bikole. Batu bakula pabu patudi tuyukila ne bantu bua kujikula ditabuja diabu.”

Pakavua mupostolo Yone mukulakaje, wakambuluisha bantu ba bungi bua kunangabu Nzambi bikole. Wakabafundila wamba ne: ‘Tshiena ne disanka didi dipita edi bunene, bua meme kumvua ne: Bana banyi [mu Kristo] badi benda mu bushuwa.’ (3 Yone 4) Tuetu bambuluishe bana betu balela bua kunanga Nzambi ne muoyo mujima, netumvue petu disanka dia buena edi.

[Mêyi adi kuinshi]

[Bimfuanyi mu dibeji 9]

Bidi bikengela kudilongolola bua kuyukila malu a Nzambi ne bana ne muoyo mujima

[Tshimfuanyi mu dibeji 10]

Longesha muanebe bua aleje mudiye munange Nzambi

[Mêyi a dianyisha]

Ne dianyisha dia Green Chimneys Farm