Mfumu mubanji udi wangata dipangadika dibi

MFUMU eu utshivua nsonga uvua muntu wa muoyo muimpe, utumikila mikenji ya Nzambi ne umutendelela kabidi. Wakalua kudi Yezu, kutua binu kumpala kuende ne kumuebeja ne: ‘Muyishi, nengenze bualu buimpe kayi, mpete muoyo wa tshiendelele?’

Yezu wakamuleja ne: bua kupeta muoyo bidi bikengela kutumikila mikenji ya Nzambi. Pakalombaye Yezu bua amuleje patoke mikenji ayi, ke yeye kumuambila ne: ‘Kushipi muntu, kuendi masandi, kuibi, kudingidi muntu, unemeke tatuebe ne mamuebe, sua mukuenu bu muudi mudisue.’ Eyi ke mikenji minene ivua mu Mikenji ivua Nzambi mupeshe Mose. Muntu kuamba pashishe ne: ‘Ngakenzenza malu aa onso; mbualu kayi budi bunshala?’​—Matayo 19:16-20.

Yezu “wakamunanga” ne kumuambila ne: ‘Bualu bumue mbukushala; ya biebe, upane biudi nabi bionso, ubipe bantu bapele, newikale ne bintu mu tshibutshilu mu diulu, ulue kundonda meme.’​—Mâko 10:17-21.

Diakamue, nsongalume mubanji kudimona kumpala kua dipangadika dinene. Ntshinyi tshivuaye ne bua kuenza? Uvua ne bua kuabanya bintu biende ne kulua kulonda Yezu, anyi uvua ne bua kubilama? Uvua ne bua kutungunuka ne kukeba bubanji bua pa buloba anyi bua mu diulu? Divua dipangadika dikole kudiye. Bivua bimueneka muvua muntu eu munange malu a Nzambi, ukavua utumikila mikenji yende ne uvua ukeba bua kumanya tshikuabu tshia kuenza bua Nzambi amuanyishe. Kadi ndipangadika kayi diakangataye? ‘Wakabungama, wakaya unyingalala; bualu bua yeye wakadi ne bintu bia bungi.’​—Mâko 10:22.

Dipangadika divua mukalenge eu utshivua nsonga muangate divua dibi. Bu yeye mulue muyidi wa Yezu wa lulamatu, uvua mua kupeta muoyo wa tshiendelele uvuaye ukeba. Ki mbatuambile tshiakenzekela nsongalume eu to. Kadi tudi bamanye ne: panyima pa bidimu makumi anayi, biluilu bia bena Lomo biakalua kubutula Yelushalema ne tshitupa tshinene tshia Yudaya. Bena Yuda ba bungi bakajimija bintu biabu ne bakuabu bakafua.

Kadi mupostolo Petelo ne bayidi bakuabu bakangata bobu dipangadika dimpe. ‘Bakashiya malu onso,’ kulonda Yezu. Dipangadika edi diakabambuluisha bikole be! Yezu wakabambila ne: bavua ne bua kupeta bintu bia bungi kupita bivuabu bashiye. Kabidi, bavua ne bua kupeta muoyo wa tshiendelele. Kabavua mua kulua kunyingalala pashishe bua muvuabu bangate dipangadika adi to.​—Matayo 19:27-29.

Tuetu bonso tutu tuangata mapangadika makese ne manene. Mmibelu kayi ivua Yezu mufile bua mapangadika aa? Newitabaku mibelu yende anyi? Wewe muyitabe, neupete mabenesha a bungi. Tumonayi mpindieu mushindu utudi mua kulonda Yezu ne kupeta dikuatshisha ku bivuaye muambe.