Semena pabuipi ne Nzambi

“Nzambi wa busambi buonso”

2 Kolinto 1:3, 4

KUDI bintu bia bungi mu nsombelu bitu bibungamija ne bitekesha bantu ku muoyo bu mudi: ntatu ne makenga, dipangila dia bitudi tukeba ne dishala nkaya. Mu bikondo bia mushindu eu udi pamuapa mua kudikonka ne: ‘Nkuepi kundi mua kupetela diambuluisha?’ Mêyi a mupostolo Paulo adi mu 2 Kolinto 1:3, 4 adi atuleja ne: Yehowa Nzambi ke musambi munene wa bantu udiku.

Udi ubikila Nzambi mu mvese 3 ne: “Tatu wa luse” luvule. Mbuena kuamba tshinyi? Muaku wa tshiena Greke udibu bakudimune ne: “luse” luvule udi umvuija kuikale ne muoyo udi umvuila bakuabu padibu mu makenga.a Mukanda mukuabu udi wakula malu a mu Bible udi uleja ne: muaku eu badi mua kuukudimuna ne: “kumvua luse” anyi “kuditatshisha bikole bua.” Nunku, “luse” luvule lua Nzambi ke lutu lumusake bua kuambuluishangana. Dimanya dia se: Nzambi utu muena luse didi ditusake bua kusemena pabuipi nende.

Paulo udi kabidi wamba bua Yehowa ne: “Nzambi wa busambi buonso.” Muaba eu, Paulo udi wenza mudimu ne muaku udi ufila lungenyi lua “kusamba muntu kampanda udi ne kanyinganyinga anyi lutatu ne lungenyi lua kumukolesha.” Bible mukuabu udi wamba ne: “Tudi tusamba muntu udi ne lutatu patudi tumukolesha bua kulutantamena.”​—The Interpreter’s Bible.

Udi mua kudiebeja ne: ‘Mmunshindu kayi udi Nzambi utusamba ne utupesha bukole bua kutantamena makenga etu?’ Udi wenza nanku ku diambuluisha dia Bible udi Dîyi diende, ne dia disambila. Paulo udi utuambila ne: Nzambi mmutupesha ne dinanga dionso Dîyi diende bua se: ‘tuetu tuikale ne ditekemena bua busambi bua mu Mukanda wa Nzambi.’ Pa kumusha Bible, ku diambuluisha dia disambila tudi kabidi mua kupeta “ditalala dia Nzambi didi ditamba dijingulula dionso dia bantu.”​—Lomo 15:4; Filipoi 4:7.

Mmisangu bungi munyi itu Yehowa usamba bantu bende? Paulo udi wamba ne: Nzambi “utu watusamba mu makenga etu onso.” (2 Kolinto 1:4) Nzambi udi mua kutupesha bukole budi bukumbane ne dikima didi mua kutuambuluisha bua kutantamena kanyinganyinga kuonso anyi lutatu luonso lutudi mua kupeta. Bualu ebu kabuenaku bukukoleshe anyi?

Busambi bua Nzambi kabutu bujika padiye usamba muntu umue to. Paulo udi utungunuka wamba ne: Nzambi udi utusamba bua “tuetu tumanye mua kusamba bakuabo mu makenga abo onso ne busambi butudi tusambibua kudi Nzambi.” Tuetu bamane kupeta busambi mu makenga etu, busambi ebu budi butuambuluisha bua kumvuila bakuabu luse ne butusaka bua kubambuluisha pabu mu makenga abu.

Nansha mudi Yehowa “Nzambi wa busambi buonso,” kena utumbushile ntatu ne makenga bitudi nabi to. Kadi, mu bualu ebu tuikalayi bashindika ne: Tuetu baye kukeba busambi kudiye, udi utupesha bukole bua kupita ne tunyinganyinga anyi lutatu luonso lua mu nsombelu. Nzambi wa luse wa mushindu eu mmukumbane bua tuetu kumutendelela ne kumutumbisha.

[Mêyi adi kuinshi]