Disambibua dia kudi “Nzambi wa disambibua dionso”

“Mubeneshibue ikale Nzambi ne Tatuende wa Mukalenge wetu Yezu Kristo, Tatu muena luse luengeleki ne Nzambi wa disambibua dionso, udi utusamba mu makenga etu wonso.”​—2 KOLINTO 1:3, 4, NW.

1, 2. Ndisambibua dia mushindu kayi didi bena kanyinganyinga bakengela?

BANTU bena kanyinganyinga batu bakengela disambibua dilelela​—ki mbiakulakula anyi mêyi matundubila to. Tukadi buonso buetu bumvue bakula ne: ‘Mu kupita kua matuku, kamana kamana mputa neume,’ kadi ku ntuadijilu menemene kua tshinyongopelu, lungenyi alu ludi mua kusamba muena kanyinganyinga anyi? Bena nkristo mbamanye se: Nzambi mmulaye dibiishibua ku lufu, kadi ebi kabiena biepula ditapibua dinene ku mutshima ne dilubakana bua dijimija kampanda dia mu tshimpitshimpi to. Bushuwa, biwikale mujimije muanebe, bakuabo badi bashale ne muoyo kabena mua kupingana pa muaba wa eu wa mushinga mukole udi mufue nansha.

² Padi munangibue kampanda ufua, tudi tupetela diambuluisha ku disambibua dilelela, disambibua didi diashila pa malaya a Nzambi. Tudi kabidi tukengela bua bantu batumvuile luse. Ke mudibi bikengela bua bena mu Rwanda, ne nangananga bua nkama ne nkama ya mêku a Bantemu ba Yehowa adi majimije banangibue babo mu kabutu aka ka tshikisu pankatshi pa bisa. Aba badi mu kanyinganyinga badi mua kupetela disambibua kudi nganyi?

Yehowa​—Nzambi wa disambibua

3. Mmunyi mudi Yehowa mufile tshilejilu mu disambangana?

³ Yehowa mmufile tshilejilu mu disamba yonso wa kutudi. Wakatuma Muanende mulela umuepele, Yezu Kristo, pa buloba bua kutupetesha disambibua ne ditekemena bia tshiendelele. Yezu wakalongesha ne: “Nzambi wakananga bantu bikole e kubapa Muanende umu’epele bua muntu yonso udi wenza midimu ya ditabuja kudiye kabutudibu, kadi apete muoyo wa kashidi.” (Yone 3:16, NW) Wakambila kabidi bamulondi bende ne: “Muntu nansha umue kêna ne dinanga dinene kupita edi: bua muntu kampanda kufila anyima wende bua balunda bende.” (Yone 15:13, NW) Mukuabo musangu wakamba ne: “Bia muomumue, Muana wa muntu mmulue, ki mbua kumusadilabo, kadi mbua kusadilangana ne kufila anyima wende bu tshia-bupikudi bua dishintakajibua dia ba bungi.” (Matayi 20:28, NW) Ne Paulo wakamba ne: “Nzambi wakaleja dinanga diende kutudi, bualu patutshivua benji ba mpekatu, Kristo wakatufuila.” (Lomo 5:8, NW) Ku mvese eyi ne ku mikuabo mivule, tudi tujingulula dinanga dia Nzambi ne dia Kristo Yezu.

4. Bua tshinyi mupostolo Paulo uvua nangananga ne dibanza kudi Yehowa?

⁴ Mupostolo Paulo, mu mushindu wa pa buawu mmumanye bulenga bukena butuakanyine bua Yehowa. Wakapikudibua ku ngikadilu mufue wa mu nyuma, wa dikala mukengeshi wa balondi ba Kristo wa tshikisu bua kulua yeye muine muena nkristo mukengeshibue. (Efeso 2:1-5) Udi utulondela malu akamonaye: ‘Bualu bua meme ndi muntu mutambe kupuekela munkatshi mua bapostolo, udi kayi ne buimpe bua kumbikilabo mupostolo, bualu bua ngakakengesha ekleziya wa Nzambi. Kadi bua bualu bua [bulenga bukena butuakanyine, NW] bua Nzambi ndi bu mundi emu; ne [bulenga bukena butuakanyine] buende kundi kabuakalua patupu, bualu bua meme ngakatamba buonso buabo kuenza mudimu; kadi ki mmeme nkayanyi, kadi [mbulenga bukena butuakanyine, NW] bua Nzambi buvua nanyi.’​—1 Kolinto 15:9, 10.

5. Ntshinyi tshiakafunda Paulo pa disambibua dia kudi Nzambi?

⁵ Pashishe, mu mushindu muakanyine, Paulo wakafunda ne: “Mubeneshibue ikale Nzambi Tatuende wa Mukalenge wetu Yezu Kristo, Tatu muena luse luengeleki ne Nzambi wa disambibua, udi utusamba mu makenga etu wonso, bua tumone mua kusamba aba badi mu makenga kayi wonso ku disambibua dia kudi Nzambi ditudi tuetu bine basambibue nadi. Bu mudi makenga bua Kristo muule munda muetu, ke mudi disambibua ditudi tupeta ku butuangaji bua Kristo diûle padi munda muetu. Mpindieu nansha tuetu mu makenga, bionso ebi bidi’anu bua disambibua ne lupandu bienu; peshi nansha tuetu basambibue, bidi’anu bua disambibua dienu didi dinuambuluisha bua kuakama makenga a muomumue anudi penu nupeta. Ne ditekemena dietu bualu buenu ndishindame, bamanye se: bu munudi nuabanyangana netu makenga, bia muomumue nenuabanyangane netu disambibua.”​—2 Kolinto 1:3-7, NW.

6. Ntshinyi tshidi muaku wa tshiena-Greke mukudimuna “disambibua” umvuija?

⁶ Mmêyi kayipu adi alenga mutshima! Muaku wa tshiena-Greke mukudimuna apa “disambibua” udi mu diumvuangana ne “dibikidibua bua kuikala ku luseke lua muntu kampanda.” Pa nanku, “nkuimana ku luseke lua muntu kampanda bua kumukankamija padiye mu diteta dikole.” (A Linguistic Key to the Greek New Testament) Mushikuluji kampanda wa Bible wakafunda ne: “Muaku eu . . . utu pa tshibidilu umvuija bivule kupita luse patupu. . . . Disambibua dia bena nkristo ndisambibua ditu dituala bukitu, disambibua ditu diambuluisha muntu bua kumona mua kupita ne ntatu yonso ya mu nsombelu.” Ditu kabidi ditangila mêyi masambi adi mashila pa dilaya dishindame ne ditekemena​—mbuena kuamba ne: dilaya dia dibiishibua ku lufu.

Yezu ne Paulo​—Basambianganyi bena luse

7. Mmunyi muvua Paulo muikale musambi kudi bana babo bena nkristo?

⁷ Ntshilejilu kayipu tshia mpatshi tshiakashiya Paulo pa bidi bitangila disambangana! Wakafundila bana betu mu Tesalonike ne: “Kadi, tudi balue bapole-malu munkatshi muenu, amu bu mutu mamu ukuba bana bende badiye udiisha. Nunku, bua dinanga dikole dituvua nadi kunudi, tuvua ne disanka dia kunumanyisha, ki ng’amu lumu luimpe lua Nzambi, kadi ne anyima yetu popamue, bualu nuakalua banangibue betu. Bia muomumue, nudi bamanye bimpe bua se: anu bu tatu bua bana bende, tuakatungunuka ne kukankamija yonso wa kunudi, tuakanusamba ne tuakafila bumanyishi kumpala kuenu.” Anu bu mutu baledi banangi ne batabaledianganyi, yonso wa kutudi udi mua kuabanyangana musangelu ne diumvuilangana bietu ne bakuabo mu tshikondo tshiabo tshia dikengedibua.​—1 Tesalonike 2:7, 8, 11, NW.

8. Bua tshinyi malongesha a Yezu adi disambibua kudi bena kanyinganyinga?

⁸ Mu dileja ditabalelangana ne bulenga bia mushindu’eu, Paulo uvu’anu widikija Yezu, Tshitembelu tshiende tshinene. Uvuluka dibikila dileji luse divua Yezu mualabajile yonso wa kutudi didi mu Matayi 11:28-30 (NW): “Vuayi kundi meme, nuenu buonso badi bakenga ne bazengele ne majitu, ne meme nennukankamije. Angatayi bujitu buanyi ne nulongele kundi meme, bualu ndi mupole-malu ne mudipuekeshi mu mutshima, ne nenupete dikankamijibua bua anyima yenu. Bualu tshikokedi tshianyi ntshitekete ne bujitu buanyi mbupepele.” Eyowa, malongesha a Yezu adi akankamija bualu adi afila ditekemena ne dilaya​—mbuena kuamba ne: dilaya dia kubiishibua ku lufu. Edi nditekemena ne dilaya ditudi tupesha bantu, tshilejilu, patudi tubashila broshire wa Quand la mort frappe un être aimé (Padi muntu uudi munange ufua). Ditekemena edi didi mua kuambuluisha yonso wa kutudi, nansha bituikala ne kanyinganyinga kukadi mutantshi mule.

Mushindu wa kusamba aba badi mu kanyinganyinga

9. Bua tshinyi katuena ne bua kuikala ne zukuzuku kudi bena kanyinganyinga?

⁹ Kanyinganyinga kakatu kajika diakamue kunyima kua lufu lua munangibue wetu. Bamue bantu batu bashala ne kanyinganyinga matuku wonso a muoyo wabo, nangananga [baledi] badi bajimije bana. Bena dibaka kampanda babidi bena nkristo ba lulamatu ku Espagne bakafuisha muanabo wa balume wa mvula 11 mu 1963 bua disama dia méningite (disama dia lutatu lua buongo). Too ne ku lelu, batshidi’anu bapuekesha binsonji patubo batela muanabo Paquito. Mifikilu, foto, bivulukidi, bidi mua kutalula malu adi abungamija. Nenku, katuena ne bua kuikala ne luzuku ne kuela meji se: kanyinganyinga ka bakuabo kakebesha kudi dijimija diabo kadi mua kujika diakamue nansha. Ba-minganga badi bajadika se: “Kanyinganyinga ne tshilunji tshitu tshishintuluka bidi mua kushala bidimu bivule.” Pa nanku, uvuluka se: anu bu mutu tshibangu mua kushala pa mubidi wetu matuku etu wonso a muoyo, ke mudi bibangu bia nyanji ya munda bishala pabio.

10. Ntshinyi tshitudi ne bua kuenza bua kuambuluisha bena kanyinganyinga?

¹⁰ Mbimue bintu kayi bimpe bitudi mua kuenza bua kusamba bena kanyinganyinga badi mu tshisumbu tshia bena nkristo? Ne muoyo mujima, tudi mua kuambila muanetu wa bakaji anyi wa balume udi ukengela disambibua ne: “Padiku tshintu kampanda tshindi mua kuenza bua kukuambuluisha, ungambile.” Kadi mmisangu bungi munyi idi mufuishe mumane kutubikila ne kutuambila ne: “Mvua muele meji pa tshintu kampanda tshiudi mua kuenza bua kungambuluisha”? Bushuwa, tudi ne bua kudianjila kuenza tshintu kampanda tshiakanyine bituasua kusamba mufuishe. Nenku, ntshintu kayi tshimpe tshitudi mua kuenza? Apa tudi ne ngenyi mikese mipatuishi ya bipeta bimpe.

11. Mmunyi mudi diteleja dietu mua kuikala disambibua kudi bakuabo?

¹¹ Teleja: Bumue bua ku malu mambuluishi awudi mua kuenza nkuabanyangana bisama ne mufuishe pa kuteleja. Udi mua kumuebeja ne: “Udiku musue kuyukila pa bualu ebu anyi?” Shila muntu mpunga bua apangadije. Muena nkristo kampanda udi uvuluka pakafua tatuende ne: “Bulelela biakangambuluisha menemene pavua bakuabo bangebeja tshivua tshienzeke ne pashishe banteleja menemene.” Anu bu muakabela Yakobo, teleja ne lukasa luonso. (Yakobo 1:19) Teleja ne lutulu ne bulenga buonso. “Nudile ne badi badila,” ke mudi Bible utuma dîyi mu Lomo 12:15. Vuluka se: Yezu wakadila pamue ne Marthe ne Mariya.​—Yone 11:35.

12. Ndijadikila dia mushindu kayi ditudi mua kupetesha bantu badi mu madilu?

¹² Petesha dikoleshibua ku muoyo: Uvuluka se: muntu udi mufuishe udi mua kudiumvua bu mupie tshibawu pa kuela meji se: kuvua pamu’apa bintu bivule bivuaye mua kuikala muenze. Umujadikila se: mmuenze pamu’apa bionso bivuaye mua kuenza (anyi tshintu kayi tshikuabo tshiudi mumanye ne: ntshilelela ne ntshimpe). Mushindikila se: mushindu udiye udiumvua ke utu bantu buonso badiumvua. Umumanyishe bakuabo bawudi mumanye bakumvua bilenga kunyima kua dijimija dia muomumue. Mu ngakuilu mukuabo, umumvuila ne uditeka pa muaba wende. Diambuluisha dietu dilenga didi mua kuenza bivule! Solomo wakafunda ne: “Anu bu bimuma bia pomme bia ngolo mu bitekelu bia argent, ke mudi dîyi diamba mu tshikondo tshiadi.”​—Nsumuinu 16:24, NW; 25:11; 1 Tesalonike 5:11, 14.

13. Bituadiakaja tuetu bine, mmunyi mudibi mua kuambuluisha?

¹³ Ikala mudiakaje: Udiakaje bua kumumuenekela ki ng’anu matuku makese a kumpala patshidi balunda ne balela bavule bikaleku, apo nansha munkatshi mua ngondo mivule kunyima pikalabi bikengedibua, dîba dikadi bakuabo batuadijilule midimu yabo ya buatshia-buila. Tshikondo tshia kanyinganyinga tshidi mua kushilangana bikole bitambe, bilondeshile muntu ne muntu. Ditabalelangana dietu ne diditeka dietu pa muaba wa bakuabo bia bena-nkristo bidi biambuluisha bikole mu tshikondo kayi tshionso tshia dikengedibua. Bible udi wamba ne: “Kudi mulunda udi utamba kulamatangana ne muntu kupita muanabo.” Nenku, mêyi aa a ne: “Batu bamanya mulunda muimpe mu tshikondo tshia dikenga,” mbulelela butudi ne bua kutumikila.​—Nsumuinu 18:24, NW; fuanyikija ne Bienzedi 28:15.

14. Ntshinyi tshitudi mua kuyukidilangana bua kusamba mufuishe?

¹⁴ Diyukidilangana pa ngikadilu mimpe ya mufue: Edi ndikuabo diambuluisha dinene difila mu tshikondo tshiakanyine. Londa tualu tuimpe tudi tutangila mufue eu tuudi uvuluka. Kuelakanyi bua kutela dîna dia mufue to. Kuenji anu bu se: mufue eu kavuaku peshi kavua ne mushinga nansha mukese. Bidi bikankamija bua kumanya biakambibua mu mukanda wa ku tshilongelu tshia Harvard Medical School: “Diondopibua kampanda didi dienzeka padi mufuishe, ndekelu wa bionso ufika ku divuluka mufue kakuyi ditatshishibua dibi . . . Padi bualu ebu bupiabupia buitabibua ne bumvuibua, bivulukidi bia mushinga mukole bidi bijimija kanyinganyinga.” “Bivulukilu bia mushinga mukole”​—mmunyipu mudibi bikankamija bua kuvuluka bikondo abi bia mushinga mukole bipitshisha pamue ne munangibue! Ntemu kampanda wakajimija tatuende kukadi bidimu bungi kampanda wakamba ne: “Bualu bua pa buabu bundi mvuluka ndibala Bible dituvua tuenza ne tatuanyi katupa kîpi kunyima kua dituadija diende dia dilonga dia bulelela. Ne bukuabo bundi mvuluka mbua patuvua tuyukidilangana pa ntatu yanyi ku muelelu wa musulu. Mvua mmonangana nende anu kunyima kua bidimu bisatu peshi binayi pamvua mpingana ku mbelu, nenku bikondo abi bivua bia mushinga mukole.”

15. Mmunyi mudi muntu mua kudianjila kuenza bualu kampanda bua kuambuluisha?

¹⁵ Udianjile kuenza bualu kampanda pabidi biakanyine: Bamue bena kanyinganyinga badi mua kumanya kusomba ne kanyinganyinga kupita bakuabo. Nenku, bilondeshile nsombelu kampanda, dianjila kuenza bualu kampanda bua kuambuluisha. Muena nkristo kampanda mukaji uvua mu kanyinganyinga wakavuluka se: “Bavule mu tshisumbu bakamba ne: ‘Padiku tshintu kansanga tshindi mua kuenza, ngambile.’ Kadi muena nkristo kampanda mukaji yeye kakebeja nansha. Wakaya buludiludi mu nzubu wa bulalu, wakumbusha bilamba bia pa bulalu bivua ne bukoya ne pashishe wakabisukula. Mukuabo pende wakangata mbeketshi, mâyi, ne bikuabo bintu bia kusukula nabi ne wakasukula muaba uvua bayanyi mulukile bilushi pa tapis wa panshi. Bushuwa, aba ke balunda ba pa muoyo, ne tshiena mua kubapua muoyo nansha kakese.” Padibi bikengela bushuwa diambuluisha, dianjila kuenza bualu kampanda​—pamu’apa pa kuipika biakudia, kukomba mu nzubu, anyi kuenza midimu kampanda idi ne dikuatshisha. Eyowa, tudi ne bua kutabalela bua katuikadi batondeshanganyi padi mufuishe usua bua amue malu ikale a ku lupengeleke. Nenku, tudi ne bua kuenza madikolela bua kutumikila mêyi a Paulo aa: “Nenku, bu basungula ba Nzambi, bansantu ne bananga, nuvuale dinanga dileji luse, ne buimpe, ne budipuekeshi bua mu tshieledi tshia lungenyi, ne bupole-malu ne muoyo-mule.” Bulenga, lutulu ne dinanga kabiakupita to.​—Kolosai 3:12, NW; 1 Kolinto 13:4-8.

16. Bua tshinyi mukanda anyi karte kadi ne tshimfuanyi kampanda bidi mua kupetesha disambibua?

¹⁶ Funda mukanda peshi tuma karte kampanda ka disambangana naku: Misangu mivule batu balengulula mushinga wa mukanda peshi karte kalengele bia dibasamba nabi bua madilu. Buimpe bua karte anyi mukanda ntshinyi? Bidi mua kubadibua misangu ne misangu. Mukanda wa mushindu’eu ki mbimpe wikale mule, kadi luse ludi ne bua kulejibuamu. Udi kabidi ne bua kufundibua ne malu a mu nyuma, kadi kawikadi wa dimulongesha nawu. Mukenji patupu wa nshindamenu “Tudi badiakaje bua kukuambuluisha” udi mua kuikala disambibua.

17. Mmunyi mudi masambila mua kutuala disambibua?

¹⁷ Sambila nabu: Kupepeji mushinga wa masambila ebe menza pamue ne bena nkristo nebe bafuishe ne menza buabo. Bible udi wamba mu Yakobo 5:16 ne: “Disengelela dia muntu muakane . . . didi ne bukole bua bungi.” Tshilejilu, padi muena kanyinganyinga uteleja tumusambidila, bitu bimumbushisha ngenyi mibi bu mudi ya didiangata bu mupie tshibawu. Mu bikondo bietu bia butekete, bia dilubakana, Satana udi wenza muende muonso bua kutunyanga ne “mbabi” yende anyi “bienzedi bia budimu.” Ke patutu tukengela disambibua ne dikuatshishibua dia ku masambila, anu bu muakamba Paulo ne: ‘Ku masambila a mishindu yonso ne misengelelu, nusambile mu bikondo bionso mu spiritu. Ne bua bualu abu, nushale batabale ne dinanukila dijima pamue ne misengelelu bua bansantu buonso.’​—Efeso 6:11, 18, nkudimuinu wa Kingdom Interlinear; fuanyikija ne Yakobo 5:13-15.

Bia kuepuka

18, 19. Mmunyi mutudi mua kuleja bukalanga mu mayukidilangana etu?

¹⁸ Padi muntu ne kanyinganyinga, kudi kabidi bimue bintu bikena kuamba anyi kuenza. Nsumuinu 12:18 (Mukanda wa Mvidi Mukulu) udi ubela ne: “Muena biakulakula udi utapa bantu ne meyi bu mudi muele wa nkanza, kadi meyi a bantu ba meji adi atalaja muntu.” Imue misangu kabiyi bijinguludibue, tutu tupanga bukalanga. Tshilejilu, tudi mua kuamba ne: “Ndi mumanye muudi udiumva.” Kadi ke mutubi anyi? Udiku pebe mumane kupetangana ne dijimija dia muomumue anyi? Pashishe, bantu batu bandamuna mishindu mishilangane. Ngandamuinu yebe kayivua pamu’apa ya muomumue ne ya bantu badi mu kanyinganyinga to. Bidi mua kuikala biakane bua kuamba ne: “Bushuwa ndi nkumvuila luse bualu meme panyi ngakatuilangana ne dijimija difuanangane ne diebe pakafua . . . wanyi kukadi bidimu bungi kansanga.”

¹⁹ Mbimpe kabidi kuepuka biakulakula bua kumanya mufue né neabiishibue anyi kakubiishibua ku lufu. Bamue bana betu ba balume ne ba bakaji bakatamba kutapibua ku muoyo bua biakulakula pa tshienzekela muena dibaka nabo uvua kayi muena kuitabuja wakafua. Katuena ne bukokeshi bua kukosa nsambu idi itangila babiishibua anyi babenga kubiishibua ku lufu. Tudi mua kusulakajibua pa kumanya se: Yehowa, eu utu umona mutshima, neikale ne luse luvule kupita ludi yonso wa kutudi mua kuikala nalu.​—Musambu wa 86:15; Luka 6:35-37.

Mvese idi ikankamija

20, 21. Ng’imue mvese kayi idi mua kusamba mufuishe?

²⁰ Umue wa ku mpokolo mitambe bunene ya dikankamija bafuishe, padiye mufidibue pa tshikondo tshiakane, ndiangata ne mushinga malaya a Yehowa pa bafue. Ngenyi eyi ya mu Bible neyikale ne dikuatshisha nansha mufuishe bikalaye Ntemu anyi muntu utudi tupetangana nende mu buambi. Ng’imue mvese kayi ya kudiyi? Tudi bamanye se: Yehowa udi Nzambi wa disambibua dionso, bualu wakamba ne: “Meme, meme mene nyeye udi unusamba.” Wakamba kabidi ne: “Bu mudi muntu udi mamu’andi usamba, nennusambe muomumue.”​—Yeshaya 51:12; 66:13.

²¹ Mufundi wa misambu wakafunda ne: “Edi ndisambibua dianyi mu dikenga dianyi, bualu dîyi diebe mene didi dindama ne muoyo. Ndi mvuluka mapangadika ebe a bu-ndumbulula kumbukila ku bikondo bikena bijadika, O Yehowa, ne ndi mpeta disambibua. Bu wewe mua kusua, bulenga-bunangi buebe bunsambe bilondeshile dîyi diwakambila musadidi webe.” Mona se: muaku “disambibua” mbawutele misangu ne misangu mu mvese eyi. Eyowa, tudi tuetu bine mua kupeta disambibua dilelela ne kudipetesha bakuabo pa kutangija ntema yetu ku Dîyi dia Yehowa mu tshikondo tshietu tshia dikenga. Bionso ebi bisangisha ne dinanga ne luse bia kudi bana betu, bidi mua kutuambuluisha bua kunanukila mu bisama bikebesha kudi dijimija dietu ne kuujilula tshiakabidi mioyo yetu ne bia kuenza bia disanka mu mudimu wa bena nkristo.​—Musambu wa 119:50, 52, 76, NW.

22. Nditekemena kayi didi ditutekela kumpala kuetu?

²² Tudi kabidi mua kutshimuna kanyinganyinga ketu mu bualabale kampanda pa kuikala ne bivule bia kuenza mu diambuluisha bakuabo mu tunyinganyinga tuabo. Patudi tutuma ntema yetu kudi bakuabo badi bakengela disambibua, tudi petu tupeta disanka dilelela dia kufila mu ngumvuilu wa mu nyuma. (Bienzedi 20:35) Tuabanyangane nabo tshimuenekelu tshia dituku dia dibiishibua ku lufu pikala bantu ba matunga wonso a kale, bipungu bia bantu bilondangane, mua kuakidila mu bulongolodi bupiabupia banangibue babo bakajimijabo, bumbukila ku lufu. Nditekemena kayipu! Mbinsonji kayipu bia disanka biapuekeshibua patuavuluka pashishe se: Yehowa udi bushuwa Nzambi ‘udi usamba aba badi bedibua panshi’!​—2 Kolinto 7:6.

Udi uvuluka anyi?

◻ Mmunyi mudi Yehowa “Nzambi wa disambibua dionso”?

◻ Mmunyi muvua Yezu ne Paulo basamba bena kanyinganyinga?

◻ Mbimue bintu kayi bitudi mua kuenza bua kusamba bena kanyinganyinga?

◻ Ntshinyi tshitudi ne bua kuepuka mu nsombelu wetu ne mufuishe?

◻ Mmvese kayi iwudi munange bua disambangana mu bikondo bia dijimija?

[Tshimfuanyi mu dibeji 15]

Ne bukalanga dianjila kuenza tshintu kampanda bua kuambuluisha bena kanyinganyinga