Nzambi utuku ungelela panyi meji anyi?
Mutu ba bungi bandamuna:
▪ “Nzambi mmupite bunene, kena mua kusomba anu bua kungelela meme meji bua ntatu yanyi to.”
▪ “Tshiena ngela meji ne: Utu pende untshiuka to.”
Kadi Yezu pende wakamba tshinyi?
▪ ‘Kabatu bapana mishamisha itanu ku makuta makese abidi anyi? Mushamusha umue kawena mupua muoyo ku mesu kua Nzambi. Nsuki ya ku mitu yenu mene idi mibala yonso. Kanutshinyi, mushinga wenu udi mutambe wa mishamisha ya bungi.’ (Luka 12:6, 7) Yezu uvua bushuwa mulongeshe ne: Nzambi utu utuelela meji.
▪ ‘Kanutambi kuelangana meji ne: netudie tshinyi? Netunue tshinyi? Netudiluatshishe tshinyi? Bisamba bia bende bidi bikeba bintu ebi bionso; Tatu wenu udi mu diulu udi mumanye ne: Nudi ne bintu ebi bionso bualu.’ (Matayo 6:31, 32) Yezu uvua mujadike ne: Nzambi mmumanye majinga a yonso wa kutudi.
BIBLE udi wamba mu tshikoso ne: Nzambi utu utuelela meji. (Musambu 55:22; 1 Petelo 5:7) Kadi pikalabi nanku, bua tshinyi tudi ne makenga bungi nunku lelu? Bikala Nzambi wa dinanga ne bukole buonso, bua tshinyi kena wenzaku mushindu wa kujikija makenga?
Mandamuna a nkonko eyi adi mu bualu butu bantu ba bungi kabayi bamanye to, bua se: Satana Diabolo ke udi ukokesha buloba bua malu mabi ebu. Pavua Satana mutete Yezu, wakamuleja makalenge onso a pa buloba ebu wamba ne: ‘Nenkupe bukokeshi ebu buonso ne butumbi bua makalenge au; bakamana kubumpa; muntu yonso undi musue kumupabu, nemmupebu.’—Luka 4:5-7.
Nnganyi uvua muteke Satana mukokeshi wa buloba ebu? Pavua bankambua betu Adama ne Eva batumikile mêyi a Satana bele Nzambi nyima, mu diamba dimpe bavua basungule Satana bua kubakokeshaye. Katshia anu dîba adi, Yehowa Nzambi wakangata lutulu bua kupitshisha tshikondo tshia kuleja ne: bukokeshi bua Satana mbupangile bupangidilemu. Yehowa ki mmutuenzeje tuetu bantu bua kumutendelela to, kadi mmutukanguile njila wa mua kupingana kudiye.—Lomo 5:10.
Bua dituvuluka dia Nzambi, mmulongolole malu bua Yezu kutusungila ku bukokeshi bua Satana. Mu matuku makese kumpala eku, Yezu ‘neamuvuije tshianana [yeye] udi ne bukole bua lufu, n’Diabolo mene.’ (Ebelu 2:14) Penzaye nanku, ‘neabutule midimu ya Diabolo.’—1 Yone 3:8.
Nebapingaje kabidi Mparadizu pa buloba apa. Tshikondo atshi, Nzambi ‘neakupule tshinsonji tshionso ku mêsu [kua bantu]; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’—Buakabuluibua 21:4, 5.a
[Mêyi adi kuinshi]
a Bua kumanya malu a bungi a tshidi Nzambi mulekele makenga panu, bala nshapita 11 wa mukanda wa Bible utu ulongesha tshinyi menemene? mupatula kudi Bantemu ba Yehowa.
[Lungenyi lunene lua mu dibeji 8]
Nebapingaje Mparadizu pa buloba apa