Bua tshinyi bantu badi ne tshibuejakaji bua nyuma muimpe?
NYUMA muimpe ntshinyi? Lukonko elu ludi lumueneka bu lutekete, kadi bua kupeta diandamuna dipepele mbikole. Pape Benoit XVI wakambila tshisumbu tshia bantu mu ditunga dia Australie ne: “Bibi bimueneka ne: katuena mua kumvua bimpe menemene tshidi nyuma to.”
Bantu badi ne ngenyi ya bungi ne kabena ne dishindika dia diandamuna dia lukonko lua ne: nyuma muimpe ntshinyi? Mandamuna adi alonda aa ke atu bamue bantu bafila:
• Mmuntu udi munda mua bayidi ba Kristo.
• Mmukenji wa Nzambi mu tshienzedi.
• Ndikalaku dia Nzambi mu tshienzedi pa buloba.
• Mmuntu muisatu wa mu Busatu bunsantu.
Bua tshinyi kudi dibuejakaja dia bungi? Divua dituadije mu bidimu bia 300 panyima pa Yezu, pavua bamue balongeshi ba malu a Nzambi balongeshe ne: nyuma muimpe uvua muntu udi mua kuikala imue misangu diatshimue ne Nzambi. Kadi dilongesha diabu edi kadiena mu Bible ne bayidi ba kumpala ba Kristo kabavua badilongesha to. Mukanda mukuabu udi wamba ne: “Dipungila dikulukulu kadiena dilongesha mudi nyuma wa Nzambi muikale muntu to . . . Nyuma wa Nzambi mbukole bua Nzambi.” (New Catholic Encyclopedia) Mukanda au udi usakidila ne: “Mvese ya bungi mu Dipungila dipiadipia idi ileja mudi nyuma wa Nzambi muikale tshintu, kadi ki mmuntu to; bidi bimueneka nangananga nanku patudi tufuanyikija nyuma ne bukole bua Nzambi.”
Bidi biumvuika bua tshinyi mbikolele bantu bua kumvua mudi bukole mua kuikala muntu. Ke bualu kayi, pavuabu bele bantu nkonko mu États-Unis matuku adi panshi aa, biakamueneka ne: “bantu ba bungi badi babenga lungenyi lua ne: nyuma muimpe mmuntu.” Mbambilamu anyi? Peshi tudi ne bua kuitaba malongesha a bena bitendelelu badi bamba ne: “Spiritu Munsantu mmuntu pende anu bu mudi Tatu ne Muana”?
Bua tuetu kupeta diandamuna dimpe, tudi ne bua kuya mu Bible Dîyi dia Nzambi, bualu udi umvuija bimpe tshidi nyuma muimpe. Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela.’—2 Timote 3:16.
Bua tshinyi udi ne bua kukeba bua kumanya bulelela pa bidi bitangila nyuma muimpe? Bualu bulelela abu budi mua kukuambuluisha bua wewe kupeta diambuluisha dia kudi Nzambi. Utuku udiumvua imue misangu kuyi ne bukole bua kutungunuka ne kutantamena makenga anyi? Yezu wakalaya bayidi bende ne: ‘Nulombe, nebanupe. Nunku nuenu binuamanya mua kupa bana benu bintu bimpe, Tatu wenu wa mu diulu kena upa batu bamulomba nyuma muimpe anyi?’—Luka 11:9, 13.
Mu biena-bualu bidi bilonda, netumone tshidi Bible wamba bua tshidi nyuma muimpe. Netumone kabidi mudiye mua kuikala bukole budi mua kutufikisha ku dienza malu mimpe mu nsombelu wetu.
[Lungenyi lunene lua mu dibeji 3]
Mukanda wa Nzambi udi utuleja tshidi nyuma muimpe