Nyuma muimpe ntshinyi?

DITUKU dikuabu Yezu wakakonka bayidi bende ne: ‘Ntatu kayi wa munkatshi muenu, biamulomba muanende mutanda wa bidia, neamupe dibue? Biamulombaye mushipa, neamupe nyoka? Muomumue, biamulombaye dikela, neamupe kaminyiminyi anyi?’ (Luka 11:11, 12) Bana ba mu Galela bavua basue kudia mayi ne mishipa; bavua bamanye bintu bitubu basue kudia.

Yezu wakamba ne: tudi ne bua kutungunuka ne kulomba nyuma muimpe anu mutu muana udi ne nzala ulomba biakudia. (Luka 11:9, 13) Kumanya tshidi nyuma muimpe nekutuambuluishe bua kumanya mudimu udiye nawu mu nsombelu wetu. Nunku tumonayi tshidi Bible wamba bua nyuma muimpe.

“Bukole bua udi Mutambe Bunene”

Bible udi uleja patoke ne: nyuma muimpe udi bukole budi Nzambi wenza nabu mudimu bua kukumbaja disua diende. Pavua muanjelu Gabaliele muambile Mariya ne: uvua ne bua kulela muana nansha mutshivuaye kamama, wakamuambila ne: ‘Nyuma muimpe nealue kuudi, ne bukole bua udi Mutambe Bunene wa mu diulu nebukubuikile bu ditutu; nebinyike muana wa tshijila uwalela ne: Muana wa Nzambi.’ (Luka 1:35) Bilondeshile miaku ya Gabaliele, kudi diumvuangana pankatshi pa nyuma muimpe ne “bukole bua udi Mutambe Bunene.”

Tudi tusangana lungenyi lua muomumue mu mvese mikuabu mu Bible. Muprofete Mika wakamba ne: ‘Ndi muule tente ne bukole, bua kudi nyuma wa Yehowa.’ (Mika 3:8) Yezu wakalaya bayidi bende ne: ‘Nuenu nenuangate bukole, panupuekela nyuma muimpe pambidi penu.’ (Bienzedi 1:8) Mupostolo Paulo pende wakakula bua “bukole bua nyuma muimpe.”​—Lomo 15:13, 19.

Nunku, ntshinyi tshitudi mua kuamba bua malu onso atudi tufume ku dimona aa? Kudi diumvuangana pankatshi pa nyuma muimpe ne bukole bua Nzambi. Nyuma muimpe ntshintu tshidi Yehowa ukuata natshi mudimu bua kuleja bukole buende. Mu tshikoso, nyuma muimpe mbukole budi Nzambi wenza nabu mudimu. Bukole ebu budi bukemesha! Katuena mua kumvua bukole buvua bukengela bua kufuka bintu bionso bidiku. Yehowa udi utusaka bua kuela meji ku butuangaji bua muprofete Yeshaya padiye wamba ne: ‘Bandishayi mêsu enu kulu numone bienu! Wakafuka bintu ebi nganyi? Nyeye udi upatula misumba yabi, ubala bungi buabi, ne udi ubibikila buonso buabi mu mêna abi; ne bualu bua bunene bua bukole buende, ne bualu bua bukole bua bukokeshi buende, kakuena umue wabi udi upanga kumueneka.’​—Yeshaya 40:26.

Ke bua tshinyi Bible udi uleja mudi bifukibua bia mishindu yonso ne diumvuangana didi munkatshi muabu bikalaku bua “bunene bua bukole,” anyi bukole bua Nzambi wa Bukole Buonso. Bushuwa bukole budi Nzambi wenza nabu mudimu mbunene butambe, ne tudi ne muoyo anu bua bualu buabu.​—Tangila malu adi mu kazubu ka ne: “Nyuma muimpe udi wenza mudimu.”

Yehowa udi mua kuenza mudimu ne nyuma muimpe bua kukumbaja malu manene bu mudi kufuka bintu bionso bidiku. Udi kabidi mua kuenza nende mudimu ku butuangaji bua bantu badiye mufuke. Mu Bible mudi bilejilu bia bungi bia muvua Nzambi mutumine bantu bukole buende.

‘Nyuma wa Nzambi udi pambidi panyi’

Mudimu wa Yezu udi utupesha ka diosha kimpe ka mushindu udi nyuma muimpe wa Nzambi mua kupesha basadidi bende bukole. Yezu wakambila bena mu Nazaleta ne: ‘Nyuma wa Nzambi udi pambidi panyi’. (Luka 4:18) Mmalu kayi avua Yezu muenze ne “bukole bua nyuma”? (Luka 4:14) Wakondopa masama a mishindu yonso, wakabatamija mavuala a mâyi manene, kudisha binunu bia bantu ne mampa makese ne mishipa ne kubisha too ne bafue. Mupostolo Petelo wakamba mudi Yezu ‘muntu mujadikibue kudi Nzambi, bua malu makole akenzaye ne malu a kukema ne bimanyinu biakamuenzeja Nzambi munkatshi muenu.’​—Bienzedi 2:22.

Lelu nyuma muimpe kena wenzeja malu bu mudi bishima to. Kadi udi mua kutuenzela malu kampanda atudi mua kumona. Yehowa udi upesha batendeledi bende nyuma wende ku budisuila anu bu muvua Yezu muambe. (Luka 11:13) Ke bua tshinyi, mupostolo Paulo wakamba ne: “Ndi mua kuenza bionso ebi mu dina dia Kristo udi umpesha bukole.” (Filipoi 4:13, MMM) Nyuma muimpe udiku mua kuenza bia muomumue mu nsombelu webe anyi? Tshiena-bualu tshidi tshilonda netshiandamune lukonko elu.

[Kazubu/​Tshimfuanyi mu dibeji 5]

Tshidi tshileja ne: nyuma muimpe ki mmuntu

Bible udi ufuanyikija nyuma muimpe ne mâyi. Pavua Nzambi ulaya bantu bende mabenesha bua matuku atshilualua, wakamba ne: ‘Nempongolole mâyi pa buloba budi kabuyi ne mâyi, nempatule misulu mu buloba budi buume; nengitshikije nyuma wanyi pambidi pa tunkanunuina tuebe.’​—Yeshaya 44:3.

Pavua Nzambi muitshikijile basadidi bende nyuma wende, ‘bakuula tente ne nyuma muimpe’ anyi ‘bakuujibua tente ne nyuma muimpe.’ Yezu, Yone Mubatiji, Petelo, Paulo, Bânaba, ne bayidi bavua pabu badisangishe mu dituku dia Pentekoste wa 33 bavua buule tente anyi bakuujibua tente ne nyuma muimpe.​—Luka 1:15; 4:1; Bienzedi 4:8; 9:17; 11:22, 24; 13:9.

Tuelayibi meji: badi mua ‘kuitshikija’ muntu pa bantu bakuabu ba bungi anyi? Udiku mua kuamba mudi muntu umue mua ‘kuula’ mu tshisumbu tshia bantu anyi? Kabiena biumvuika to. Bible utu wakula bua bantu bavua buule ne meji, bujinguludi ne dimanya dilelela, kadi katu wakula bua muntu kampanda uvua muule mu muntu mukuabu to.​—Ekesode 28:3; 1 Bakelenge 7:14; Luka 2:40; Kolosai 1:9.

Muaku wa tshiena-Greke udibu bakudimune ne: “nyuma” ngua pneuma, udi umvuija kabidi lungenyi lua bukole budi kabuyi bumueneka. Bilondeshile mukanda kampanda, muaku pneuma “udi umvuija tshia kumpala lupepele . . . udi umvuija kabidi mupuya; pashishe udi umvuija nangananga nyuma udi kayi umueneka bu lupepele ne udi ne bukole.”​—Vine’s Expository Dictionary of New Testament Words.

Mbimueneke patoke ne: nyuma muimpe ki muntu to.a

[Mêyi adi kuinshi]

[Mêyi a dianyisha]

Photodisc/​SuperStock