Dîna mu tshibandabanda
UKATUKU mumvue bakula bua Saint Moritz anyi? Bidi mua kuikala nanku bualu mmuaba muende lumu utu bantu baya kuikishila udi mu tshibandabanda tshia Engadine mu ditunga dia Suisse. Kadi Saint Moritz nkamue ka ku tu misoko katu bantu basue kumona kadi mu tshibandabanda etshi tshimpe, kadi kuinshi kua mikuna ya Alpes idi ne neje (anyi mabue a mashika) kulu kuayi idi ku mikalu kua ditunga dia Italie. Mmuaba udibu balamina nyama mu ditunga dia Suisse ne udi mitshi ya mishindu ne mishindu idi itumbisha mufuki wetu Yehowa. (Mus. 148:7-10) Nansha bishadila bia ku bintu bia kale bia mu bidimu bia 1600 ne pa mutu bidi bimutumbisha kabidi.
Kudi bualu bukuabu budi ku nzubu ya bungi idi mu tshibandabanda etshi budi mua kukoka ntema yebe. Bitu bipepele bua kupeta dîna dia Nzambi difunda ku mpala kua nzubu, bu mudi pamutu pa tshibi. Mu bidimu nkama bishale, bantu bavua ne tshibidilu tshia kulengeja pambelu pa nzubu ne mêna mafunda ne mukubu, anyi muondola ku bimanu nansha mu mabue. Tangila bimfuanyi bia nzubu ya mu musoko wa Bever. Miaku eyi idi yumvuija ne: “Nzubu eu mmuasa mu tshidimu tshia 1715. Yehowa ke ntuadijilu, ne Yehowa ke ndekelu. Malu onso adi enda anu bua Nzambi ne katuena mua kudienzela bualu to.” Bushuwa, mu mifundu eyi ya kale mudi dîna dia Nzambi misangu ibidi mijima.
Udi mua kumona mifundu mikuabu ya kale ya buena eyi mu musoko wa Madulain. Mifundu eyi idi yamba ne: “Musambu wa 127. Bikala Yehowa kayi wasa nzubu, badi bamuasa badi bakuata mudimu eu tshianana. Lucius Rumedius. Mu tshidimu tshia 1654.”
Bua tshinyi mbafunde dîna dia Nzambi patoke mushindu eu mu tshibandabanda etshi? Mu tshikondo tshivua malu mashintuluke bikole ku Mputu, bakapatula Bible mu muakulu wa Romanche uvuabu bakule mu Engadine, uvua mufuanangane ne wa Latin. Bible ke mukanda wa kumpala uvuabu bakudimune mu muakulu au. Malu avua bantu abu babale akabasaka bua kufunda mvese ya mu Bible ivua ne dîna dia Nzambi ku nzubu yabu kabidi ne abu mêna.
Bushuwa too ne lelu eu, mêyi avuabu bafunde au atshidi anu amanyisha dîna dia Yehowa ne amutumbisha nansha mukadiku bidimu nkama katshia baafunda pa nzubu. Batu bakidila bilenga benyi ne bena musoko badi basue kumanya bia bungi pa bidi bitangila Nzambi eu wa dikema Yehowa padibu baya ku nzubu udi ne dîna diende difundapu, tuamba ne: ku Nzubu wa Bukalenge wa Bantemu ba Yehowa wa mu Bever.
[Mêyi a dianyisha bua tshimfuanyi mu dibeji 7]
© Stähli Rolf A/age fotostock