Bua tshinyi Bantemu ba Yehowa batu bayisha ku nzubu ne ku nzubu?

▪ Tudi tupeta mu Bible mukenji wa Yezu uvuaye muelele bayidi bende eu: ‘Yayi bienu, nuvuije ba bisamba bionso bayidi, nubayishe.’ (Matayi 28:19, 20) Mukenji eu uvuaku utangila bena Kristo bonso anyi? Bayidi ba Yezu ba kumpala bavua bamanye ne: mukenji eu uvua utangila bena Kristo bonso. Tshilejilu, mupostolo Petelo wakamba ne: ‘Yezu wakatuambila bikole ne: nuambile bantu bualu ebu, nubamanyishe.’ (Bienzedi 10:42) Mupostolo Paulo wakafunda pende ne: ‘Bualu budi bunkuata bua kuluamba, bua ndi ne mulawu bingikala tshiyi ngambila bantu lumu luimpe.’​—1 Kolinto 9:16.

Ki nganu Paulo ne Petelo bavua batumikile mukenji wa Yezu, kadi nansha bena Kristo bonso ba mu bidimu lukama bia kumpala bavua pabu bautumikile. Bakateka mudimu wa kuyisha pa muaba wa kumpala mu nsombelu wabu. (Bienzedi 5:28-32, 41, 42) Ke tshidi Bantemu ba Yehowa baditatshisha bua kuenza pabu lelu. Badi bayisha mukenji uvua Yezu pende uyisha wa ‘Bukalenge bua mu diulu.’​—Matayi 10:7.

Mbanganyi badibu ne bua kuyisha lumu luimpe lua Bukalenge? Yezu wakaleja ne: bavua ne bua kuyisha bantu ba miaba yonso lumu luimpe elu. Wakambila bayidi bende ne: ‘Nenuikale bamanyi banyi ne kumfudilu kua buloba.’ (Bienzedi 1:8) Uvua mene mudianjile kuamba ne: kumpala kua ndongoluelu eu kufikaye ku ndekelu, ‘nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu.’ (Matayi 24:14) Bua kutumikila mukenji eu, bena Kristo ba mu bidimu lukama bia kumpala bakenza muabu muonso bua kuyukila ne bantu bonso, kabayi bayukila anu ne bantu bavuabu bamanyangane nabu anyi bavua kabayi mu tshitendelelu kampanda to. (Kolosai 1:23; 1 Timote 2:3, 4) Bia muomumue, Bantemu ba Yehowa lelu badi badienzeja bua kuyisha muntu yonso.a

Mmushindu kayi muimpe mutambe wa kumuangalaja mukenji wa Bukalenge? Bu muvua Yezu mumanye mushindu muimpe wa kuyisha bantu ba bungi, wakatuma bayidi bende mu bimenga, mu misoko ne ku nzubu ya bantu. (Matayi 10:7, 11, 12) Yezu mumane kufua ne mubike ku lufu, bayidi bende bakatungunuka ne kuyisha ‘ku nzubu ne ku nzubu.’ (Bienzedi 5:42) Anu bu Yezu, bavua pabu bayisha muaba wonso uvuabu bapetangana ne bantu ne mu miaba ivua bantu ba bungi. (Yone 4:7-26; 18:20; Bienzedi 17:17) Lelu eu Bantemu ba Yehowa batu benza pabu nunku bua kuyisha bantu bonso.

Yezu kakaleja ne: muntu yonso neateleje to. (Matayi 10:14; 24:37-39) Bualu ebu budiku mua kupangisha bena Kristo bua kuyisha anyi? Tuangate tshilejilu etshi: wewe muikale umue wa ku bantu badi baya bua kupandisha bantu badi tshikumina tshikole tshikuate, udiku mua kubenga kutungunuka ne kukeba bakuabu anu bualu nukadi bapandishe ndambu wa bantu anyi? Tòo, nenutungunuke ne kukeba too ne panuapete muntu nansha umue unudi mua kupandisha. Yezu wakambila bayidi bende bua kunanukila too ne papetabu bantu bikala mua kuitaba lumu luimpe lua Bukalenge bua Nzambi. (Matayi 10:23; 1 Timote 4:16) Padi Bantemu ba Yehowa bakeba bantu ba mushindu eu ku nzubu ne ku nzubu, badi baleja mudibu banange Nzambi ne bantu nabu badi mioyo yabu mua kupanda anu bobu bateleje mukenji wa Bukalenge ne bautumikile.​—Matayi 22:37-39; 2 Tesalonike 1:8.

Mukanda uudi ubala eu udi umvuija mukenji wa mu Bible. Bua kumanya malu makuabu, anyisha bua kuyukila ne Bantemu ba Yehowa musangu mukuabu uwapetangane nabu, anyi fundila bapatudi ba mukanda eu.

[Mêyi adi kuinshi]