Bisumbu Bilongolola Bua kumanyisha Bukalenge Bua Nzambi
Pavuaye pa buloba, Yezu Kristo wakamanyisha Bukalenge bua Nzambi ku musoko ne ku musoko, ne ku tshimenga ne ku tshimenga. Wakalongesha kabidi balongi bende bavuaye utuma bua kuenza mudimu wa muomumue. Kumpala kua kubandaye mu diulu, wakabatumina dîyi dia kuvuija bantu ba mu bisamba bionso balongi. Ku ntuadijilu watshi, tshisumbu tshia bena nkristo ba kumpala tshivua tshilongolola bua kumanyisha lumu luimpe. Mu miaba yonso ivua balongi baya, bavua babasangana benda bamanyisha Bukalenge bua Nzambi.—Matayi 4:17, 23; 10:1-16; 28:19, 20; Luka 4:43, 44; 8:1; 10:1-9; Bienzedi 1:8; 4:31; 5:42; 8:12; 19:8; 28:23, 30, 31; Lomo 10:9, 10, 14.
Mu mulayi wa Yezu uvua utangila nshikidilu wa bulongolodi bua malu, wakamanyisha ne: “Nebambile bantu buonso ba pa buloba lumu luimpe elu lua bukalenge [buanyi], neluikale tshimanyishilu ku bisamba bionso; pashishe, nshikidilu nealue.” Mudimu eu wa buambi ke tshintu tshia kumpala tshidi tshisumbu tshia bena nkristo ne bua kukumbaja lelu’eu.—Matayi 24:14; Mako 13:10.
Pa buloba bujima, bisumbu bia Bantemu ba Yehowa mbilongolola bua kukumbula bijengu biabo bua kumanyisha lumu luimpe lua Bukalenge bua Nzambi. Bua malu wonso kuenzekawo mu bulongame, mu ditunga dionso filiale wa Société Watch Tower udi wabanya bijengu kudi tshisumbu tshionso. Tshisumbu tshionso tshidi tshiabanya tshijengu etshi mu bitupa bikese bidibo bapesha bamanyishi badi ne bujitu bua kutabalela bua bantu buonso badi mu tshijengu kupetabo bumanyishi.—1 Kolinto 14:33, 40.
Pa tshibidilu, Bantemu badi bakumbula bantu ku nzubu ne ku nzubu. Mu bisangilu bia tshisumbu tshiabo, mbalonge mua kumanyisha mu mêyi makese mukenji wa Bukalenge ku tshiibi ne ku tshiibi pa kuenza mudimu ne Bible. Muntu udi musue kuvudija dimanya diende dia Dîyi dia Nzambi, badi bamushila mikanda idi yumvuija Bible.
Bua muntu yonso udi mu tshijengu kupeta mushindu wa kuteleja mukenji wa Bukalenge, padibo baya ku nzubu ne ku nzubu, Bantemu badi bafunda biakane mêna a bantu badi kabayiku ne a aba badi kabayi bapete mukenji mu kabujima kawo bua mapumbisha kampanda. Badi babakumbula mu dituku dikuabo. Padi muntu usankidila mukenji, badi bafunda dîna diende pa dibeji bua kumupinganyina bua kumutuadila malongesha makuabo a mu Bible. Muntu udi musue udi mua kupeta dilonga dia Bible ku nzubu. Kena ufuta tshintu nansha tshimue.
Mu matunga makuabo, Bantemu ba Yehowa badi baleja bibejibeji kudi bena njila mu misesu. Nunku, badi mua kumonangana pamue apa ne bantu badibo kabayi basangana ku mabo. Badi benza madikolela menemene bua kututakena ne muntu yonso udi musue kuteleja.—Bienzedi 17:17; Buakabuluibua 14:6, 7; 22:17.
Bua tshinyi Bantemu badi batungunuka ne dikumbula bantu padi bavule ba kudibo kabayi baleja dijinga nansha dikese. Imue misangu nsombelu udi mua kushintuluka; bamue badi banyisha ne disanka mu dikumbula dikuabo. Misangu mikuabo, muena mu dîku kampanda udi mua kulua ku tshiibi bua kuteleja mukenji.
Yezu wakambila balongi bende: “Tungunukayi ne dikeba diambedi bukalenge ne buakane buende.” Dimanyisha dia Bukalenge bua Nzambi didi ne mushinga mutambe bua kukeba diambedi Bukalenge, kabidi Bantemu ba Yehowa badi babuangata bu tshipatshila tshia kumpala mu nsombelu wabo.—Matayi 6:33; 2 Timote 4:2.
• Bilondeshile mulayi, mmudimu kayi uvua Yezu muenze ne balongi bende ba kumpala udi ne bua kuenjibua lelu’eu?
• Mmushindu kayi udi mudimu wa buambi wa Bantemu ba Yehowa mulongolodibue?
• Bua tshinyi Bantemu badi batungunuka ne dikumbula bantu padi bavule ba kudibo kabayi basankidila mukenji nansha kakese?
[Miaku miumvuiji ya tshimfuanyi pa dibeji 16]
Bantemu ba Yehowa badi bamanyisha Bukalenge bua Nzambi mu matunga mavule
Thaïlande
Mexique
Pays-Bas
Corée
[Miaku miumvuiji ya tshimfuanyi pa dibeji 17]
Curaçao
Ghana
Angleterre
Australie