Kudiku muntu udi uteleja masambila anyi?

Patriciaa wa mu ditunga dia Irlande udi wamba ne: “Mvua ngela mpata bua dikalaku dia Nzambi. Kadi imue misangu mvua nsambila. Tshivua mutuishibue ne: kuvua muntu uvua uteleja masambila anyi, kadi mvua mamanye ne: kuvua muntu uvua uateleja. Tshivua ne disanka to, ne tshivua ne tshipatshila nansha tshimue mu nsombelu wanyi. Mvua ngumvua buôwa bua kuitaba ne: Nzambi udiku bualu mvua ngela meji ne: anu bantu badi ne butekete ke bavua bitabuja ne: Nzambi udiku.”

BIKADIKU bikufikile bua kuela meji bu Patricia anyi? Utuku usambila nansha muudi kuyi witaba ne: Nzambi udiku anyi? Biobi nanku, kuena nkayebe to. Tukonkonone malu adi alonda aa.

◼ Pa bantu 2 200 bavuabu bele nkonko mu ditunga dia Grande-Bretagne, anu bantu 22 pa lukama ke badi bitaba ne: kudi Nzambi wakafuka buloba ne udi uteleja masambila. Mu bantu bavuabu bele nkonko abu, bantu 55 pa lukama bavua baleje ne: batu basambila mu mpukapuka.

◼ Pa bantu 10 000 bavuabu bele nkonko mu bitupa binene binayi bia pa buloba, bantu 30 pa lukama badi bamba ne: Nzambi katuku ke batu basambila.

Bantu badi ne mpata bua tshinyi?

Muntu mukuabu wa mu ditunga dia Angleterre diende Allan udi wamba ne: “Mvua ne tshibidilu tshia kuamba ne: tshiakuitaba ne: Nzambi udiku bualu mvua ngela meji ne: mbenze bitendelelu bua kukokesha bantu ne kubadia mfranga. Mvua ngela meji kabidi ne: bu Nzambi muikalaku, malu mabi kaavua mua kuikalaku bungi nunku to. Kadi imue misangu mvua ndisombela nkayanyi ne ntuadija kuakula mu ‘lupepele.’ Mvua kabidi ndiebeja ne: ‘Bua tshinyi ndi mulue muaba eu?’”

Muntu yonso udi ne meji a buena aa udi ne ende malu adi amufikisha bua kudiebeja ni kudi muntu udi mua kuandamuna masambila. Misangu ya bungi, bantu badi mua kupeta lungenyi lua mpata padibu kabayi bapeta mandamuna a nkonko bu mudi idi ilonda eyi:

◼ Kudiku Mufuki anyi?

◼ Bua tshinyi misangu ya bungi bitendelelu bitu bienza malu mabi?

◼ Bua tshinyi Nzambi mmulekele makenga?

Wewe mupete mandamuna a nkonko eyi, newanyishe bua kuikala usambila anyi?

[Mêyi adi kuinshi]