Yezu ke udi mua kutupetesha muoyo udi ne tshipatshila

YEZU uvuaku ne muoyo udi ne tshipatshila anyi? Uvua mukolele mu dîku dia bantu bapele, ne kavua ne bintu bia bungi mu nsombelu wende wa pa buloba apa to. Kavua nansha ne “muaba wa kuteka mutu” to. (Luka 9:57, 58) Bavua kabidi bamukine, bamushiminyine malu ne ndekelu wa bionso kumushipabu kudi baluishi bende.

Udi mua kuamba ne: ‘Nsombelu wa buena eu kena mua kuikala ne tshipatshila to.’ Kadi kudi malu a bungi adi atangila nsombelu wa Yezu atudi mua kumanya bimpe. Tukonkonone malu anayi.

1. YEZU UVUA NE TSHIPATSHILA TSHIA KUENZA DISUA DIA NZAMBI.

“Biakudia bianyi nkuenza disua dia udi muntume.”​—Yone 4:34.

Mu mêyi ne mu bienzedi biende, Yezu uvua udienzeja bua kuenza disua dia Yehowa,a Tatuende wa mu diulu. Bivua bienza Yezu disanka bua kuenza disua dia Nzambi. Uvua ufuanyikija kuenza nunku ne biakudia anu bu mudibi bileja mu mvese utudi tufuma kuditela. Tukonkononayi dîba diavuaye mufuanyikije bualu ebu.

Yezu uvua muakule mêyi aa munda munya. (Yone 4:6) Uvua muende mu ditunga dia Samaliya didi ne mikuna mu dinda dijima, nunku ukavua ne nzala. Nanku bayidi bende bakamusengelela ne: “Labi, diaku koku.” (Yone 4:31) Mu diandamuna diende, Yezu wakaleja ne: uvua udiumvua mudishibue ne mukoleshibue pavuaye wenza mudimu wa Nzambi. Mêyi aa kaenaku aleja ne: Yezu uvua ne nsombelu uvua ne tshipatshila anyi?

2. YEZU UVUA MUNANGE TATUENDE BIKOLE.

“Ndi munange Tatu.”​—Yone 4:31.

Yezu uvua ne malanda mimpe matambe ne Tatuende wa mu diulu. Dinanga dikole divua nadi Yezu kudi Nzambi divua dimusaka bua kumanyisha bantu malu a Tatuende, dîna diende, disua diende ne ngikadilu yende. Mu mêyi, mu bienzedi biende ne mu ngikadilu yende, Yezu uvua uleja bimpe bitambe tshidi Tatuende. Nunku, patudi tubala malu adi atangila Yezu mbienze anu bu tudi tubala malu a Tatuende. Ke bualu kayi pavua Filipo muebeje Yezu ne: “Utuleje Tatu,” Yezu wakamuandamuna ne: “Udi mummone mmumone kabidi Tatu.”​—Yone 14:8, 9.

Bua mushindu uvua Yezu munange Tatuende bikole, biakamusaka bua kumutumikila too ne ku lufu. (Filipoyi 2:7, 8; 1 Yone 5:3) Bu muvua Yezu munange Nzambi mushindu eu nsombelu wende uvua ne tshipatshila.

3. YEZU UVUA MUNANGE BANTU.

“Kakuena muntu udi ne dinanga dipite edi: dia muntu ufila muoyo wende bua balunda bende.”​—Yone 15:13.

Nsombelu wetu wa matuku atshilualua bu bantu bapange bupuangane mmubi. Bible udi wamba ne: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.” (Lomo 5:12) Katuena mua kuepuka bipeta bia bubi bu mudi lufu.​—Lomo 6:23.

Diakalenga, Yehowa mmulongolole ne dinanga bua kupatula bantu mu nsombelu mubi eu. Wakitaba bua Yezu, Muanende mupuangane udi kayi ne bubi akenge ne afue bua kufila tshia bupikudi tshidi tshipikula bantu ku bupika bua bubi ne lufu. Bu muvua Yezu munange Tatuende ne bantu, wakafila ku budisuile muoyo wende mupuangane bua bualu buetu. (Lomo 5:6-8) Dinanga dia mushindu eu diakapesha nsombelu wende tshipatshila.b

4. YEZU UVUA MUMANYE NE: TATUENDE MMUMUNANGE NE MMUMUANYISHE.

“Eu udi Muananyi munanga undi muanyishe.”​—Matayi 3:17.

Yehowa wakakula mêyi aa biangatshile mu diulu mu tshikondo tshia batismo wa Yezu. Nunku, Yehowa wakaleja patoke muvuaye munange Muanende Yezu ne umuanyisha. Ke bualu kayi Yezu wakamba ne: “Tatu mmunnange”! (Yone 10:17) Bu muvua Yezu mumanye ne: Tatuende mmumunange ne mmumuanyishe, wakatantamena buluishi ne tuseku ne dikima dionso. Mushindu uvua Nzambi munange Yezu ne mumuanyishe wakamuambuluisha bua kutantamena lufu. (Yone 10:18) Mushindu uvua Yezu mumanye ne: Tatuende mmumunange ne mmumuanyishe uvua mupeteshe muoyo wende tshipatshila tshinene.

Bulelela, nsombelu wa Yezu uvua ne tshipatshila. Bushuwa, tudi mua kulonga malu a bungi kudiye bua mushindu utudi mua kuenza bua nsombelu wetu ikale ne tshipatshila tshilelela. Mu tshiena-bualu tshidi tshilonda netumone imue mibelu ivua Yezu mupeshe bayidi bende bua mushindu wa kuenza malu mu nsombelu.