Kudiku mushindu wa kuikala ne muoyo udi ne tshipatshila anyi?

BUSHUWA, mêyi aa mmalelela! Pa buloba apa muoyo wa muntu mmuule tente ne “ntatu ne makenga.” Imue misangu ukadi mudiebeje ne: ‘Kudiku mushindu wa kuikala ne muoyo udi ne tshipatshila mpindieu anyi?’

Tuangate tshilejilu tshia Maria. Uvua ne makanda a mubidi, kadi mpindieu, bu mukadiye ne bidimu 84 kena kabidi mua kudipatukila nkayende mu nzubu to. Lungenyi luende lutshidi luimpe, kadi mubidi wende ukadi mutekete. Udiku mua kudiumvua ne: muoyo wa mushindu eu udi ne tshipatshila anyi?

Kadi wewe udi wela meji kayi? Imue misangu udi mua kudiebeja bikala muoyo webe ne tshipatshila. Mudimu uudi wenza udi mua kuikala anu umue umue awu, utshiokesha ne utonda. Bantu ba bungi badi mua kuikala imue misangu kabayi bamanye ne: udi wenza mudimu bikole. Nansha nsombelu webe yeye muikale muimpe mpindieu, udi mua kuikala ne buôwa bua tshikala mua kukufikila mu matuku atshilualua. Imue misangu, udi kabidi mua kudiumvua muikale nkaya anyi ne dibungama. Nsombelu wa mu dîku dienu udi mua kuikala muule ne bilumbu anyi ntatu. Udi mua kuikala mufuishe muntu kampanda uudi munange. Tshilejilu, André uvua munange tatuende bikole, ne tatuende eu wakapeta disama dia tshimpitshimpi ne kufuaye. Bualu ebu buvua butatshishe André bikole bualu uvua mumone ne: bivua bimukolele bua kutantamena lutatu elu.

Patudi tutuilangana ne lutatu kampanda, bualu butudi basue kumanya misangu yonso budi ne: kudiku mushindu wa kuikala ne muoyo udi ne tshipatshila anyi? Tudi mua kupeta diandamuna ku diambuluisha dia nsombelu wa Yezu Kristo muntu uvua ne muoyo pa buloba apa kukadi bidimu bitue ku 2 000. Nansha muvua Yezu mutuilangane ne ntatu ya bungi, nsombelu wende uvua anu ne tshipatshila. Tudi petu mua kupeta nsombelu wa mushindu eu tuetu balonde tshilejilu tshiende.