Kuikala mumanyishi mmumue ne: ntshinyi? Tshiena-bualu etshi tshidi tshiandamuna lukonko elu ne tshileja bua tshinyi bantu batu dijinga ne kumvua lumu luimpe. Tshidi kabidi tshiumvuija mushindu utudi mua kukumbaja bimpe mudimu wetu wa kuikala bamanyishi.

▪ Udiku “ne tshisumi bua midimu mimpe” anyi?

Mu tshiena-bualu etshi netumone mishindu ibidi idi kuikala ne “tshisumi bua midimu mimpe” kukoka bantu kudi Nzambi. (Tito 2:14) Umue mushindu, nku diambuluisha dia mudimu wetu wa buambi. Mukuabu mushindu, mpa kuikala ne bikadilu bimpe.

▪ Koleshayi dibaka dienu ku diambuluisha dia diyukidilangana dimpe

▪ Nuenu baledi ne bana, ikalayi nuyukila ne dinanga

Kuyukidilanga bimpe kudi ne mushinga bua mulume ne mukaji kuikalabu ne disanka mu dibaka diabu ne bua bena mu dîku kuikalabu ne nsombelu wa disanka. Tshiena-bualu tshia kumpala ntshileje ngikadilu idi mua kutuambuluisha bua kuyukidilangana bimpe. Tshiena-bualu tshibidi tshidi tshileja tshitudi mua kuenza bua kukandamena malu adi mua kunyanga diyukidilangana pankatshi pa baledi ne bana.

▪ Angata mapangadika mimpe bua kulama bumpianyi buebe

Nzambi mmutekele bena Kristo bumpianyi kayi? Mmalu kayi adi atangila bumpianyi buetu atudi mua kulongela ku tshilejilu tshibi tshia Esau? Mmalu kayi a kuenza ikala mua kutuambuluisha bua kuangata mapangadika mimpe bua bidi bitangila bumpianyi buetu? Tshiena-bualu etshi netshiandamune nkonko eyi.

BIENA-BUALU BIKUABU

13 Nkonko ya babadi

24 Muoyo wetu udi ne tshipatshila

31 Mu bintu bietu bia kale

TSHIZUBU: Bana betu ba bakaji badi bayisha mupanyishi wa mu makazen ku Nord-Ouest kua Londres ku diambuluisha dia tshibejibeji tshia mu tshiena Gujarati

LONDRES, ANGLETERRE