Udi mua kueyemena tshitendelelu mu malu a makuta anyi?

Estellea uvua uya misangu yonso ne bana bende mu tshitendelelu tshiabu. Udi wamba ne: “Mvua muambile pastere wetu ne: ndi musue kulonga Bible.” Kadi kavua mumulongeshe to. Ndekelu wa bionso, wakalekela kuya mu tshitendelelu atshi. Udi utungunuka wamba ne: “Ba pastere betu bakamfundila mukanda bamba ne: nansha meme tshiyi muye kakuena bualu to, tshia mushinga ntuma anu makuta. Meme kulua kumona ne: ‘Diya dianyi mu tshitendelelu kadiena dibatangila to; tshidibu natshi dijinga mmakuta.’”

Angelina, uvua mu tshitendelelu kampanda udi wamba ne: “Mu tshitendelelu tshimvua bavua bapitshisha tshibondo tshia kuela makuta misangu isatu dituku dionso dituvua ne masangisha, ne tuvua anu benzejibue bua kuela makuta. Bavua anu balomba makuta. Meme kumona ne: ‘Kabena ne nyuma wa Nzambi to.’”

Bitendelelu bia muaba uudi bidiku pabi bienzeja bantu patoke anyi mu musokoko bua kufila makuta anyi? Tshienzedi etshi tshidiku tshipetangana ne tshidi Bible wamba anyi?

TSHIDI BIBLE ULONGESHA MU BUALU EBU

Yezu uvua mutuadije ne buena-Kristo wakamba ne: “Nuvua bapete tshianana, nufile tshianana.” (Matayi 10:8) Kabena ne bua kulomba muntu makuta bua kumuyisha Mukenji mulenga wa mu Bible to.

Mmunyi muvua bena Kristo ba kumpala bakumbaja majinga a tshisumbu?

Muntu yonso uvua ufila dipa diende ‘bu mudiye mupangadije mu muoyo wende, kayi wenza ne kanyinganyinga anyi bu muenzeja ku bukole, bualu Nzambi mmunange muntu udi ufila ne disanka.’ (2 Kolinto 9:7) Mupostolo Paulo wakamba ne: “Tuvua tuenza mudimu butuku ne munya bua katulu bujitu bunene kudi muntu nansha umue wa kunudi patuvua banuyishe lumu luimpe.” (1 Tesalonike 2:9) Paulo uvua wenza mudimu wa ntenta bua kukumbaja mudimu wende wa diyisha.​—Bienzedi 18:2, 3.

NTSHINYI TSHITU BANTEMU BA YEHOWA BENZA?

Bantemu ba Yehowa batu badisangisha mu nzubu idibu bibakishe mikese, batu bayibikila ne: Nzubu ya Bukalenge. Makuta adibu batula badi baapeta kuepi? Kabatu bapitshisha bibondo anyi batumina bantu amvelope bua bafile makuta to. Kadi, muntu yonso udi wanyisha programe wa malu a Nzambi udi mua kuela dipa diende mu musokoko mu kashete ka mapa kadi mu Nzubu wa Bukalenge.

Mukanda eu mmutudila makuta a bungi bua kuupatula ne kuufikisha muaba uudi. Kadi, kuakumona benza piblisite bua kupana mikanda eyi anyi benzeja bantu bua kufila makuta to. Tshidi ne mushinga wa bungi kudibu nkuyisha bantu bulelela bua mu Bible.

Udi wela meji kayi: mushindu udibu bapeta makuta bua kuendesha mudimu wabu eu kawenaku upetangana ne tshivua Yezu muambe ne tshivua bena Kristo ba kumpala benza anyi?