Nzambi udi mua kunyingalala​—Mutudi mua kumusankisha

Kabatuku banji kukunyingalaja bikole ne mutuadije kudila anyi?—a Pamuapa bikadi bifikile yonso wa kutudi. Imue misangu, tudi mua kudila bualu tudi bumvue bibi. Muntu kampanda udi mua kutushiminyina malu adi kaayi malelela. Bidi binyingalaja, ki mmuomu anyi?— Nzambi udi pende mua kunyingalala padibu bamushiminyina malu. Tuanjayi kuakula bua bualu ebu ne tumone mushindu utudi mua kusankisha Nzambi pamutu pa kumunyingalaja.

Bible udi uleja ne: bamue bantu bavua bamba muvuabu banange Nzambi bavua ‘bamunyingalaje.’ Eyowa, “bakatatshisha” Nzambi! Bushuwa, muntu nansha umue kena mua kukengesha Yehowa Nzambi ku mubidi to. Bualu ngwa bukole buonso. Nunku tumonayi bua tshinyi Yehowa udi unyingalala patudi katuyi tuenza tshidiye wamba.

Bantu babidi ba kumpala bavua Yehowa mufuke pa buloba bakamunyingalaja bikole. Uvua muteke bantu babidi aba mu Mparadizu pa buloba uvuabu babikila ne: “budimi bua Edene.” Bantu babidi abu mbanganyi?— Eyowa, muntu wa kumpala uvua Adama, pashishe Eva. Tumonayi tshivuabu benze tshivua tshinyingalaje Yehowa.

Yehowa mumane kubateka mu budimi, wakabambila bua babutangile bimpe. Wakabambila kabidi ne: bavua ne bua kulela bana ne kusombabu pamue mu budimi abu kabayi bafua. Kadi kumpala kua Adama ne Eva kulelabu bana, bualu bubi bua kenzeka. Udiku mumanye bualu abu anyi?— Muanjelu mukuabu wakasaka Eva ne pashishe Adama bua kutombokelabu Yehowa. Tumona muvua bualu ebu buenzeke.

Muanjelu awu wakasaka nyoka bua kumueneka bu udi wakula. Eva uvua musue kumvua tshivua nyoka mumuambile ne: uvua ne bua kuikala “bu Nzambi.” Nunku wakenza tshivua nyoka mumuambile. Udi mumanye tshivuaye muenze anyi?—

Eva wakadia tshimuma tshia mutshi uvua Yehowa muambile Adama bua kadi to. Kumpala kua Nzambi kufukaye Eva, wakambila Adama ne: “Udi mua kudia mamuma a mitshi yonso ya mu budimi, bu mûdi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.”

Eva uvua mumanye mukenji eu. Kadi wakatungunuka ne kutangila mutshi au ne kumona ne: ‘udi muimpe wa kudia ne muimpe ku mêsu, yeye wakangata dimuma, wakadia.’ Pashishe wakapesha Adama tshimuma, ne “yeye wakadia” tshimuma atshi. Udi mumanye bua tshinyi uvua muenze nanku anyi?— Mbualu Adama uvua mulue kunanga Eva kupita muvuaye munange Yehowa. Wakajinga kusankisha Eva pamutu pa kusankisha Nzambi. Kadi kutumikila Yehowa kudi ne mushinga wa bungi kupita kutumikila muntu mukuabu yonso eu!

Udiku uvuluka nyoka uvua muakule ne Eva anyi? Anu bu mudi muntu mua kuenza bua bimueneke bu udi wakuila ku diambuluisha dia tshintu kampanda, muntu kampanda uvua muenze bua nyoka amueneke bu udi wakula. Dîyi diavua dipatuka mukana mua nyoka divua dia nganyi?— Divua dîyi dia “nyoka wa kale au, udibu babikila ne: Diabolo ne Satana.”

Udiku mumanye tshiudi mua kuenza bua kusankisha Yehowa anyi?— Udi mua kuenza nunku biwikala misangu yonso umutumikila. Satana udi wamba mudiye mua kusaka muntu yonso bua kuenza tshidiye musue. Nunku Yehowa udi utubela wamba ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ Satana udi upenda anyi useka Yehowa. Udi wamba ne: udi mua kusesuisha muntu yonso bua kenzedi Nzambi mudimu to. Nunku sankisha Yehowa pa kumutumikila ne kumuenzela mudimu! Neudienzeje bua kuenza nunku anyi?—