Bantu badi baluangana bua kutshimuna lufu

Lufu mmuluishi munene udi wenza buôwa. Tudi tululuisha ne bukole buetu buonso. Tutu tupanga tshia kuamba patudi tujimija muntu utudi banange. Patutshidi bansonga tudi mua kuela meji ne: muluishi eu kakutuenzela bualu, kuela meji mushindu eu, nkudishima.

Bantu bakese bavua bela meji mu matuku a Bafaraone ba kale ne: kabakufua to. Bavua benze muabu muonso bua kutshimuna lufu. Bintu bia mabue bivuabu bibake bivua bileja dijinga diabu ne muvuabu bapangile.

Nansha muvua bakalenge ba mu Chine balonde wabu njila, bavua anu ne meji a dibenga kufua bualu bavua bela meji ne: kudi buanga kampanda budi ne bukole bua kuambuluisha muntu bua kushala ne muoyo kashidi. Mukalenge Qin Shi Huang wakalomba bansenda bende bua kukeba tshintu tshidi ne bukole bua kusemeja lufu kule. Kadi bintu bia bungi bivuabu basambakaje ebi bivua ne lulengu, bidi bimueneka ne: biobi ke bivua bilue kumushipa.

Mu tshidimu tshia 1513, mukebuludi wa malu wa mu ditunga dia Espagne Juan Ponce de León, wakaya ne mazuwa a mâyi mu bitupa bia Caraïbes bua kukeba mushimi wa mâyi uvua mua kumuvuija nsonga. Wakafika mu tshitupa tshidibu babikila ne: Florida, mu États-Unis, wenda ukeba mushimi eu, kadi wakafua bidimu bikese panyima pa mvita ivua mienzeke munkatshi mua bena Amerike bobu nkayabu. Kadi kavua mupete mushimi eu udi mua kuvuija muntu nsonga to.

Bafaraone, bakalenge ne bakebuludi bonso buabu bavua bakeba kutshimuna lufu. Kadi nnganyi wa kutudi udi mua kupepeja tshipatshila tshiabu etshi nansha tuetu tubenga mishindu yabu ya mua kutshimuna lufu? Mu kuamba kuimpe, tuetu bonso tutu basue kuikala ne muoyo.

KUDIKU MUSHINDU WA KUTSHIMUNA LUFU ANYI?

Bua tshinyi katuena basue lufu? Bible udi umvuija tshitudi tulubengela. Bible udi wamba bua Mufuki wetu Yehowaa Nzambi ne: ‘Wakafuka tshintu tshionso tshimpe mu tshikondo tshiakanyine, mmuteke too ne muoyo wa tshiendelele mu muoyo wa bantu.’ (Muambi 3:11, NW) Tudi basue kumona bintu bimpe bia pa buloba bua kashidi, ki anu bua bidimu 80 to. (Musambu 90:10) Ke dijinga ditudi nadi.

Bua tshinyi Nzambi mmuteke ‘muoyo wa tshiendelele’ mu mitshima yetu? Anu bua kutunyingalaja patupu anyi? Kebiena nanku to. Kadi Nzambi udi tulaya ne: neatshimune lufu. Bible udi wakula misangu ya bungi bua ditshimuna dia lufu ne bua mudi Nzambi mutulaye muoyo wa tshiendelele.—Bala mu kazubu kadi ne tshiena-bualu ne: “Mua tshimunabu lufu.”

Yezu nkayende wakamba ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Katuena mua kuamba ne: kakuena mushindu wa kutshimuna lufu to. Kadi Yezu udi uleja ne: anu Nzambi nkayende ke udi mua kututshimuina lufu.