Bua tshinyi Nzambi udi ulekela bantu badi ne bukole bakengesha badi batekete?

Bible udi wakula bua bamue bantu bavua ne bukole bavua bakengesha bavua batekete. Tudi mua kuvuluka tshilejilu tshia Nabota.a Ahaba mukalenge wa mu Isalele wa mu bidimu bia 900 kumpala kua bikondo bietu ebi, wakalekela mukajende Izebele ushipesha Nabota ne bana bende ba balume bua mukalenge angate budimi bua mvinyo bua Nabota. (1 Bakelenge 21:1-16; 2 Bakelenge 9:26) Bua tshinyi Nzambi mmulekele bantu benza mudimu bibi ne bukokeshi buabu mushindu eu?

Bualu bua mushinga mutudi mua kukuata mbua se: Nzambi katu ushima to. (Tito 1:2) Bualu ebu budi bupetangana ne bienzedi bibi bia tshikisu ku tshinyi? Katshia ku ntuadijilu, Nzambi wakadimuija bantu ne: dimutombokela nedibafikishe ku lufu. Mêyi a Nzambi aa avua makumbane bualu katshia butombueji buajuka mu budimi bua Edene, lufu ludi mu bantu too ne lelu. Abele ke mmuntu wa kumpala uvua mufue, wakafua bua tshikisu tshia muanabu Kayina uvua mumushipe.​—Genese 2:16, 17; 4:8.

Bua malu adi enzeka pa buloba, Dîyi dia Nzambi didi diamba mu tshikoso ne: “Muntu udi ukokesha muntu nende bua kumukengesha.” (Muambi 8:9, NW) Mêyi aa mmalelela anyi? Yehowa wakadimuija tshisamba tshia Isalele, bantu bende ne: nebapete bakalenge ba tshikisu bikala mua kusaka bantu bua kudidila Nzambi. (1 Samuele 8:11-18) Nansha Solomo Mukalenge wa meji wakekengesha bantu bende. (1 Bakelenge 11:43; 12:3, 4) Bakalenge babi bu mudi Ahaba, bavua ne tshikisu tshikole. Tuanji kuelabi meji: bu Nzambi muenze bua malu a tshikisu a bakokeshi aba kaenzeki, mu bulelela, mêyi ende kaavua alua a dishima anyi?

Vuluka kabidi ne: Satana uvua muambe ne: bantu badi benzela Nzambi mudimu anu padibu bimpe. (Yobo 1:9, 10; 2:4) Bu Nzambi ukuba basadidi bende ku malu onso a tshikisu, kavuaku ukuluka mu buteyi bua Satana anyi? Anyi bu Nzambi ukuba mutendeledi wende yonso ku malu a tshikisu, kavuaku ulua muena dishima munene anyi? Bu bukubi bua mushindu eu buikalaku, bantu ba bungi bavua mua kuela meji ne: bantu badi mua kudilombola bimpe kabayi dijinga ne Nzambi. Kadi Dîyi dia Nzambi didi diodi diamba ne: muntu kena mua kudilombola yeye nkayende to. (Yelemiya 10:23) Tudi basue bua Bukalenge bua Nzambi bulue; bualu bobu ke bualua kujikija malu onso a tshikisu.

Bualu ebu budiku buleja ne: Nzambi kena ne tshidiye wenza bua malu a tshikisu anyi? Tòo. Tukonkonone malu abidi adiye muenze aa: Bua kumpala, udi uleja patoke tshidi tshikisu. Tshilejilu, Dîyi diende didi diela patoke tshienzedi tshionso tshia Izebele tshia ditungila Nabota. Bible udi kabidi uleja mudi malu mabi a tshikisu aa makebesha kudi mukokeshi udi ne bukole udi usokoka tshidiye menemene. (Yone 14:30; 2 Kolinto 11:14) Bible udi uleja patoke ne: muntu eu n’Satana Diabolo. Padi Nzambi wela patoke malu mabi ne utuleja udi muakebeshe, udi utuambuluisha bua katukuluki mu buteyi bua dienza malu mabi. Udi utukuba bua tulue kupeta muoyo wa tshiendelele.

Buibidi, Nzambi udi utujadikila ne: neajikije dikengeshangana dionso. Mushindu uvuaye muele Ahaba ne Izebele patoke, mubalumbuluishe ne mubanyoke ne munyoke kabidi bantu ba bungi ba bu bobu, udi utujadikila ne: neanyoke benji ba malu mabi dimue dituku. (Musambu 52:1-5) Nzambi mmutulaye kabidi ne: mu katupa kîpi emu, neumbushe malu mabi onso bua bantu badi bamunange.b Muena lulamatu Nabota ne bana bende nebamonangane mu mparadizu pa buloba muikala kamuyi dikengeshangana.​—Musambu 37:34.