UTU MUMANYE ANYI?
Alowe kayi uvuabu bakuata nende mudimu mu tshikondo tshivuabu bafunda Bible?
Alowe uvua ufumina ku mutshi wa Aquilaria agallocha
Bible udi wamba ne: bavua bakuata mudimu ne alowe bua kuenza manananshi a mupuya a kuela ku bilamba ne pa malalu. (Musambu 45:8; Nsumuinu 7:17; Musambu wa Solomo 4:14) Alowe udibu bakuila mu Bible uvua ufumina ku mutshi wa Aquilaria agallocha. Pavua mutshi eu wenda ubola uvua utuadija kupatula mafuta ne budimbu. Bavua bazaza mutshi bawushiya musenga ne pashishe bawupana bu “alowe.”
Bible udi ufuanyikija ntenta ya bena Isalele ne ‘mitshi ya alowe yakakunabu kudi Yehowa.’ (Nomba 24:5, 6) Badi mua kuikala bayifuanyikija nunku bua mushindu udi mutshi wa Aquilaria agallocha eu, udi mua kufika ku bule bua metre 30 ne mmunene bikole. Nansha mudibu kabayi mua kupeta mutshi eu mu Isalele wa mpindieu, diksionere kampanda dia malu a mu Bible didi diamba ne: “Katuena mua kubenga lungenyi lua ne: mutshi eu anyi mikuabu idi kayiyi mimanyike mpindieu mu Isalele bavua bayikuna mu tshibanda tshia Yadene tshivua ne bubanji ne bantu ba bungi.”
Mmilambu kayi ivuabu banyisha mu ntempelo wa mu Yelushalema?
Tshitampi etshi tshia mu ntempelo wa mu yelushalema tshikadi tshienze bidimu bitue ku 2 000
Mikenji ya Nzambi ivua yamba ne: milambu yonso ivuabu bafila mu ntempelo ivua ne bua kuikala mimpe bikole. Nzambi kavua mua kuanyisha milambu ivua mikale ne bulema to. (Ekesode 23:19; Lewitiki 22:21-24) Mufundi mukuabu muena Yuda diende Philon wakamba ne: bakuidi ba tshikondo atshi, bavua bakenketa nyama “ku mutu too ne ku mikono” bua kumanya ne: ivua mikezuke mu malu onso ne “kayiyi ne katoba anyi bulema mu mishindu yonso.”
Mumanyi wa malu a Bible diende Sanders udi wamba ne: “Batangidi ba ntempelo bavua banyishila bapanyi pa nyama ya milambu bua kupanyishabu anu nyama anyi nyunyi ivua bakuidi bamane kukenketa. Dîba adi, mupanyishi uvua upesha musumbi ka jeton kavua kaleja ne: nyama eu bakavua bamukenkete.”
Mu tshidimu tshia 2011, bakebuludi ba bintu bia mu maloba bakapeta ka jeton kakose bimpe ka mushindu eu pabuipi ne ntempelo kikale ne tshitampi tshia mu bidimu lukama bia kumpala kua Yezu too ne mu bidimu bia 70 bikondo bietu ebi. Miaku ibidi ya mu tshiena Alama ivuabu bafunde pa ka jeton aka ivua yumvuija ne: “Mukezuke bua Nzambi.” Bidi bimueneka ne: batangidi ba ntempelo bavua balamika ka jeton aka ku tshintu anyi ku nyama ivuabu ne bua kulambula mu ntempelo.