Muntu neanyange buloba kakuyi mushindu wa kubulongolola anyi?

Bua mufundi wa Bible wa kale dilala dia muntu matuku makese ndishilangane bikole ne dishala dia buloba kashidi. Bushuwa, kukadi bidimu binunu ne binunu, bikondo bidi bipita ne bikuabu bidi bilonda, kadi buloba budi amuku ne mbukumbane bua bantu kusombapu too ne mpindieu.

Bamue bantu badi bamba ne: bidimu bivua bilonde mvita mibidi ya buloba bujima bivua bidimu bia malubuluka makole. Anu mu bidimu 70 patupu, bantu mbamone malubuluka mu malu a tudiendelandela, diyukidilangana ku nshinga ne malu makuabu a biamu, malu onso aa mmambuluishe bua malu a mpetu kuyawu kumpala. Bantu ba bungi badi ne nsombelu muimpe uvuabu bela meji ne: kabavua mua kumupeta to. Anu mu tshiotshi tshikondo atshi, bantu ba pa buloba bavua bavulangane misangu isatu.

Kadi malu onso aa avua makebeshe amue malu. Badi baleja ne: malu adi bantu benze mmanyange mivu mu mushindu wa kupangisha bantu mua kusomba bimpe pa buloba. Bena sianse badi baleja ne: tudi mu tshikondo tshidi bantu benda banyanga buloba bikole.

Bible uvua mudianjile kuakula bua tshikondo tshikala muntu mua “kubutula buloba.” (Buakabuluibua 11:18) Bamue bantu badi badiebeja ni tudi mu tshikondo tshia mushindu eu. Nebanyange buloba too ne mu mushindu kayi? Kakuakuikala munshindu wa kubulongolola anyi? Muntu neanyange buloba mu mushindu udibu kabayi mua kubulongolola anyi?

KAKUAKUIKALA MUSHINDU WA KUBULONGOLOLA ANYI?

Buloba budi buenda bunyanguka mu mushindu wa kabayi mua kubulongolola anyi? Bamue bena malu a sianse badi bela meji ne: bua mushindu udi buloba buenda bunyanguka, mbikole bua kumanya tshikala mua kubufikila. Bua bualu ebu, badi ne buôwa bua ne: katuikadi tuenda tusemena mu tshikondo tshidi dishintuluka dia mu tshimpitshimpi dia mivu mua kuenza ne kufuana kukebesha njiwu pa buloba.

Tuangate tshilejilu tshia mabue a mashika a ku Ouest. Bamue bantu badi bamba ne: bua bungi bua luya ludi pa buloba, netufike mu tshikondo tshikala mabue a mashika adi menguluke kaayi mua kukuatakana kabidi to. Bualu mabue a mashika aa atu aluja nsese ya dîba. Kadi padi mabue aa enda enguluka ne alue makese, nsese ya dîba idi ituadija kututa pa mâyi a mbuu. Tshitupa tshia mbuu tshidi tshifike tshidi tshipeta luya lua bungi bifikisha mabue a mashika ku dienguluka bikole. Bidi mua kulua bikole bua kuimanyika dienguluka dia mabue edi. Bu tshipeta, dienguluka dia mabue edi didi dikebesha dipasalala dia mâyi a mbuu didi mua kukebela miliyo ne miliyo ya bantu njiwu.

DINYANGA BIKOLE BINTU BIA PA BULOBA

Mbakeba mishindu ya bungi ya kuimanyika “dinyanguka dia buloba” ditudi tutuilangana nadi. Umue wa ku mishindu uvuabu bakuate nawu mudimu bikole ngua kuvudija malu a mpetu ne kuambuluisha bantu bua kulama bintu bidi bibanyunguluke bimpe. Bualu ebu buvua bupatule bipeta kayi?

Diakabi, mabanza a bungi adi nawu matunga mmenze bua ne: bantu banyange kabidi buloba bikole. Bantu badi batungunuka ne kunyanga bintu bia pa buloba bikole kupita ne mutu buloba bubipatula pa tshibidilu. Kudiku tshia kuenza anyi? Mumanyi kampanda wa bintu bia pa buloba udi witaba ne: “Mu mushindu kampanda, katuena ne lungenyi nansha lukese lua mua kulama bintu bia pa buloba bimpe.” Bualu ebu budi bukumbaja mêyi a mu Bible a ne: ‘Muntu kena ne bukole munda muende bua kuendesha nabu biendedi biende bimpe.’​—Yelemiya 10:23.

Kadi Bible udi utujadikila ne: Nzambi Mufuki kakulekela muntu unyanga buloba. Mu Musambu wa 115:16 badi bamba ne: Nzambi ‘wakupa bana ba bantu buloba.’ Bushuwa, buloba buetu ebu “ndipa dimpe” dia kudi Tatu wetu wa mu diulu. (Yakobo 1:17) Tudiku mua kutekemena bua Nzambi kutupeshaye dipa dimpe edi bua matuku makese, kadiyi ditungunuka kabidi anyi? Kabiena mua kuenzeka to. Etshi ntshijadiki tshidi mufuki wa dibulunge dietu uleja.

TSHIDI MUFUKI MULONGOLOLE

Genese mukanda wa mu Bible udi uleja muvua Nzambi muenze buloba bimpe menemene. Mu Bible badi bumvuija ne: buloba ‘kabuvua busunguluke, buakadi butupu; mîdima yakadipu.’ Kadi bua muoyo kuikalapu, bivua bikengela ‘mâyi’ ikalaku. (Genese 1:2) Pashishe Nzambi wakamba ne: ‘Munya wikalaku.’ (Genese 1:3) Ku kakese ku kakese nsese ya dîba yakatuta mu kapepe ne pashishe butoke buakamueneka pa buloba bua musangu wa kumpala. Nunku buloba bûme ne mbuu biakadisunguluja. (Genese 1:9, 10) Pashishe “bisosa, bikunyibua ne mitshi ya bimuma” biakamueneka. (Genese 1:12, MMM) Dilondangana dia bintu ebi divua ne mushinga wa bungi bua muoyo wikalaku ne kuikale tshitudi tubikila ne: dididisha dia bikunyibua (photosynthèse). Bua tshinyi bavua balongolole malu onso aa?

Yeshaya muprofete wa kale uvua muleje ne: ‘Nzambi mene wakafuka buloba ne wakabuenza, wakabujadika, kakabufuka bu tshintu tshia patupu, wakabufuka bua bantu bashikamepu.’ (Yeshaya 45:18) Bulelela, dijinga dia Nzambi ndia ne: bantu basombe pa buloba kashidi ne tshiendelele.

Diakabi, bantu mbenze mudimu bibi ne bintu bidi pa buloba bafike too ne ku dinyanga dipa dimpe dia Nzambi edi. Kadi disua dia Mufuki ki ndishintuluke to. Muntu kampanda wa kale wakamba ne: ‘Nzambi kena bu muntu udi wamba mêyi a mashimi, kena bu muana wa muntu, bua kukudimunaye mutshima. Biambeye dîyi, kena udishikija anyi?’ (Nomba 23:19) Kadi pamutu pa kulekela bantu banyanga buloba, dîba dikadi pabuipi dikala Nzambi mua “kubutula bantu badi babutula buloba.”​—Buakabuluibua 11:18.

BANTU NEBASOMBE PA BULOBA BUA KASHIDI

Mu muyuki wende muende lumu wa pa mukuna, Yezu Kristo wakamba ne: “Badi ne malu mapole mba diakalenga, bualu nebapiane buloba.” (Matayi 5:5) Pashishe anu mu muyuki umue umue au, Yezu wakaleja mushindu uvuabu ne bua kumbusha buloba ku dinyanguka. Wakambila bayidi bende bua kusambila ne: “Bukalenge buebe bulue. Disua diebe dienzeke kabidi pa buloba muomumue ne mu diulu.” Eyowa, Bukalenge bua Nzambi anyi mbulamatadi wende neakumbaje disua dia Nzambi bua buloba.​—Matayi 6:10.

Bua mashintuluka manene ikala Bukalenge bua Nzambi mua kutuadila bantu, Nzambi udi wamba ne: “Tangilayi! Ndi mvuija bintu bionso bipiabipia.” (Buakabuluibua 21:5) Bidiku bisua kumvuija ne: Nzambi neapingaje buloba bukuabu bupiabupia pa muaba wa ebu anyi? Tòo, bualu kakuena tshintu tshidi mua kuenza bua buloba buetu ebu bulue bubi to. Kadi, Nzambi neabutule bantu badi banyanga buloba, “badi babutula buloba,” mmumue ne: mbulamatadi ya bana ba bantu idi ikokesha lelu. “Diulu dipiadipia ne buloba bupiabupia” ebi, nebipingane pa muaba wa bintu bionso ebi, mbuena kuamba ne: mbulamatadi mupiamupia wa mu diulu anyi Bukalenge bua Nzambi bukokesha bantu pa buloba bupiabupia.​—Buakabuluibua 21:1.

Bua kuakaja bintu bidi bantu banyange pa buloba, Nzambi neapingaje bintu bidi bantu banyange bua muoyo utungunuke ne kuikala pa buloba. Mufundi wa misambu muenzeja ku nyuma wa Nzambi wakumvuija tshikala Nzambi mua kuenza wamba ne: ‘Udi ulua kumona buloba, udi ubulokeshila mvula, udi ubumeneshila biakudia bia bungi.’ Bu muikala mivu kayiyi inyanguka, ne Nzambi mumane kubenesha bintu bionso, buloba nebulue mparadizu buikala ne biakudia bia bungi.​—Musambu 65:9-13.

Sekretere wa Mohandas Gandhi munene wa tshitendelelu tshia mu Inde wakamba ne: “Buloba budi ne bintu bidi bikumbaja dijinga dionso dia muntu kadi ki ndijinga dionso dia muntu udi ne lukuka to.” Bukalenge bua Nzambi nebumbushe tshikebeshi tshia malu pa buloba pa kushintulula mioyo ya bantu. Muprofete Yeshaya wakadianjila kuamba ne: mu bukokeshi bua Bukalenge ebu, bantu ‘kabena benzela’ bakuabu bibi, anyi benzela buloba bibi. (Yeshaya 11:9) Bulelela, lelu eu miliyo ya bantu ba mishindu yonso ne nsombelu yonso mbalonge mikenji mitumbuke ya Nzambi. Mbalonge mua kunanga Nzambi ne muntu nabu, kuikala ne dianyisha, kutabalela bimpe muaba udibu, kulama bintu bia pa buloba ne kuenza malu mu diumvuangana ne disua didi nadi Mufuki bua bantu ne bua buloba. Mbadilongolole bua kuikala ne muoyo mu mparadizu pa buloba.​—Muambi 12:13; Matayi 22:37-39; Kolosayi 3:15.

Muyuki wa mu Genese wa bufuki udi ujika ne mêyi aa: ‘Nzambi wakamona bintu bionso biakenzaye ne: biakadi bimpe be!’ (Genese 1:31) Bushuwa, Nzambi kakulekela bantu banyanga buloba bulenga ebu bibi menemene to. Tudi ne disanka dia kumanya ne: mu matuku atshilualua buloba buetu ebu nebuikale mu bukubi mu bianza bia Yehowa Nzambi, Mufuki wetu wa dinanga. Mmulaye ne: ‘Bantu bakane nebapiane buloba, nebashikamemu tshiendelele.’ (Musambu 37:29) Newikale pebe munkatshi mua “bantu bakane” bikala mua kumona buloba bu tshisombelu tshiabu tshia tshiendelele anyi?