TSHIENA-BUALU TSHINENE
Bantemu ba Yehowa mbanganyi?
Becky wa mu Californie mu États-Unis udi wamba ne: “Mvua mumanye Mike kukadi bidimu bia bungi. Utu Ntemu wa Yehowa. Kadi tshitendelelu tshiende tshivua misangu ya bungi tshimpitshila. Yehowa nnganyi? Bua tshinyi Bantemu kabatu basekelela matuku a mifikilu? Mike uvua mubuelakane mu malu a tshisumbu kampanda anyi?”
Zenon wa mu Ontario mu Canada udi wamba ne: “Pavua bena mutumba banyi batuadije kulonga Bible ne Bantemu ba Yehowa, ngakadiebeja ne: ‘dîna Bantemu ba Yehowa didi diumvuija tshinyi? Ndîna dia tshitendelelu divua dikemesha bikole!’”
Kent wa mu Washington mu États-Unis udi wamba ne: “Meme ne mukajanyi tuvua tuela meji ne: Bantemu ba Yehowa bavua balua kutukumbula bualu tuvua babenge malu a bitendelelu. Tuvua tuela meji ne: bikala bitendelelu binene kabiyi ne tshitudi tukeba, tshisumbu tshikese tshia Bantemu ba Yehowa katshivua mua kuikala natshi to.”
Cecilie wa mu Esbjerg mu Danemark udi wamba ne: “Mu bulelela tshivua mumanye ne: Bantemu mbanganyi ne mmalu kayi adibu bitabuja to.”
Pamuapa ukadi mubamone bayisha ku nzubu ne ku nzubu anyi mu bisalu benda babanya mikanda idi yumvuija Bible ne balongesha bantu ku mbanza yabu kabayi balomba makuta. Bobu ke badi mua kuikala bakupeshe tshibejibeji etshi. Pamuapa udi mua kudiebeja ne: Bantemu ba Yehowa mbanganyi menemene. Misangu mikuabu ngelelu webe wa meji udi mua kuikala mufuanangane ne wa bantu badibu batele kuulu eku.
Biwikale udiela nkonko ya mushindu eu, nkuepi kuudi mua kupetela mandamuna? Mmunyi muudi mua kumanya malu adi Bantemu ba Yehowa bitabuja? Nkuepi kutubu bapetela makuta bua kukumbaja mudimu wabu wa kuyisha ne kuibaka miaba idibu batendelela? Bua tshinyi batu balua kukutangila kuebe anyi bayukila nebe mu njila?
Cecilie utudi batele kuulu eku udi wamba kabidi ne: “Ndi mubale malu a bungi adi atangila Bantemu ba Yehowa ku Enternet, mvua mumvue imue ngumu ne muteleje bantu bakula bibi buabu. Malu aa akansaka bua kuikala ne mmuenenu mubi bua Bantemu ba Yehowa.” Kadi pakapita matuku, kuyukilaye ne Bantemu ba Yehowa buludiludi, kuandamunabu nkonko yende bimpe menemene.
Udiku musue kupeta mandamuna malelela ku nkonko yebe pa bidi bitangila Bantemu ba Yehowa anyi? Tudi tukulomba bua kukeba mandamuna anu kudi bena bualu nkayabu, mmumue ne: Bantemu ba Yehowa badi bapatule tshibejibeji etshi. (Nsumuinu 14:15) Tudi tuela meji ne: tshiena-bualu tshidi tshilonda netshikuambuluishe bua kumanya tshitudi, malu atudi tuitabuja ne mudimu utudi tuenza.