Dîna dia Bible pa mulondo wa kale

Mu 2012 bakebuludi ba bintu bia kale bakapeta tupesa tua mulondo ukavua mulale bidimu bitue ku 3 000. Bakebuludi aba bakasanka bikole. Bua tshinyi? Ki mbua tupesa tua mulondo to, kadi mbua tshivua tshifundapu.

Ndekelu wa bionso pakateka bakebuludi aba tupesha tuonso etu kaba kamue, kabiakabakolela bua kubala mifundu ya bena Kanana ivua pa mulondo to. Ivua yamba ne: “Eshba’al Ben Beda,” mmumue ne: “Eshebâla muana wa Beda.” Eu ke musangu wa kumpala udi bakebuludi ba bintu bia kale bapete dîna difunda pa tshintu tshia kale.

Mu Bible mbatele muntu mukuabu, diende Eshebâla. Uvua umue wa ku bana ba balume ba mukalenge Shaula. (1 Kulondolola 8:33; 9:39) Mulongeshi munene kampanda diende Yosef Garfinkel, umue wa ku bavua bapete mulondo au, wakamba ne: “Mbia mushinga bua kumona ne: dîna Eshebâla didi mu Bible, ne lelu dikale kabidi mu mikanda ya bakebuludi ba kale, anu mu bukokeshi bua mukalenge Davidi.” Etshi ke tshilejilu tshikuabu tshia mudi bintu bia kale ebi bitua Bible mpanda!

Badi babikila kabidi Eshebâla, muana wa balume wa Shaula mu Bible ne: Ishi-boshete. (2 Samuele 2:10) Bua tshinyi bavua bapingaje muaku “bâla” pa muaba wa “boshete”? Bakebuludi badi baleja ne: mufundi wa mukanda muibidi wa Samuele uvua mua kuikala muepuke kuenza mudimu ne dîna Eshebâla bualu divua divuluija bena Isalele Bâla, nzambi wa mvula ya tshipepele tshikole uvua bena Kanana batendelela. Kadi mu mukanda wa mu Bible wa Kulondolola wa kumpala, tudi tupetamu kakabidi dîna Eshebâla.