Lubuku lua mitoto ne dimona malu atshilualua bidi bitumanyisha malu atshilualua anyi?

LUBUKU LUA MITOTO

Lubuku lua mitoto nduimanyine pa lungenyi lua ne: mitoto, ngondo, ne mabulunge bitu bilombola nsombelu wa bantu bikole. Bena lubuku lua mitoto batu bamba ne: mushindu udi bintu bia muulu ebi bimane tshikondo tshidibu balela muntu ke udi wenza bua ikale ne bikadilu kampanda ne uleja muikala matuku ende atshilualua.

Nansha mudi lubuku elu lufumine mu Babilone wa kale, lutshidi anu lutangalake bikole. Bilondeshile bantu bavuabu bele nkonko mu États-Unis mu 2012, muntu umue mu bantu basatu uvua wela meji ne: lubuku elu “mmushindu kampanda wa malu a sianse,” ne bantu 10 mu bantu lukama bakamba bobu ne: “mmalu a sianse menemene.” Mmuomu anyi? Tòo. Tumonayi bua tshinyi kabiena nanku to.

• Mabulunge ne mitoto kabiena ne bukole bua kulombola bantu mudi bena lubuku lua mitoto bamba amu to.

• Misangu ya bungi malu atubu bamba kaatu masunguluke to, ne adi mua kukumbanyina muntu yonso.

• Lelu eu, bena lubuku lua mitoto badi benza makumi bilondeshile lungenyi lua kale lua ne: mabulunge adi anyungulukila ku buloba. Pabi mu bulelela, mabulunge adi anyungulukila ku dîba.

• Malu avua bena lubuku lua mitoto bashilashilangane bambe bua muntu umue umue kaena apetangana to.

• Lubuku lua mitoto ludi lulonga bantu mu bitupa 12, anyi bimanyinu bia zodiaka, bilondeshile matuku abu a diledibua. Bu mudi buloba buenda bushintulula muaba udibu mu tshibuashibuashi mu bungi bua bidimu, matuku avuabu basuikakaje ne bimanyinu bia zodiaka kaatshiena umvuangana padi dîba dipitshila mu bisumbu bia mitoto biena mêna avuabu bapeshe bimanyinu abi to.

Batu bamba ne: bimanyinu bia zodiaka bitu biambuluisha bua kumanya bikadilu bia muntu. Mu bulelela, bantu batu baledibue mu dituku dimue kabatu ne bikadilu bia muomumue to; dituku dia diledibua dia muntu kadiena ne tshididi diamba bua bikadilu biende to. Pamutu pa bena lubuku lua mitoto kumona bantu mudibu menemene, badi bobu bamba mudi muntu muikale ne bikadilu kampanda anyi bumuntu kansanga bimanyina pa malu adi kaayi malelela to. Eu ki mmushindu wa dimona bantu bibi anyi?

DIMONA MALU ATSHILUALUA

Katshia anu ku kale, bantu batu baya kuebeja malu kudi bamonyi ba malu atshilualua. Bamue ba kudibu bavua bakebela diumvuija dia malu mu bintu bu mudi bia munda bia nyama ne bia bantu anyi ku mushindu udi tshitala tshizokola ntete. Bakuabu bavua batangila mudi bisote bia tshiayi anyi bia kafe bizoleka mu dikopo bua kushisha kuamba malu atshilualua. Lelu badi babuka ne tuarte, mmuenu, mbese (kabulu ka je de 6) ne bintu bikuabu bua kumona malu a muntu atshilualua. Dimona malu atshilualua mmushindu muimpe wa kumanya malu atshilualua anyi? Tòo. Tukonkononayi tshilumbu etshi.

Tukonkononayi tshilumbu tshia diumvuangana dia malu. Malu atubu bamba ku diambuluisha dia bintu bishilashilangane bia dibuka nabi atu misangu ya bungi abengangana. Nansha bobu babuke ne tshintu tshimue tshimue, badi bapatula malu mashilangane. Tshilejilu, muntu udi mua kuya kudi bamonyi ba malu atshilualua babidi badi babuka bonso ne tuarte tua muomumue bua kuebeja bualu kampanda budi butangila malu atshilualua. Mu kuamba kuimpe, mbimpe diandamuna dikale dia muomumue. Kadi misangu ya bungi diandamuna kaditu dia muomumue to.

Bantu bakadi bamona bintu bitu bamonyi ba malu atshilualua babuka nabi ne tshidi tshibasaka bua kubuka mu mushindu mubi. Bantu badi bakonkonone tshilumbu etshi badi bamba ne: tuarte anyi mmuenu ya dibuka nayi mbintu bia tshidingishilu tshianana, kabidi ne: mumonyi wa malu atshilualua utu utangila malu adi muntu wenza pamutu pa kutangila mu bintu biende abi. Tshilejilu, mumonyi mupiluke utu wela muntu nkonko ya bungi, uteleja malu adiye wamba, ne utangila mudiye wakula ne tshimuenekelu tshiende ne budimu buonso bua kumanya malu adi amutangila. Pashishe udi uditumbisha wamba mudiye mumanye malu ne nsombelu bia muntu eu udi ufuma ku dimuambilabi kayi mumanye to. Bamue bamonyi mbapetele makuta a bungi kudi bantu badi balua kubukisha malu kudibu bualu mbafikishe bantu aba ku dibeyemena.

TSHIDI BIBLE WAMBA

Lubuku lua mitoto ne dimona dia malu atshilualua bidi bifila lungenyi lua ne: malu atshilualua mmadianjila kulongolola. Mmuomu anyi? Bible udi utuambila ne: tudi ne bukokeshi bua kudisunguila malu atudi tuitaba ne atudi basue kuenza, kabidi ne: malu atudi tusungula bua kuenza adi atufikisha ku nsombelu kampanda matuku atshilualua.​—Yoshua 24:15.

Bualu bukuabu budi busaka batendeledi ba Yehowa bua kubenga lubuku lua mitoto ne dijinga kumanyina malu kudi bamonyi ba malu atshilualua mbua ne: Nzambi udi ubenga mishindu yonso ya lubuku. Mu Bible mudi mêyi aa: “Kabena ne bua kusangana munkatshi muebe . . . muena mbuku, muena majimbu, muntu udi ukeba bimanyinu bia malu atshilualua, muena mupongo, muntu udi ulowa bakuabu, muntu udi webeja malu kudi muena mbuku anyi kudi muntu udi wamba malu atshilualua, anyi muntu udi webeja bafue malu. Bualu muntu yonso udi wenza malu aa mmuntu mubi kumpala kua Yehowa.”a​—Dutelonome 18:10-12.