“Nzambi uvua penyi?”

PATU MAKENGA AKUATA BANTU, UTUKU UDIEBEJA NE: ‘NZAMBI UVUA PENYI’ ANYI? PESHI MU NSOMBELU WEBE, BUALU BUBI BUKADIKU BUKUSAKE BUA KUDIEBEJA BIKALA NZAMBI UTU UKUTABALELA WEWE ANYI?

Udi mua kuikala udiumvua anu bu Sheila wa mu États-Unis. Bu muvuaye mukolele mu dîku dia bantu bavua batendelela bikole, udi wamba ne: “Katshia ku buana buanyi mvua munange Nzambi bualu yeye ke udi mutufuke. Kadi tshitu muanji kudiumvua pabuipi nende to. Mvua ngela meji ne: uvua ummona, kadi anu ku bule. Tshivua ngumvua bu ne: Nzambi uvua munkine to, ne tshivua ngitaba ne: uvua untabalela to.” Bua tshinyi Sheila uvua welakana nunku? Udi umvuija ne: “Dîku dietu diakatuilangana ne ntatu milondangane, ne bivua bimueneka anu bu ne: Nzambi kavua utuambuluisha nansha kakese.”

Anu bu Sheila, udi mua kuikala mushindike ne: Nzambi Wa Bukole Buonso udiku. Kadi udi mua kuikala udiebeja bikalaye ukutabalela wewe. Yobo muntu muakane uvua ne ditabuja mu bukole ne mu meji bia Mufuki uvua pende welakana. (Yobo 2:3; 9:4) Yobo mumane kutuilangana ne makenga malondangane, kayi ne ditekemena dia ne: neajike, wakebeja Nzambi ne: “Bua tshinyi udi usokoka mpala webe, ungangata bu muena lukuna webe?”​—Yobo 13:24.

Ntshinyi tshidi Bible wamba? Padi ntatu itulukila bantu, tuele Nzambi tshilumbu pambidi anyi? Kudiku bijadiki bidi bileja ne: Nzambi udi utabalela bantu bonso mu kabujima anyi utabalela yonso wa kutudi pa nkayende anyi? Pa bidi bitangila muntu pa nkayende, yonso wa kutudi udiku mua kumanya bikala Nzambi ututabalela, utumvuila, umvua mututu tumvua, anyi utuambuluisha mu ntatu yetu anyi?

Mu biena-bualu bidi bilonda, netumone mudi bifukibua bitulongesha mudi Nzambi ututabalela. (Lomo 1:20) Pashishe, netukonkonone tshidi Bible wamba bua ditutabalela dia Nzambi. Paudi wenda ‘ufika ku dimumanya’ ku diambuluisha dia bifukibua biende ne Dîyi diende, dîba adi newende upeta dishindika dia ne: ‘udi ukutabalela.’​—1 Yone 2:3; 1 Petelo 5:7.