Muoyo wetu mutoke udi usankisha Yehowa
‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’—NSU. 27:11.
1, 2. (a) Mukanda wa Yobo udi uleja ne: Satana udi ubanda banganyi? (b) Ntshinyi tshidi tshileja ne: Satana utshidi anu upenda Yehowa?
YEHOWA wakitabila Satana bua atete muoyo mutoke wa musadidi wende Yobo. Yobo wakajimija bimuna biende, bana bende ne makanda ende a mubidi. Kadi Satana kavua mubande anu muoyo mutoke wa Yobo nkayende to. Wakamba ne: ‘Dikoba ku dikoba! Bulelela, bionso bidi muntu nabi yeye neabifile bua kusungila muoyo wende.’ Mêyi ende aa akajula tshilumbu tshivua tshitangila Yobo ne bantu bakuabu tshidi tshitungunuka too ne lelu.—Yobo 2:4.
2 Bidimu bitue ku 600 panyima pa makenga a Yobo, nyuma muimpe wakasaka Solomo bua kufunda ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ (Nsu. 27:11) Bidi bimueneka patoke ne: tshikondo atshi Satana utshivua anu upenda Yehowa. Mupostolo Yone wakumvua dîyi mu tshikena-kumona kampanda tshiakamonaye diamba ne: Satana uvua ubanda basadidi ba Nzambi mu tshikondo tshivuabu bamuipate mu diulu, matuku makese bamane kujadika Bukalenge bua Nzambi mu 1914. Nansha mu matuku a ku nshikidilu atudi aa, utshidi anu wela muoyo mutoke wa basadidi ba Nzambi mpata.—Buak. 12:10.
3. Mmalu kayi a mushinga atudi tupeta mu mukanda wa Yobo?
3 Tukonkononayi malu asatu a mushinga atudi tulonga mu mukanda wa Yobo. Bua kumpala, makenga a Yobo adi aleja patoke muluishi wa bantu ne kudi makenga a basadidi ba Nzambi afumina. Satana Diabolo ke muluishi au. Buibidi, nansha tuetu bapete makenga a mushindu kayi, kuikala mu malanda mimpe ne Nzambi kudi kutuambuluisha bua kulama muoyo wetu mutoke. Buisatu, Nzambi udi utuambuluisha padi makenga atukuata ne patudi mu mateta anu bu muvuaye muambuluishe Yobo. Yehowa udi utukuatshisha lelu ku diambuluisha dia Dîyi diende, bulongolodi buende ne nyuma wende.
Tumanyayi udi muluishi wetu mulelela
4. Mbanganyi badi bakebeshe ntatu idi pa buloba?
4 Bantu ba bungi kabatu bitaba ne: Satana Diabolo udiku to. Nunku, nansha mudi ntatu idiku lelu ibatonda, ki mbamanye ne: yeye ke udi uyikebesha to. Kadi bantu nkayabu ke badi badikebela ntatu ya bungi idibu nayi. Adama ne Eva bakajinga bua kudienzela malu, kabayi ku bukokeshi bua Mufuki wabu. Kutuadijila anu pine apu, bantu batu benza anu malu mabi. Tshidibi, Diabolo ke uvua mudinge Eva, mumufikishe ku ditombokela Nzambi. Yeye ke udi mulongolole malu munkatshi mua bantu bena mapanga ne bena lufu bua bikale ku bukokeshi buende. Bu mudi Satana muikale “nzambi wa tshikondo etshi,” bantu badiye ulombola badi ne ngikadilu ya buena yende bu mudi: lutambishi, bilumbu, mukawu, lukuka, mashimi ne butomboji. (2 Kol. 4:4; 1 Tim. 2:14; 3:6; bala Yakobo 3:14, 15.) Ngikadilu eyi mmikebeshe bimvundu, lukinu, dikosangana dia mishiku ne dibuejakaja dia malu mu malu a tshididi ne mu bitendelelu. Malu aa mmakebele bantu makenga a bungi.
5. Ntshinyi tshitudi ne bua kuenza ne dimanya dimpe ditudi nadi?
5 Tuetu Bantemu ba Yehowa tudi ne dimanya dimpe ditambe! Tudi bamanye kudi ntatu idiku lelu mifumine. Nunku, tudi ne dibanza dia kuambila bantu kudi makenga atudi nawu afumina. Tudi kabidi ne disanka dia kuikala ku luseke lua Yehowa Nzambi mulelela ne dia kumvuija bantu muikalaye mua kubutula Satana ne kujikija ntatu.
6, 7. (a) Nnganyi udi ukengeshisha batendeledi ba Yehowa? (b) Leja mutudi mua kuidikija Elihu.
6 Satana ke udi ukebesha ntatu ya bungi idi pa buloba, ne anu yeye ke udi ukengeshisha batendeledi ba Nzambi. Mmudisuike bua kututeta. Yezu Kristo wakambila mupostolo Petelo ne: ‘Simona, Simona, mona, Satana wakalomba bua kunuangata bualu bua kunusengaye bu ntete.’ (Luka 22:31) Bia muomumue, muntu yonso udi ulonda mu makasa a Yezu neapete makenga mu mushindu kampanda anyi kansanga. Petelo wakafuanyikija Diabolo ne ‘nyama wa ntambue udi ukungula, ukeba bantu ba kudiaye.’ Paulo pende wakamba ne: ‘Bantu bonso badi basue kuikala bena kanemu mu Kristo Yezu nebakengeshibue.’—1 Pet. 5:8; 2 Tim. 3:12.
7 Mmushindu kayi utudi mua kuleja ne: tudi bamanye bimpe muluishi wetu padi lutatu kampanda lukuata muena Kristo netu? Pamutu pa kumushiya nkayende, tuenze bu Elihu uvua muyukile ne Yobo anu bu mulunda wende mulelela. Tudi ne bua kuambuluisha muanetu au bua kuluishaye muluishi wetu bonso Satana. (Nsu. 3:27; 1 Tes. 5:25) Tshipatshila tshietu ntshia kumuambuluisha bua kulamaye muoyo wende mutoke nansha mu makenga a mushindu kayi ne kusankisha Yehowa.
8. Bua tshinyi Satana kavua mukokeshe bua kupangisha Yobo bua kutumbishaye Yehowa?
8 Tshintu tshia kumpala tshivua Satana mufikishe Yobo ku dijimija mbimuna biende. Bimuna abi bivua ne mushinga wa bungi bualu bivua mua kuikala bimupetesha makuta. Kadi Yobo uvua kabidi ubilambula Nzambi. Panyima pa Yobo mumane kujidila bana bende, ‘wakabika ne dinda dionso, wakafila milambu ya kosha bu muakadi bungi buabu bonso. Bualu bua Yobo wakamba ne: Bumue bana banyi ba balume bakuenza malu mabi, bakupenda Nzambi mu mitshima yabu. Yobo wakadi wenza nunku misangu yonso.’ (Yobo 1:4, 5) Yobo uvua ne tshibidilu tshia kulambula Yehowa nyama. Pakamukuata dikenga, katshivua kabidi ne tshia kulambula to. Katshivua ne “biuma” bia kutumbisha nabi Yehowa. (Nsu. 3:9) Kadi wakatungunuka ne kumutumbisha ne mishiku yende.
Tukoleshe malanda etu ne Yehowa
9. Ntshintu kayi tshia mushinga tshitudi natshi?
9 Nansha tuetu babanji anyi bapele, bansonga anyi bantu bakulumpe, bikale ne makanda a mubidi anyi tusama, tudi mua kuikala mu malanda mimpe ne Yehowa. Kuikala nende mu malanda mimpe nekutuambuluishe bua kulama muoyo wetu mutoke ne kumusankisha mu makenga a mushindu yonso. Nansha bantu bavua kabayi ne dimanya dia bungi dia malu a mu Bible bakashala bashindame ne kulama muoyo wabu mutoke.
10, 11. (a) Ntshinyi tshivua muanetu mukuabu wa bakaji muenze pavuabu batete muoyo wende mutoke? (b) Lulamatu luende luakaleja tshinyi?
10 Tuangate tshilejilu tshia muanetu wa bakaji Valentina Garnovskaya. Muanetu eu ngumue wa ku Bantemu ba mu ditunga dia Russie bavua balame muoyo wabu mutoke nansha mu makenga makole anu bu muvua Yobo muenze. Mu 1945 pavuaye ne bidimu 20, muanetu mukuabu wa balume wakamuyisha. Wakalua kuyukila nende malu a mu Bible misangu ibidi, kadi Valentina kakamumona kabidi to. Nansha nanku, wakatuadija kuyisha bena mutumba nende. Bakamukuata bua bualu abu ne kumukoselabu bidimu muanda mukulu bia buloko. Pakamulekelabu mu 1953, wakatuadija kabidi kuyisha. Kumukuatabu kabidi musangu eu bua bidimu dikumi. Yeye mumane kuenza bidimu bia bungi mu buloko abu, bakamutuma mu bukuabu. Muomu amu, kupetanganaye ne bana betu ba bakaji bavua ne Bible umue. Dimue dituku muanetu wa bakaji mukuabu wakaleja Valentina Bible au. Wakumvua disanka dia bungi bualu ke Bible wende wa kumpala uvuaye mumone katshia wamona wa muanetu uvua mulue kumuyisha mu 1945.
11 Mu 1967, Valentina wakapatuka mu buloko ne kupetaye mushindu wa kutambula bua kuleja mukavuaye mudilambule kudi Yehowa. Wakayisha bikole too ne pakaluabu kumukuata kabidi mu 1969, ne kumufundilabu buloko bua bidimu bisatu. Kadi wakatungunuka anu ne kuyisha. Mu 2001 kumpala kua kufuaye, ukavua muambuluishe bantu 44 bua kulua Bantemu. Bidimu bionso bivuaye muenze mu buloko bivua 21. Uvua muitabe bua kujimija bintu bionso, nansha budikadidi buende anu bua kulama muoyo mutoke. Valentina wakamba kumpala kua kufuaye ne: “Tshivua ne kuanyi to. Bintu bianyi bionso bivua bikumbana mu tshibuta tshimue, kadi buanyi meme bivua bikumbane ne mvua ne disanka dia kuenzela Yehowa mudimu.” Bushuwa, muanetu eu uvua muleje patoke mudi mêyi a Satana a ne: muntu nansha umue kena mua kushala mulamate Nzambi mu makenga mikale a dishima. (Yobo 1:9-11) Kakuyi mpata, uvua musankishe Yehowa ne Yehowa mmuindile ne muoyo kulu kulu dîba dikalaye ne bua kumubisha yeye ne bantu bakuabu ba lulamatu ku lufu.—Yobo 14:15.
12. Dinanga didi ne muaba kayi mu malanda etu ne Yehowa?
12 Tudi balunda ba Yehowa bualu tudi bamunange. Ngikadilu yende idi itusankisha ne tudi tuenza muetu muonso bua kuenza disua diende. Katuena banange Yehowa bua kupeta bintu bu mudi Diabolo wamba to, kadi tudi bamunange ku budisuile ne muoyo umue. Dinanga dikole edi didi dituambuluisha bua kulama muoyo mutoke mu mateta. Yehowa pende udi ‘ulengeja njila wa bansantu bende.’—Nsu. 2:8; Mus. 97:10.
13. Mmushindu kayi udi Yehowa umona mudimu utudi tumuenzela?
13 Dinanga didi ditusaka bua kutumbisha dîna dia Yehowa nansha tuetu katuyi badiumvua ne bukole. Yehowa udi umona muoyo wetu ne kena utulumbuluisha patudi katuyi tukokesha kuenza bituvua mua kuenza. Tshitudi tuenza tshidi ne mushinga anu bu mudi tshidi tshitusaka bua kutshienza ne mushinga. Nansha muvua Yobo ne kanyinganyinga ne mutantamene ntatu ya bungi, wakambila balunda bende ba dishima muvuaye munange njila ya Yehowa. (Bala Yobo 10:12; 28:28.) Mu nshapita wa ndekelu wa mukanda wa Yobo, Nzambi wakaleja tshiji tshiende kudi Elifaza, Biledada ne Sôfa bualu kabavua bambe bulelela to. Kadi wakaleja muvuaye muanyishe Yobo bualu wakamubikila misangu inayi ne: “Muntu wanyi” ne kumuambila bua alombele bantu babi abu Nzambi. (Yobo 42:7-9) Tuenzayi petu malu mimpe bua Yehowa atuanyishe.
Yehowa utu wambuluisha basadidi bende badi bamulamate
14. Ntshinyi tshivua Yehowa muenze bua kuambuluisha Yobo bua kulongololaye meji ende?
14 Yobo wakalama muoyo wende mutoke nansha muvuaye muena mapanga. Uvua utupakana imue misangu pavuaye mu makenga. Tshilejilu, wakambila Yehowa ne: ‘Ndi ndila kuudi ne kuena witaba kundi, udi unkengesha ku bukole bua tshianza tshiebe.’ Yobo uvua kabidi wangata didibingisha ne mushinga wa bungi pakambaye ne: “Tshiena muntu mubi,” ne “kakuena bienzedi bia tshimbambila ku bianza bianyi, kulomba kuanyi kakuena ne lubombo.” (Yobo 10:7; 16:17; 30:20, 21) Nansha nanku, Yehowa wakamuambuluisha ne dinanga dionso. Wakamuela nkonko ivua mua kumuambuluisha bua kubenga kudiangata ne mushinga wa bungi. Nkonko ayi yakambuluisha kabidi Yobo bua kumona bunene bua Nzambi ne bukese bua bantu. Yobo wakitaba mibelu ya Yehowa ne kulongolola meji ende.—Bala Yobo 40:8; 42:2, 6.
15, 16. Leja mudi Yehowa wambuluisha basadidi bende lelu.
15 Yehowa udi ulombola basadidi bende ne ubapesha mibelu idi ibambuluisha. Tshilejilu, Yezu Kristo wakalambula muoyo wende bua mibi ya bantu. Ku diambuluisha dia mulambu au, tudi mua kudia malanda mimpe ne Nzambi nansha mutudi bantu babi. (Yak. 4:8; 1 Yone 2:1) Patudi mu ntatu, tudi tulomba Nzambi nyuma wende bua atukoleshe. Tudi kabidi ne Bible mujima. Tuetu tumubala ne tuela meji pa bitudi tubala, tudi tupeta bukole bua kutantamena ntatu idi mua kutukuata. Kudilongela kudi kutuambuluisha bua kumvua tshilumbu tshia bumfumu butambe bunene bua Nzambi ne tshia muoyo wetu mutoke bimpe.
16 Tudi kabidi ne diakalenga dia kuikala mu tshitupa tshia bulongolodi bua Yehowa tshidi pa buloba ne dia kupeta malongesha ende ku butuangaji bua ‘mupika wa lulamatu ne wa budimu.’ (Mat. 24:45-47) Bisumbu bitue ku 100 000 bia Bantemu ba Yehowa bidi bienza bisangilu bidi bitulongesha ne bikolesha ditabuja dietu bua kutantamena ntatu. Tshilejilu tshia Sheila muanetu wa bakaji wa bidimu 15 wa mu Allemagne tshidi tshileja bulenga bua bisangilu.
17. Leja mudi dibuela mu bisangilu misangu yonso dikale dimpe.
17 Dimue dituku, bena mu kalasa ka ba Sheila kabavua ne mulongeshi to. Balongi babu bakajinga kumanya malu atshilualua ku diambuluisha dia tshintu tshidibu babikila ne: Ouija. Diakamue Sheila wakapatuka mu kalasa, ne wakasanka bua muvuaye mupatuke bualu malu akashala kuenzeka kaavua mimpe to. Pavua balongi babu bakeba kumanya malu atshilualua, bamue ba kudibu bakumvua ne: bademon bavua mu kalasa ne kunyemabu bua buôwa. Kadi ntshinyi tshivua tshiambuluishe Sheila bua kudianjila kupatuka mu kalasa? Udi wamba ne: “Matuku makese kumpala kua bualu ebu kuenzeka, tuvua balonge mu bisangilu bua njiwu ya malu a Ouija. Nunku, mvua mumanye tshia kuenza. Mvua musue kusankisha Yehowa anu mudi Bible wamba mu Nsumuinu 27:11.” Sheila uvua ne diakalenga bualu uvua muye mu bisangilu ne muteleje bivuabu balongeshamu.
18. Udi mudisuike bua kuenza tshinyi?
18 Tuetu bonso, tudisuike bua kulonda mibelu yonso idi bulongolodi bua Nzambi butupesha. Tudi tupeta mibelu ne diambuluisha bidi bikengela patudi tubuela mu bisangilu misangu yonso, tubala Bible, tulonga mikanda idi imumvuija, tusambila ne tusombeshangana ne bena Kristo netu bashindame. Yehowa mmusue bua tutshimune ne mmushindike ne: netushale anu bamulamate. Tudi ne diakalenga dinene dia kutumbisha dîna dia Yehowa, kulama muoyo wetu mutoke ne kumusankisha.
Udi muvuluke anyi?
• Satana mmukebeshe nsombelu kayi ne ntatu kayi?
• Ntshintu kayi tshia mushinga tshitudi natshi?
• Ntshinyi tshidi tshituambuluisha bua kudia malanda ne Yehowa?
• Yehowa udi utuambuluisha mushindu kayi lelu?
[Tshimfuanyi mu dibeji 8]
Udiku umvua muoyo ukusaka bua kumanyisha bantu malu audi mumanye anyi?
[Tshimfuanyi mu dibeji 9]
Tudi mua kuambuluisha bena Kristo netu bua kulama muoyo wabu mutoke
[Tshimfuanyi mu dibeji 10]
Valentina wakitaba bua kujimija bintu bionso anu bua kulama muoyo wende mutoke