Makenga ndinyoka dia kudi Nzambi anyi?

LUZIA UDI UTEBUKILA KU MUKOLO WA DIA BAKAJI. Patshivuaye muana, wakapeta disama dia tshiambu dia tuneke ditu dikuata tujilujilu tudi tufumina ku buongo. Patshivuaye ne bidimu 16, mamu uvuaye wenzela mudimu wakamuambila ne: “Nzambi mmukutue disama edi bualu uvua wenzela mamuebe malu mabi kuyi umutumikila to.” Bidimu bia bungi pashishe, Luzia utshidi anu uvuluka muvua bualu ebu bumutonde bikole.

PAVUABU BAMBILE DAMARIS NE: UVUA NE DISAMA DIA KANSERE KA MU BUONGO, tatuende wakamuebeja ne: “Tshiudi muenze ntshinyi bua disama edi kukukuatadi? Udi ne bua kuikala muenze bualu bubi menemene. Ke bualu kayi Nzambi mmukutue disama edi.” Mêyi a tatuende aa akamusama ku muoyo bikole.

Lungenyi lua ne: masama ndinyoka dia kudi Nzambi ndutuadije kale. Mukanda kampanda udi wamba ne: “Bantu ba bungi mu tshikondo tshia Kristo bavua bamba ne: masama avua afumina ku mpekatu wa muntu anyi ya bena mu dîku diabu, ne bavua bamutuawu bua mpekatu au.” (Manners and Customs of Bible Lands) Mukanda mukuabu kabidi udi wamba ne: Mu bidimu bia bungi biakalonda, “bamue bantu bavua bela meji ne: Nzambi uvua unyoka bantu ne bipupu bia masama bua mpekatu yabu.” (Medieval Medicine and the Plague) Nanku pavua miliyo ya bantu ba ku Mputu bafue ku tshipupu tshia disama mu bidimu bia 1300, Nzambi ke uvua unyoka bantu babi anyi? Anyi tshipupu etshi tshivua tshifumine anu ku tuishi tua masama anu mudi bakebuludi ba malu a luondapu bambe? Bamue bantu badi mua kudiebeja ne: Nzambi utuku bushuwa ukengesha bantu ne masama bua mpekatu yabu anyi?a

ELABI MEJI: Bikalabi ne: masama anyi makenga ke bitu Nzambi unyokangana nabi, bua tshinyi Muanende Yezu wakondopa bantu bavua basama? Kavua mua kuikala ukupula dinyoka diakane dia Nzambi anyi? (Matayi 4:23, 24) Yezu kavua mua kutshiamakana Nzambi kumpala to. Wakamba ne: “Misangu yonso ndi ngenza malu adi amusankisha,” kuambaye kabidi ne: “Ndi ngenza anu mudi Tatu mungambile bua kuenza.”​—Yone 8:29; 14:31.

Bible mmuleje malu patoke. Yehowa Nzambi katu “wenza bibi” to. (Dutelonome 32:4) Tshilejilu, Nzambi kena mua kukuluisha ndeke, ushipesha bantu nkama ne nkama badi kabayi ne bualu bualu uvua musue kunyoka muntu mubi uvua nabu mu ndeke amu to! Abalahama muena mudimu wa lulamatu wa Nzambi wakamba biumvuangana ne buakane bua Nzambi ne: Nzambi kena mua ‘kujimija bantu bakane ne bantu babi popamue’ to. Kuambaye kabidi ne: Kabivua mua kuenzeka bua yeye “kuenza nanku to.” (Genese 18:23, 25) Bible udi wamba kabidi ne: “Nzambi katu wenza bualu bubi”; katu ‘wenza bibi nansha.’​—Yobo 34:10-12.

TSHIDI BIBLE UTUAMBILA BUA MAKENGA

Makenga atudi tutuilangana nawu ki ndinyoka dia kudi Nzambi bua mpekatu kampanda to. Yezu muine uvua muleje malu patoke mu tshilumbu etshi pavuaye yeye ne bayidi bende batuilangane ne muntu uvua muledibue mpofo. “Bayidi bende bakamukonka ne: ‘Labi, nnganyi uvua muenze mpekatu, mmuntu eu anyi mbaledi bende, bua kuledibuaye mpofu?’ Yezu wakandamuna ne: ‘Muntu eu anyi baledi bende kabavua benze mpekatu to, kadi bivua bua midimu ya Nzambi imueneshibue patoke mu bualu buende.’”​—Yone 9:1-3.

Bu muvua bantu ba bungi ne ngelelu ya meji mibi bua tshilumbu etshi, bivua ne bua kuikala bikemeshe bayidi ba Yezu pavuaye mubambile ne: muntu eu kavua muledibue mpofo bua mpekatu wende anyi wa baledi bende to. Yezu kavua muondope mpofo eu patupu to, kadi wakolola kabidi ngelelu wa meji mubi wa ne: makenga ndinyoka dia kudi Nzambi. (Yone 9:6, 7) Bantu badi ne masama makole lelu badi mua kupeta busambi pa kumanya ne: Nzambi ki ngudi ubakengesha to.

Bible udi utujadikila ne:

• “Nzambi kena mua kutetshibua ne malu mabi ne yeye muine kena uteta muntu nansha umue nanku to.” (YAKOBO 1:13) Mu bulelela, “malu mabi” akadi makengeshe bantu munkatshi mua bidimu, too ne masama, tunyinganyinga, ne lufu bikadi pa kujimina.

• Yezu Kristo “wakondopa bonso bavua basama.” (MATAYI 8:16) Pavua Muana wa Nzambi wondopa bonso bavua balua kudiye, uvua uleja tshialua Bukalenge bua Nzambi kuenza pa buloba bujima.

• “Yeye [Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—BUAKABULUIBUA 21:3-5.

NNGANYI UDI UKEBESHA MAKENGA?

Kadi bua tshinyi bantu badi batuilangana ne ntatu ne makenga bungi nunku? Bantu mbadiele lunkondo elu bidimu ne bidimu. Bikalabi ne: ki nNzambi udi ukebesha makenga, kadi nnganyi udi uakebesha? Netupete mandamuna a nkonko eyi mu tshiena-bualu tshidi tshilonda.