Bulenga nngikadilu udi umuenekela mu mêyi ne mu bienzedi

ANJI elabi meji mudi bualu kampanda bulenga budibu batuenzela mua kutukankamija ne kutukolesha! Patudi tujingulula ne: muntu kampanda udi ututabalela, bidi bituenza disanka. Bu mutu muntu yonso musue bua bamuenzele malu ne bulenga, ntshinyi tshitudi mua kuenza bua kupeta ngikadilu muimpe eu?

Kuikala ne bulenga kudi kumvuija kuditatshisha bua diakalenga dia bakuabu ne muoyo mujima, bimuenekela mu mêyi mimpe ne mu bienzedi bimpe, ki nkuikala anu muntu mumanye malu ne mukalanga patupu to. Dinanga dikole ne diditeka pa muaba wa bakuabu ke bidi bisaka muntu bua kuikala ne bulenga bulelela. Bualu bua mushinga budi ne: bulenga ebu ngumue wa ku ngikadilu ya dimuma dia nyuma muimpe wa Nzambi didibu balombe bena Kristo bua kuikala nadi. (Gal. 5:22, 23) Tudi ne bua kuikala ne bulenga. Nunku tumonayi mudi Yehowa ne Muanende baleje ngikadilu eu ne mutudi mua kubidikija.

YEHOWA MMUIMPE KUDI BANTU BONSO

Yehowa mmuimpe kudi bantu bonso, too ne kudi “bantu badi kabayi ne dianyisha ne kudi bantu babi,” ne utu ubatabalela. (Luka 6:35) Tshilejilu, Yehowa “utu ubandishila bantu babi ne bantu bimpe dîba diende ne ulokeshila bantu bakane ne badi kabayi bakane mvula.” (Mat. 5:45) Nansha bintu bidi Yehowa mufuke bua tuikale ne muoyo bidi biambuluisha too ne bantu badi kabayi bamuitaba bu Mufuki wabu, ne bidi bibapetesha pabu ndambu wa disanka.

Tshilejilu tshitambe buimpe tshia bulenga tshidi tshimuenekela mu tshivua Yehowa muenzele Adama ne Eva. Adama ne Eva bamane kuenza mpekatu, “bakatelakaja mabeji a mfigi, kudienzelabu bia kujika nabi tshimono.” Kadi Yehowa uvua mumanye ne: bavua dijinga ne bilamba biakanyine bua kusombelabu pambelu pa Edene, muaba ukavua buloba mpindieu buedibue mulawu bua buikale ne “mêba ne nyiny’a tshisonga.” Nunku Yehowa wakakumbaja dijinga diabu ne bulenga buonso, ‘kuangataye biseba, kubenzelaye bivualu bile.’​—Gen. 3:7, 17, 18, 21.

Nansha mudi Yehowa wenzela “bantu bakane ne badi kabayi bakane” malu malenga, mmusue kuenzela nangananga batendeledi bende ba lulamatu. Tshilejilu, mu matuku a muprofete Zekâya, biakatonda muanjelu kampanda bikole pavuaye mumone ne: bavua bimanyike dibakulula dia ntempelo mu Yelushalema. Yehowa wakateleja muanjelu au, kumuandamunaye ne “mêyi mimpe adi akolesha.” (Zek. 1:12, 13) Yehowa wakenza bia muomumue ne muprofete Eliya. Dimue dituku, malu avua matonde Eliya bikole, kulombaye too ne Yehowa bua amushipe. Yehowa wakamumvuila, kutumaye muanjelu bua kumukolesha. Nzambi wakajadikila kabidi muprofete ne: kavua nkayende to. Eliya mumane kupeta mêyi mimpe ne diambuluisha divuaye ukeba, wakapeta bukole bua kukumbaja mudimu wende. (1 Bak. 19:1-18) Munkatshi mua batendeledi ba Nzambi, nnganyi udi wa kumpala ku dileja ngikadilu mutambe buimpe wa Yehowa wa bulenga eu?

YEZU MMUNTU WA MALU MALENGA A DIKEMA

Pavua Yezu uyisha pa buloba, uvua mumanyike bu muntu wa malu malenga uvua utabalela bantu. Kavua muena malu makole anyi wenzejangana malu ku bukole to. Bu muvuaye uditeka pa muaba wa bakuabu, wakamba ne: “Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole. . . . Bualu mutshi wanyi wa tshikokedi mmuimpe.” (Mat. 11:28-30) Bantu bavua bamulonda muaba wonso uvuaye uya bualu uvua ne malu malenga. Bu muvua Yezu ‘ubumvuila luse,’ wakabadiisha, kuondopaye babedi babu ne bantu bavua ne matekete, ne kubalongeshaye “malu a bungi” a Tatu wende.​—Mâko 6:34; Mat. 14:14; 15:32-38.

Yezu uvua umvuila bantu ne ujingulula tshivuabu bakeba, bileja muvuaye muena malu malenga a dikema. Nansha pavua bantu bavua bakeba Yezu ne muoyo mujima balua kudiye dîba divuaye kayi mutekemene, uvua ubakidila anu “bimpe.” (Luka 9:10, 11) Tshilejilu, mukaji kampanda uvua ne disama dia mashi apueka wakalua kudiye, yeye kulenga tshilamba tshiende tshia pa mutu nansha muvuaye mukoya bilondeshile mikenji, mutekemene ne: neumvue bimpe. Wakashala ne buôwa, kadi Yezu kakamutandisha to. (Lew. 15:25-28) Wakumvuila mukaji uvua musame bidimu 12 au luse, kumuambilaye ne: “Muananyi wa bakaji, ditabuja diebe ndikuondope. Ndaku mu ditalala, umvue bimpe ku disama diebe dikole.” (Mâko 5:25-34) Etshi si ntshienzedi tshia bulenga tshia dikema!

BULENGA BUDI BULOMBA KUENZELANGANA MALU MIMPE

Bilejilu bitukadi batele bidi bituleja ne: bulenga bulelela budi bumuenekela mu tshienzedi. Yezu wakafila tshilejilu tshia muena Samalea wa muoyo muimpe bua kuleja ne: mbimpe bulenga bumuekele mu tshienzedi. Nansha muvua bena Samalea bakinangane ne bena Yuda, muena Samalea wa mu tshilejilu atshi wakumvua luse bua muntu uvuabu banyenge bintu, batute ne bashiye mufue tshipuka mu njila au. Bulenga buakasaka muena Samalea au bua kuenza bualu. Wakatabalela mputa ya muntu au, kuyaye nende ku nzubu wa tshilala benyi. Wakashila mutangidi wa nzubu au makuta bua amulame, kumuambila too ne bua kulua kumupingajila makuta a pa mutu avuaye mua kutula.​—Luka 10:29-37.

Nansha mudi bulenga butamba kumuenekela mu bienzedi, budi mua kumuenekela kabidi mu mêyi mimpe adi akankamijangana. Bible wamba ne: “Kanyinganyinga mu muoyo wa muntu kadi kawunemesha bujitu,” kadi udi wamba kabidi ne: “Dîyi dimpe didi diwusanguluja.” (Nsu. 12:25) Tuetu ne bulenga ne buimpe, netupeteshe bakuabu disulakana ne netubambile malu adi abakolesha.a Mêyi etu mimpe nealeje ne: tudi tubatabalela. Tuetu babakankamije nanku, nebapite bimpe ne ntatu idibu batuilangana nayi.​—Nsu. 16:24.

MUA KUPETA BULENGA

Bu mudi bantu bonso bafukibue “mu tshimfuanyi tshia Nzambi,” mbakumbane bua kuikala ne ngikadilu wa bulenga. (Gen. 1:27) Tshilejilu, Yulio (mfumu wa basalayi muena Lomo uvua mulame Paulo muye nende ku Lomo) wakenzela Paulo malu “ne bulenga, kumuanyishilaye bua kuya kudi balunda bende ne bua kupeta diambuluisha kudibu” mu tshimenga tshia Sidona. (Bien. 27:3) Pashishe bena mu tshidiila tshia Melita bakenzela Paulo ne bantu bavuaye nabu malu ne “bulenga bua dikema” pavua mazuwa abu matshibukile mu mâyi. Bakabatemeshila too ne kapia bua kuota. (Bien. 28:1, 2) Nansha muvua malu avuabu babenzela au mimpe, bulenga kabuena bumvuija kuenza anu bualu buimpe ku mpukapuka to.

Bua kusankisha Nzambi bimpe menemene, tudi ne bua kuikala ne bulenga ne kuenza bua bushale mu ngikadilu yetu ne mu malu onso atudi tuenza. Bua bualu abu, Yehowa udi utuambila bua ‘kuvuala’ bulenga. (Kolos. 3:12) Kadi mu kuamba kuimpe, kabitu anu bipepele bua kuikala ne ngikadilu wa Nzambi eu to. Bua tshinyi? Tudi mua kubenga kuenzelangana malu ne bulenga bua bundu, bua buôwa, bua buluishi, anyi bua kalungenyi ka budinangi katshidi katulamate. Nansha nanku, tudi mua kutantamena lutatu elu tuetu tueyemena nyuma muimpe ne tuidikija tshilejilu tshia Yehowa tshia dienzelangana malu ne bulenga.​—1 Kol. 2:12.

Tudiku bamanye malu atudi mua kuakaja bua kuenzela bakuabu malu ne bulenga anyi? Mbimpe tudiebeje ne: ‘Ntuku ntelejangana muikale nditeka pa muaba wa bakuabu anyi? Ntuku ntabalela majinga a bakuabu ne lukasa luonso anyi? Mmusangu kayi wa ndekelu umvua muenzele muntu udi kayi muena mu dîku dietu anyi mulunda wanyi malu mimpe?’ Pashishe tudi mua kudifundila bipatshila, bu mudi kumanya malu a bungi adi atangila bantu ba muaba utudi, nangananga bena mu tshisumbu tshia bena Kristo. Tuetu benze nunku, tudi mua kumanya nsombelu yabu ne majinga abu. Tudi kabidi ne bua kuditatshisha bua kuenzela bakuabu malu ne bulenga mu mishindu itudi mua kujinga bua batuenzelawu petu bu tuetu bikale pa muaba wabu. (Mat. 7:12) Ndekelu wa bionso, tuetu balombe Yehowa diambuluisha, neabeneshe bionso bitudi tuenza bua kupeta bulenga.​—Luka 11:13.

BULENGA BUDI BUKOKA BAKUABU

Pavua mupostolo Paulo mutele malu avua mamusunguluje bu muena mudimu wa Nzambi, wakatela kabidi “bulenga.” (2 Kol. 6:3-6) Bantu bavua bakokibua kudi Paulo bualu uvua ubatabalela, bimuenekela mu mêyi ende ne mu bienzedi biende bimpe. (Bien. 28:30, 31) Tudi petu mua kukoka bantu ku bulelela tuetu ne bienzedi bimpe. Patudi tuenzela bantu bonso malu malenga, nansha badi batuluisha, tudi mua kubasankisha ne kutekesha luonji luabu. (Lomo 12:20) Mu kupita kua matuku, badi mua kufika too ne ku diteleja mukenji wa mu Bible.

Kakuyi mpata nebenzele bantu bungi kabuyi kubala babishibua ku lufu mu bulongolodi bupiabupia malu malenga abasankisha, pamuapa bua musangu wa kumpala. Dianyisha dikalabu nadi nedibasake bua kuenzelangana pabu malu malenga. Dîba adi muntu yonso wabenga kuenzelangana malu malenga ne kuambuluishangana kakusomba mu Bukalenge bua Nzambi kashidi to. Ku luseke lukuabu, bantu bikala Nzambi muanyishile bua kupeta muoyo wa tshiendelele nebenzelangane malu ne dinanga ne bulenga. (Mis. 37:9-11) Au newikale muaba wa bukubi ne ditalala bia dikema! Kadi pa kuamba tshikonso tshimpe atshi tshifike, mmasanka kayi atudi tupeta lelu tuetu tuenzelangana malu ne bulenga?

MASANKA ATUDI TUPETA

Bible udi wamba ne: “Muntu muimpe udi udienzela bimpe.” (Nsu. 11:17) Muntu yeye ne malu mimpe, bantu badi bakokibua kudiye ne batu bumvua bua kumuenzela pende malu mimpe. Yezu wakamba ne: “Nebanupimine penu ne tshipiminu tshinudi nupimina natshi bakuabu.” (Luka 6:38) Nunku muntu yeye ne malu malenga udi upeta balunda bimpe bipepele ne ubalama.

Mupostolo Paulo wakalomba bena mu tshisumbu tshia bena Efeso bua ‘bikale benzelangana malu ne bulenga, baditeka pa muaba wa bakuabu ne dinanga dionso, bafuilangana luse ne muoyo mujima.’ (Ef. 4:32) Padi bena mu tshisumbu bonso baditeka pa muaba wa bakuabu, benzelangana malu mimpe ne bajinga kuambuluishangana, tshisumbu tshijima tshidi tshipeta masanka a bungi. Bantu ba nunku kabatu bambangana mêyi mashile, bajanangana anyi bambangana mêyi a nsende adi atapangana ku muoyo to. Pamutu pa kumuangalajila bantu malu adi abanyangila lumu, badi baditatshisha bua kuamba malu adi akankamija bakuabu. (Nsu. 12:18) Tshidibu benza etshi tshidi tshikolesha tshisumbu mu nyuma.

Eyowa, bulenga nngikadilu udi umuenekela mu mêyi ne mu bienzedi. Patudi tuenzelangana malu ne bulenga, tudi tuleja mutudi ne ngikadilu mimpe ya Yehowa Nzambi wetu utu upeshangana bintu ne tshianza tshilekelela. (Ef. 5:1) Tuetu tuenza nanku tudi tukolesha bisumbu bietu ne tukoka bantu ku ntendelelu mukezuke. Tuikalayiku bamanyike misangu yonso bu bantu badi benzelangana malu ne bulenga!