Padi nsombelu mukole mua kupita nende

Tshilejilu, Sally,a wa mu États-Unis uvua mujimije bintu biende bia bungi mu tshipepele tshikole udi wamba ne: “Tshivua ngela meji ne: mvua mua kupita bimpe ne kanyinganyinga to. Munkatshi mua matuku a bungi lungenyi luanyi luvua lushikile.”

Mpindieu newenze tshinyi wewe mufuishe muntu uudi munange? Janice wa mu Australie udi pende wamba ne: “Pamvua mufuishe bana banyi babidi, ngakadiumvua anu bu ne: bavua basunsule mubidi wanyi wonso, bikengela bawulamakaje kabidi. Ke meme kusengelela Nzambi ne: ‘Nzambi wanyi, muoyo wanyi kawena ukuata kabidi to! Mfua nansha kufua! Tshiena musue kuikala kabidi ne muoyo to.’”

Daniel pende uvua ne dibungama dikole pavua mukajende muende masandi. Udi umvuija ne: “Pavua mukajanyi mutonde bua muvuaye muende, bivua bienze anu bu ne: bavua bantue kele ku muoyo. Biakansama bikole munkatshi mua ngondo mivule.”

Mu Tshibumba tshia Nsentedi etshi netumone mudi kuikala ne muoyo ne mushinga nansha

• Padi bipupu bitukuata

• Patudi tufuisha muntu utudi banange

• Padi muena dibaka netu wenda masandi

• Padi disama dikole ditutatshisha

• Patudi tudiumvua bashikile

Nunku, bualu bua kumpala, ntshinyi tshitudi mua kuenza padi bipupu bitukuata?