Padi bipupu bitukuata

“Pavua bintu bietu bionso bituvua nabi bijimine mu bitotshi ne mu mâyi avua mapasalale, tuakapanga tshia kuenza.”—Andrew wa mu Sierra Leone.

“Patuakapingana kumbelu panyima pa tshipepele tshikole, tuakasangana bintu bietu bionso binyangakaja. Biakatutonda bikole. Ke muananyi wa bakaji kudielaye panshi kutuadija kudila.”—David wa mu bidiila bia Vierges.

BIWIKALA ukadi mupanduke ku tshipupu kampanda, udi mua kumvua tshivua bakuabu badi bapanduke bumvue etshi: kanyinganyinga, dibenga kuitaba tshidi tshienzeke, dipanga tshia kuenza, dipampakana, dilota bintu bidi bikuatshisha buôwa. Bantu ba bungi badi bapanduke ku tshipupu batu batekeshibue ku muoyo ne batshioke mu lungenyi kabayi mua kuenza malu bu pa tshibidilu.

Biwikala mujimije bintu biebe bionso ku tshipupu kampanda, udi pebe mua kudimona mushikile mu lungenyi. Udi mene mua kutuadija kumona ne: muoyo kawena ne mushinga to. Kadi Bible udi uleja ne: muoyo webe udi ne mushinga ne udi mua kutekemena nsombelu muimpe mu matuku atshilualua.

KUMANYA BULELELA BUA MU BIBLE KUDI KUTUPETESHA DITEKEMENA

Muambi 7:8 udi wamba ne: “Ndekelu wa bualu mmuimpe kupita ntuadijilu wabu.” Paudi utuadija kuenza malu bu pa tshibidilu panyima pa tshipupu kampanda tshivua tshikukuate, udi mua kuanji kudimona kuyi ne ditekemena to. Kadi paudi udienzeja ku kakese ku kakese, malu adi mua kuakana mu nsombelu webe.

Bible udi wakula bua tshikondo tshikala bantu ‘kabayi mua kumvua kabidi tshiona tshia muadi anyi lubila lua dikenga to.’ (Yeshaya 65:19) Nebienzeke nanku pavuijabu buloba ebu mparadizu mu Bukalenge bua Nzambi. (Misambu 37:11, 29) Bipupu kabiakuikalaku kabidi nansha. Nebumbushe bua kashidi tunyinganyinga tuonso ne malu makole adi atufikila padi bipupu bitukuata, bualu Nzambi Wa Bukole Buonso udi ulaya ne: “Malu a kale kaakubavuila kabidi mu lungenyi, anyi kubabanda kabidi ku muoyo to.”—Yeshaya 65:17.

Anji elabi meji: Mufuki wetu mmulongolole ‘bua kukupesha matuku atshilualua mimpe ne ditekemena,’ mmumue ne: nsombelu wa ditalala mu bukokeshi buimpe bua Bukalenge bua Nzambi. (Yelemiya 29:11) Kumanya bulelela ebu kudiku mua kuenza bua nsombelu webe ikale ne mushinga anyi? Sally utukadi batele mu tshiena-bualu tshishale udi wamba ne: “Paudi uvuluka malu onso mimpe ikala Bukalenge bua Nzambi mua kutuenzela mu matuku atshilualua, bidi mua kukuambuluisha bua kupua malu avua makufikile muoyo ne kuitaba nsombelu uudi nende mpindieu.”

Kuenaku mua kulonga malu a bungi ikala Bukalenge bua Nzambi mua kuenzela bantu mu katupa kîpi emu anyi? Wewe muenze nanku, ikala mushindike ne: nansha muudi mukenge bua ntatu ivua mikufikile, muoyo webe udi ne mushinga mpindieu bu muudi muindile ne muoyo kuulu kuulu tshikondo tshikala bipupu kabiyi kabidi mua kukuata bantu. Kadi mpindieu, Bible udi ufila mibelu mimpe idi mua kukuambuluisha bua kupita bimpe ne malu adi makufikile bua tshipupu tshidi tshienzeke. Tukonkononayi bimue bilejilu.

Mvese ya mu Bible idi mua kukuambuluisha

Ikala ulala bikole.

“Dianza dijima dia dikisha ndimpe kupita manza abidi majima a mudimu mukole ne dipata dia lupepele.”—Muambi 4:6.

Bakebuludi ba malu badi bamba ne: padi lungenyi lua muntu lusama bua bualu kampanda bubi budi bumufikile, “yeye kayi ulala bikole . . . bidi mua kumusamisha kabidi bikole ne kumukebela ntatu, bimupangisha bua kuikala ne nkatshinkatshi mu meji ende.” Nunku, mbimpe kulala bikole.

Ambila bakuabu muudi udiumvua.

“Kanyinganyinga mu muoyo wa muntu kadi kawunemesha bujitu [anyi “kadi kamubungamija bikole,” dimanyisha], kadi dîyi dimpe didi diwusanguluja.”—Nsumuinu 12:25.

Ambila muena mu dîku dienu anyi mulunda webe wa pa muoyo muudi udiumvua. Panyima pa yeye mumane kukuteleja udi mua kukukankamija ne kukupesha mibelu mimpe.a

Tuishila mêsu ku malu malenga adi kumpala.

“Bilondeshile mulayi [wa Nzambi], tudi bindile diulu dipiadipia ne buloba bupiabupia, ne muomu emu nemuikale buakane.”—2 Petelo 3:13.

a Muntu yeye ne dibungama dia munanunanu ne kanyinganyinga kakole, bidi mua kukengela bua amonangane ne munganga.