Upuilayi Yehowa kanyinganyinga kenu kuonso
“Nudipuekeshe . . . muinshi mua tshianza tshia bukole tshia Nzambi, bua yeye anubandishe mu tshikondo tshiakane; eku bikale numuupuila kanyinganyinga kenu kuonso, bualu udi unukuba.”—1 PETELO 5:6, 7, NW.
1. Mmunyi mudi kanyinganyinga mua kuikala ne buenzeji kutudi, ne mmunyi mudibi mua kulejibua?
KANYINGANYINGA kadi mua kutamba kunyanga nsombelu wetu. Badi mua kukafuanyikija ne dibondakaja dia mêyi ku bisanji didi imue misangu mua kunyanga musambu musheme udi umvuika ku kadiomba. Pikala dîyi dia ku kadiomba kadiyi dinyangibue, musambu musheme udi mua kupatuka ne kupolesha bateleji. Kadi, lutoyitoyi lua ku bisanji ludi mua kunyanga musambu mulenga, kutufiikisha munda anyi kutuzengeja. Ke mudi kanyinganyinga mua kuikala ne buenzeji pa bupole buetu. Kadi mua kutamba kutusuya mu mushindu utudi katuyi nansha mua kudifila mu malu adi ne mushinga. Bushuwa, “dilama kanyinganyinga mu mutshima wa muntu ke tshiawinamija.”—Nsumuinu 12:25, NW.
2. Ntshinyi tshiakamba Yezu Kristo pa bidi bitangila “tunyinganyinga tua mu nsombelu”?
2 Yezu Kristo wakakula bua njiwu ya kuikala batanajibue kudi kanyinganyinga kakole. Mu mulayi wende pa bidi bitangila matuku a ku nshikidilu, wakadimuija ne: “Nudilame nuenu bine, bua mitshima yenu kayinemi bujitu mu budiavi ne mu bunuavi ne mu tunyinganyinga tua mu nsombelu, ne dituku adi kadivu kunuluila mu tshita ne mu tshita, bu buteyi. Bualu nedifikile aba buonso badi basombe pa buloba bujima. Nunku, nushale batabale ne nuenza misengelelu mu tshikondo tshionso, bua nufike ku dipanduka ku malu aa wonso adi ne bua kulua, ne kuimana kumpala kua Muana wa muntu.” (Luka 21:34-36, NW) Anu mutu budiavi ne bunuavi mua kulela bukata mu lungenyi, ke mudi “tunyinganyinga tua mu nsombelu” mua kutufikisha ku dijimija bukole bua mu lungenyi bua kumona malu mu bulelela buawu, ne kutufikisha ku bipeta bibi.
Tshidi kanyinganyinga
3. Mmunyi mudibo bumvuija “kanyinganyinga,” ne mbimue bintu kayi bidi bikakebesha?
3 “Kanyinganyinga” badi bakumvuija bu “dipampakana dinyongepeji anyi ditshinyishi dia lungenyi dikebesha pa tshibidilu kudi dikenga kampanda dikadi pabuipi anyi dindianjila kutekemenyibua.” “Ndiditatshisha anyi ndisumpakana ditshinyishi” kabidi “nnyanji mibi ya pa buayi ya buôwa ne ditshina itu pa tshibidilu imuenekela ku bimanyinu bia ntumikidi wa mubidi (bu mudi disuluila, dikondakana dia lubilu lua mashi, diombakana dia muoyo), ku mpata pa bidi bitangila dikalaku dia njiwu ne mushindu wayi, ne ku dibenga kueyemena bukokeshi bua kumona mua kupita nayi.” (Webster’s Ninth New Collegiate Dictionary) Nenku, kanyinganyinga kadi mua kuikala muanda-njinga. Munkatshi mua bikakebeshi bivule tudi tutela masama, dikulakaja, ditshina dia tshibawu, dijimija dia mudimu ne diditatshisha bua dikala bimpe dia dîku kampanda.
4. (a) Bua tshinyi bidi bimpe bua kuvuluka malu adi atangila bantu ne tunyinganyinga tuabo? (b) Bituikala ne kanyinganyinga, ntshinyi tshitudi mua kuenza?
4 Eyowa, tunyinganyinga tudi mishindu kabukabu anu mutuku mishindu anyi nsombelu kabukabu, idi mua kukalela. Bantu buonso kabatu bandamuna mushindu wa muomumue mu nsombelu kampanda to. Nenku, tudi ne bua kujingulula se: nansha pikala bualu kampanda kabuyi bututatshisha, budi mua kuikala mpokolo munene wa kanyinganyinga kudi bamue batendeledi netu ba Yehowa. Ntshinyi tshitudi ne bua kuenza pafika kanyinganyinga ku ditupangisha mushindu wa tuetu kutangija meji ku malelela a milowa ne masankishi a Dîyi dia Nzambi? Netuenze tshinyi bituatamba kunyongopejibua kudi kanyinganyinga mu mushindu utudi katuyi tukumbana bua kutungunuka ne kuteka malu adi atangila bumfumu bua Yehowa bukena mikalu ne muoyo mutoke wa bena nkristo muaba mupepele bua kumona? Pamu’apa katuakukumbana bua kushintulula nsombelu yetu to. Bishilangane, tudi ne bua kukeba biena-bualu bia mu Mifundu biatuambuluisha bua kumona mua kupita ne kanyinganyinga kakole kakebesha kudi mianda mikole ya mu nsombelu.
Diambuluisha didiku
5. Mmunyi mutudi mua kuenza malu mu diumvuangana ne Musambu wa 55:22?
5 Padi bena nkristo bakengela dikuatshisha dia mu nyuma ne batshiokesha kudi tunyinganyinga, badi mua kupetela dikankamijibua mu Dîyi dia Nzambi. Didi dipetesha buludiki bua kueyemena ne ditupetesha bijadiki bivule bidi bileja se: bu mutudi basadidi ba Nzambi balondi ba mikenji, katutu nkayetu nansha. Tshilejilu, Davidi mufundi wa misambu wakimba ne: “Upuila Yehowa yeye nkayende bujitu buebe, ne yeye neakukoleshe. Kakulekela nansha kakese bua muakane kutetukaye.” (Musambu wa 55:22, NW) Mmunyi mutudi mua kuenza malu mu diumvuangana ne mêyi aa? Mpa kuupuila Tatu wetu wa dinanga, wa mu diulu tunyinganyinga, ntatu, ditshina ne dishikila bietu. Kuenza nenku nekutuambuluishe bua kudiumvua mu dikubibua ne kuikala ne ditalala mu mutshima.
6. Bilondeshile Filipoi 4:6, 7, ntshinyi tshidi disambila mua kutuenzela?
6 Masambila menza pa tshibidilu ne muoyo mujima mmakengedibue bituasua kuupuila Yehowa bujitu buetu ne kabidi kanyinganyinga ketu kuonso. Ebi nebitutuadile ditalala munda muetu, bualu mupostolo Paulo wakafunda ne: “Kanusumpakanyi bua tshintu nansha tshimue, kadi, mu malu wonso, ku masambila ne misengelelu ne diela tuasakidila, numanyishe Nzambi milombo yenu; ne ditalala dia Nzambi didi dipite lungenyi kayi luonso bulenga, nedilame mitshima yenu ne makole a lungenyi luenu ku butuangaji bua Kristo Yezu.” (Filipoi 4:6, 7, NW) “Ditalala dia Nzambi” dikena kufuanyikija mbupole bua pa buabu budi nabu basadidi ba Yehowa badilambule nansha buobo bikale mu nsombelu mikole. Didi difumina ku malanda etu masheme a muntu pa nkayende ne Nzambi. Patudi tulomba spiritu munsantu ne tumushila mpunga bua kuikalaye ne buenzeji kutudi, katuena tusulakajibue ku ntatu yonso ya mu nsombelu to, kadi tudi bushuwa tubabidila dimuma dia spiritu dia ditalala. (Luka 11:13; Galatia 5:22, 23) Kanyinganyinga kakena katulewula to, bualu tudi bamanye se: Yehowa utu wenza bua bena tshisamba tshiende buonso bena lulamatu “basombe mu dikubibua” ne kakulekela bua tshintu nansha tshimue tshidi mua kutuenzela bibi musangu mule kutuvuilatshi.—Musambu wa 4:8, NW.
7. Mmudimu kayi udi bakulu bena nkristo mua kukumbaja mu dituambuluisha bua kumona mua kupita ne kanyinganyinga?
7 Kadi, netuenze tshinyi biatungunuka kanyinganyinga ketu, nansha patudi tueleela meji pa Mifundu ne tutungunuka ne kusambila? (Lomo 12:12) Bakulu bateka mu tshisumbu badi pabo dipa dia kudi Yehowa bua kutuambuluisha mu nyuma. Badi mua kutukankamija ne kutukuatshisha pa kutumika ne Dîyi dia Nzambi ne kusambila pamue netu ne buetu. (Yakobo 5:13-16) Mupostolo Petelo wakabela bakulu nende bua kudiisha tshisumbu tshia mikoko ku budisuile, ne dinanga dionso, ne diluijakana mu mushindu wa tshitembu. (1 Petelo 5:1-4) Bantu aba badi baditatshisha ne muoyo umue bua dikala bimpe dietu ne mbasue bua kuikala diambuluisha dinene. Bushuwa, bua kutamba kubabidila diambuluisha dia kudi bakulu ne bua kuikala ne makanda mimpe a mu nyuma mu tshisumbu, yonso wa kutudi udi ne bua kutumikila mubelu wa Petelo eu: “Nuenu bana kabidi, nuitabe bakulu: bonso nuvuale bupuekele mu nsombelu yenu. Bualu [Nzambi, NW] udi upala bena ditambisha, kadi bapuekele udi ubapa mapa ende.”—1 Petro 5:5, Mukenji Mulenga.
8, 9. Ndikankamija kayi ditudi mua kupetela mu 1 Petelo 5:6-11?
8 Petelo udi usakidila ne: “Nunku, nudipuekeshe muinshi mua tshianza tshia bukole tshia Nzambi bua yeye anubandishe mu tshikondo tshiakane; eku bikale numuupuila kanyinganyinga kenu kuonso, bualu udi unukuba. Lamayi nkatshinkatshi, nuikale batabale. Muluishi wenu, Diabolo, anu bu ntambue udi ukungula, udi utambakana ukeba muntu wa kudiaye. Kadi, numutantamenayi, bakole mu ditabuja, eku bamanye se: pa bidi bitangila makenga, malu a muomumue adi enzekela nsangilu mujima wa bana benu pa buloba bujima. Kadi, kunyima kua nuenu bamane kukenga tshitupa tshîpi, Nzambi wa bulenga buonso bukena butuakanyine, wakanubikila ku butumbi buende bua tshiendelele mu bobumue ne Kristo, neakomeshe yeye nkayende didibidija dienu, neanushindamije, neanukoleshe. Bukole buikale kudiye tshiendelele! Amen.”—1 Petelo 5:6-11, NW.
9 Ndikankamijibua kayipu pa kujingulula se: tudi mua ‘kuupuila Nzambi kanyinganyinga ketu kuonso bualu udi ututabalela’! Ne pikala kamue ka ku tunyinganyinga tuetu kafumina ku madikolela a Diabolo bua kunyanga malanda etu ne Yehowa pa kutukebela dikengeshibua ne makuabo makenga, kabienaku bikemesha bua kumanya se: muanda kayi wonso, ku ndekelu newupite biakane bua balami ba muoyo mutoke anyi? Eyowa, kunyima kua tuetu bamane kukenga bua tshikondo tshîpi, Nzambi wa bulenga buonso bukena butuakanyine neajikije didibidija dietu ne neatushindamije ne neatukoleshe.
10. Petelo wa kumudilu 5:6, 7 udi wakula bua ngikadilu kayi isatu idi mua kutuambuluisha bua kutuyisha kanyinganyinga?
10 Petelo wa kumudilu 5:6, 7 udi utuma lungenyi ku ngikadilu isatu idi mua kutuambuluisha bua kumona mua kupita ne kanyinganyinga. Umue wa kudiyi mbudipuekeshi, anyi “bupuekele bua tshieledi tshia lungenyi.” Mvese 6 udi ujika ne tshiambilu etshi: “mu tshikondo tshiakanyine,” udi uleja mudi lutulu lukengedibua. Mvese wa 7 udi uleja se: tudi mua kuupuila Nzambi tunyinganyinga tuetu ne dieyemena dionso ‘bualu udi utukuba,’ ne mêyi awu adi asaka ku [dileja] dieyemena dijima kudi Yehowa. Nenku, lekela tuanji kumona mudi budipuekeshi, lutulu, ne dieyemena dijima kudi Nzambi mua kutuambuluisha bua kutuyisha kanyinganyinga.
Mushindu udi budipuekeshi mua kutuambuluisha
11. Mmunyi mudi budipuekeshi mua kutuambuluisha bua kumona mua kupita ne kanyinganyinga?
11 Bituikala badipuekeshi, netuitabe se: Nzambi mmututambe kule ku ngenyi. (Yeshaya 55:8, 9) Budipuekeshi budi butuambuluisha bua kujingulula mikalu itudi nayi mu makole etu a kuela meji pa kufuanyikija ne mmuenenu mukungamiji wa bionso wa Yehowa. Udi umona bintu bitutu katuyi tusunguluja, anu bu mudibi bilejibue mu tshilumbu tshia muntu muakane Yobo. (Yobo 1:7-12; 2:1-6) Ku didipuekesha tuetu nkayetu “muinshi mua tshianza tshia bukole tshia Nzambi,” tudi tuitaba dikala kuinshi dietu mu malanda etu ne Mukokeshi Munene. Ku luetu luseke, bidi bituambuluisha bua kumona mua kupita ne nsombelu idiye mulekelele. Mitshima yetu idi mua kutekemena disulakajibua dia diakamue, kadi bu mudi ngikadilu ya Yehowa mipuangane mu ditshintshikila, mmumanye bimpe dîba ne mushindu watusankishaye. Nenku, anu bu bana batekete, tueyemenayi Yehowa ne didipuekesha dionso, bashindika se: neatuambuluishe bua kumona mua kujikija tunyinganyinga tuetu.—Yeshaya 41:8-13.
12. Mmunyi mudi kanyinganyinga pa bidi bitangila bukubi bua ku bintu bia ku mubidi mua kuenzejibua, bituatumikila ne budipuekeshi buonso mêyi adi mu Ebelu 13:5?
12 Budipuekeshi budi bulomba ditumikila mibelu ya mu Dîyi dia Nzambi ku budisuile, idi mua kutuyisha kanyinganyinga ketu. Tshilejilu, bikala kanyinganyinga ketu kafumina ku didiina ne kasuki mu dikeba bintu bia ku mubidi, nebitulengelele bua kueleela meji ku mubelu wa Paulo eu: “Wenu nsombedi kikadi wa bena bukonkoto, nusanke pa binudi nabi ku bianza; bualu [Nzambi, NW] muine wambile ne: ‘Tshiakukushiya, kabidi tshiakukulekela to.’” (Bena Ebreyi 13:5, Mukenji Mulenga) Pa kutumikila ne budipuekeshi buonso mubelu eu, bavule mbadiepule ku kanyinganyinga kanene pa bidi bitangila bukubi bua bintu bia ku mubidi. Nansha bikala pamu’apa bumonyi buabu bua mfranga kabuyi buvudijibue, kabuena bubabutula mu nyuma to.
Mudimu wa lutulu
13, 14. (a) Bu muena lutulu mu dinanukila, ntshilejilu kayi tshidi Yobo mufile? (b) Dindila ne lutulu luonso kudi Yehowa didi mua kutuenzela tshinyi?
13 Tshiambilu “mu tshikondo tshiakane” tshidi mu 1 Petelo 5:6 tshidi tshileja dikengedibua dia dinanukila ne lutulu. Imue misangu, lutatu ludi mua kunenga, ne abi bidi mua kuvudija kanyinganyinga. Nangananga mu nsombelu wa mushindu’eu, ke mutudi ne bua kushiya malu mu bianza bia Yehowa. Mulongi Yakobo wakafunda ne: “Monayi! Tudi tuamba aba bakananukila ne: mba diakalenga. Nuvua bumvue bua kunanukila kua Yobo ne nuakamona mushindu wakamuenzela Yehowa ku nshikidilu, ne nuakamona se: Yehowa mmuwule tente ne disuangana ne dilekelelangana bilema.” (Yakobo 5:11, NW) Bubanji bua Yobo buakakuluka, wakajimija bana dikumi mu lufu, wakakenga bua disama dikuate muendi, ne wakapishibua kudi bamusambi ba dishima. Bidi bia ku tshifukilu bua kuikala ne ndambu wa kanyinganyinga mu nsombelu ya mushindu’eu.
14 Mu bionso abi, Yobo uvua muntu wa tshitembu mu dinanukila ne lutulu. Bituapeta diteta dikole dia ditabuja, tudi ne bua kuindila bua kupeta disulakana, anu bu muakenzaye. Kadi Nzambi wakenza malu bua disanka diende, ndekelu wa bionso, wakasulakaja Yobo ku dikenga diende ne kumufuta ne bintu bivulavulayi. (Yobo 42:10-17) Kuindila ne lutulu luonso Yehowa kudi kukolesha dinanukila dietu ne kusokolola buondoke bua didifila dietu kudiye.—Yakobo 1:2-4.
Eyemena Yehowa
15. Bua tshinyi tudi ne bua kueyemena Yehowa muetu muonso?
15 Petelo wakabela bena kuitabuja nende bua ‘kuupuila Nzambi kanyinganyinga kabo kuonso, bualu udi utukuba.’ (1 Petelo 5:7) Nenku, tudi mua ne tudi ne bua kuikala ne dieyemena dijima kudi Yehowa. Nsumuinu 3:5, 6 [NW] udi wamba ne: “Eyemena Yehowa ne mutshima webe mujima ne kushindamenyi pa lungenyi luebe nkayebe. Umuvuluke mu njila yebe yonso, ne yeye, nealulamije tujila tuebe.” Bua malu mamonamona kale, bitu bikolela bamue badi ne kanyinganyinga kakole bua kueyemena bantu. Kadi, tudi ne kabingila menemene bua kueyemena Mufuki wetu, Mpokolo ne Mukuatshishi menemene wa muoyo. Nansha bituikala katuyi tueyemena ngandamuinu wetu nkayetu mu amue malu, pa tshibidilu tudi mua kueyemena Yehowa bua atupandishe ku bipupu.—Musambu wa 34:18, 19; 36:9; 56:3, 4.
16. Ntshinyi tshiakamba Yezu Kristo pa bidi bitangila kanyinganyinga bua bintu bia ku mubidi?
16 Kueyemena Nzambi kudi kulomba kutumikila Muanende, Yezu Kristo, wakalongesha malu akalongelaye kudi Tatuende. (Yone 7:16) Yezu wakambila balongi bende bua ‘kulamina biuma mu diulu’ pa kusadila Yehowa. Kadi, netuambe tshinyi bua bintu bia ku mubidi bidi bikengedibua bu mudi biakudia, bivualu ne tshisokomenu? “Lekelayi kuikala ne kanyinganyinga,” ke muakabela Yezu. Wakaleja patoke se: Nzambi utu udiisha nyunyu. Utu uvuadika bilongo bilenga bitambe. Bantu badi basadila Nzambi kabena ne mushinga kupita bintu ebi anyi? Bushuwa, ke mudibi. Nenku, Yezu wakabela ne: “Nunku, tungunukayi ne kukeba diambedi bukalenge ne buakane bua [Nzambi], ne bintu bikuabo ebi bionso nebanusakidilebi.” Yezu wakatungunuka ne: “Nenku, kanuditatshishi bua dituku didi dilonda, bualu dituku didi dilonda nedikale ne tuadi tunyinganyinga.” (Matayi 6:20, 25-34, NW) Eyowa, tutu tukengela biakudia, biakunua, biakuvuala, ne nzubu, kadi bitueyemena Yehowa, katuakunekesha ku diditatshisha bua kuikala ne bintu ebi to.
17. Mmunyi mutudi mua kufuanyikija dikengedibua dia kukeba diambedi Bukalenge?
17 Bua kukeba diambedi Bukalenge, tudi ne bua kueyemena Nzambi ne kuteka bipatshila bietu binene pa muaba wa kumpala. Mudinyi wa mu mâyi udi kayi ne tshiamu tshidi mua kumuambuluisha bua kupuyakana udi mua kudiina muinshi mua mâyi bua kukeba tshinyamankole tshidi ne mabue a bilenge munda muatshi. Eu mmushindu udi umupetesha mfranga bua dîku diende. Bushuwa, ntshipatshila tshiende tshinene! Kadi, ntshinyi tshidi ne mushinga mutambe bunene? Kapepe! Udi ne bua kutundubuka misangu ne misangu bua kuujulula kapepe mu bisulusulu biende. Kapepe ke tshiende tshintu tshia mushinga mukole. Bia muomumue, tudi mua kuikala mu mushindu kampanda peshi kansanga badiine mu bulongolodi ebu bua malu ne tshipatshila tshia kupeta bintu bia mu nsombelu bidi bikengedibua. Kadi, malu a mu nyuma adi alua muaba wa kumpala bualu muoyo mulelela wa bena mu nzubu muetu mmusuikakaja ku malu aa. Bua kuepuka diditatshisha dinekesha bua bintu bia ku mubidi bidi bikengedibua, tudi ne bua kueyemena Nzambi muetu muonso. Kabidi, ‘kuikala ne bivule bia kuenza mu mudimu wa Mukalenge’ kudi mua kutuambuluisha bua kutuyisha kanyinganyinga, bualu “disanka dia Yehowa” mmuaba wetu mukolesha.—1 Kolinto 15:58; Nehemiya 8:10.
Tungunuka ne kuupuila Yehowa kanyinganyinga kebe
18. Ntshijadiki kayi tshitudi natshi apa tshidi tshileja se: kuupuila Yehowa kanyinganyinga ketu kuonso kudi bulelela mua kutuambuluisha?
18 Bua kushala bashindamije ngenyi yetu pa malu a mu nyuma, tudi ne bua kutungunuka ne kuupuila Yehowa kanyinganyinga ketu kuonso. Tuvuluka dîba dionso se: utu bulelela utabalela bamusadidi bende. Tshilejilu: Bua bayende uvua kayi muena lulamatu kudiye, kanyinganyinga ka mukaji kampanda muena nkristo kakatamba kuvula, e kumufikisha too ne kudipanga mushindu wa kulala tulu. (Fuanyikija ne Musambu wa 119:28.) Kadi pa bulalu, uvua upuila Yehowa kanyinganyinga kende kuonso. Uvua ne bua kusokoluela Nzambi nyanji ya munda muende, umuambila se: yeye ne bana bende babidi ba bakaji batekete bavua mu dikenga. Kunyima kua yeye mumane kuela lubila mu masambila a tshisumi bua kupeta disulakajibua, uvua pa tshibidilu upeta mushindu wa kulala tulu, bualu uvua weyemena se: Yehowa uvua mua kumutabalela yeye ne bana bende. Mukaji eu wakashipa dibaka bilondeshile Mifundu, udi mpindieu ne disanka bualu wakasedibua kudi mukulu kampanda.
19, 20. (a) Ng’imue mishindu kayi idi mua kutuambuluisha bua kumona mua kupita ne kanyinganyinga? (b) Ntshinyi tshitudi ne bua kutungunuka ne kuenza ne kanyinganyinga ketu kuonso?
19 Tuetu bena tshisamba tshia Yehowa, tudi ne mishindu kabukabu ya mua kupita ne kanyinganyinga. Ditumikila Dîyi dia Nzambi ke didi nangananga ne diambuluisha divule. Tudi ne biakudia bivule bia mu nyuma bidi Nzambi utupetesha ku butuangaji bua “mupika wa lulamatu ne wa budimu,” kusakidila kabidi ne biena-bualu biambuluishi ne bisanguluji bidi bipatudibua mu Tshibumba tshia Nsentedi ne Réveillez-vous! (Matayi 24:45-47) Tudi ne diambuluisha dia kudi spiritu munsantu wa Nzambi. Masambila a pa tshibidilu ne a tshisumi neatambe kutuambuluisha. Bakulu bena nkristo bateka mbadiakaje ku budisuile bua kuambuluisha mu nyuma ne kukankamija.
20 Budipuekeshi ne lutulu bietu nkayetu bidi ne dikuatshisha dinene bua kumona mua kupita ne kanyinganyinga kadi mua kutusuya. Tshidi nangananga ne mushinga muvule ndieyemena dijima kudi Yehowa, bualu ditabuja dietu didi dienda diibakibua patudi tupeta diambuluisha ne buludiki biende. Ku luadi luseke, ditabuja Nzambi didi mua kutukuba bua malu kâtambi kutusuya. (Yone 14:1) Ditabuja didi ditusaka diakamue bua kukeba diambedi Bukalenge ne kutungunuka ne kuikala ne bivule bia kuenza mu mudimu wa disanka wa Mukalenge, udi mua kutuambuluisha bua kumona mua kupita ne kanyinganyinga. Mudimu wa mushindu’eu udi wenza bua tudiumvue mu dikubibua munkatshi mua aba bimbila Nzambi misambu ya dimusamuna nayi tshiendelele. (Musambu wa 104:33) Tutungunukayi ne kuupuila Yehowa kanyinganyinga ketu kuonso.
Mmunyi muudi mua kuandamuna?
◻ Mmunyi mudi kanyinganyinga mua kumvuijibua?
◻ Ng’imue mishindu kayi idi mua kutuambuluisha bua kumona mua kupita ne kanyinganyinga?
◻ Mmunyi mudi budipuekeshi ne lutulu mua kutuambuluisha bua kumona mua kupita ne kanyinganyinga?
◻ Mu dipita ne kanyinganyinga, bua tshinyi bidi bia mushinga bua kueyemena Nzambi muetu muonso?
◻ Bua tshinyi tudi ne bua kutungunuka ne kuupuila Yehowa kanyinganyinga ketu kuonso?
[Tshimfuanyi mu dibeji 24]
Udi mumanye bua tshinyi Yezu wakamba ne: “Lekelayi kunyingalala”?