Tusekelelayi muan’a bute wa Yehowa!

¹ Dia lumingu dia 9 Nisan tshidimu tshia 33 B.B., musumba munene wa bantu ne malala mu bianza, wakelela Muan’a bute wa Yehowa lukashi, Mfumu Yezu Kristo, bu “Eu udi ulua, Mukalenge, mu dîna dia Yehowa! ” (Luka 19:38; Eb. 1:6) Mu matuku a ndekelu akapitshisha Yezu pa buloba, dimue dia 10 ne dibidi dia 11 Nizan ke matuku avua ne mudimu wa bungi, matuku avua yeye eu mukuate mudimu menemene mu buambi buende bua patoke.

² Mu matuku etu aa, musumba wa bantu mupite kabidi bunene udi ne malala mu bianza, mu ngumvuilu wa tshimfuanyi, wela mbila ne dîyi dikole ne: “Lupandu ndua kudi Nzambi wetu udi musombe mu nkuasa wa bumfumu, ne kudi Muan’a Mukoko.” (Buak. 7:9, 10) Dia 14 Tshisanga dilualua, netusangile bua kuenza difesto dia Tshivulukilu tshia lufu lua Kristo. Bu mutudi tuenda tusemena ku dituku edi, tudiku mua kuvudija madikolela etu mu mudimu, ne nanku, kukoleshisha lubila elu lua ditumbisha nalu ludi luedibua pa buloba bujima anyi?

³ Tuvudijayi mudimu wetu mu buambi: Bamanyishi bavule bakadi bapangadije bua kuikala bampanda-njila bambuluishi mu Luabanya anyi Tshisanga. Udiku pebe mua kuenza nanku anyi? Pikalabi nanku, uuja dibeji diebe dia dilomba kakuyi dijingakana. Mukulu umue neikale ne disanka dia kuandamuna ku nkonko mishilangane iwudi udiela pa tshitupa etshi tshia mudimu.

⁴ Nansha bituikale anyi katuyi bampanda-njila bambuluishi, netuenze madikolela bua kutumika bikole mu mudimu wetu mu Luabanya anyi Tshisanga. Tshisumbu netshikale pamu’apa mua kulongolola bisangilu bia buambi dituku dionso munkatshi mua ngondo. Bua bualu ebu, bungi bukumbanyine bua teritware nebuikale mua kutekibua ku luseke.

⁵ Bisumbu bionso nebikale ne bua kulongolola tshisangilu tshia mudimu wa buambi tshia pa buatshi mu ditanu dia 14 Tshisanga. Nansha mudi kulongolola Tshivulukilu kulomba mudimu wa bungi, tudi bakankamijibue muntu ne muntu bua kupatuka mu buambi mu ditanu mu dinda, bituikala ne mushindu. Pa kusakidila ku mudimu wa ku nzubu ne ku nzubu, tushindike bua se: batudi babikile bua Tshivulukilu badi ne mushindu wa kukufika, kabidi né mbajadike bimpe dîba ne muaba wa tshisangilu.

⁶ Tubikile ne tukankamije bakuabo: Yezu wakatumina balongi bende dîyi edi: “Tungunukayi ne kuenza nunku bua kummvuluka.” (1 Kol. 11:24) Balongi ba Yezu bela manyi, bavua balonda makasa ende, bakatumikila dîyi-dituma edi. Bia muomumue, musadidi yonso wa Yehowa mmulombibue bua kuikalaku bua difesto dia Tshivulukilu. Nebikale kabidi bilenga bua kubikila bantu bu mudi bena dîku dietu, aba batudi tulonga nabu Bible ne batuvua bayukile nabo pa Bible, bamanyangana nabo badi kabayi Bantemu, ne bena mudimu netu. Tudi mua kufunda pa dibeji bua katupu muntu nansha umue muoyo.

⁷ Mikuabo mishindu neipetshibue bua kukankamija bantu badiakaje bua kuteleja dilolo adi dia Tshivulukilu. Tutabalele bua kufika dîba dimpe bua kuakidila benyi bikala mua kufika bua musangu wa kumpala. Pikala bavule ba ku balongi betu ne bua kulua, nebikale bimpe bua mumanyishi kampanda adilongolole bua kusomba pabuipi ne bamue ba kudibo mu kupita kua tshisangilu. Tudi mua kulomba aba badi balue bua musangu wa kumpala bua kulua mu tshisangilu tshia patoke tshia tshisumbu. Mukulu wikala musungula bua kuenza diyuki dia patoke neikale ne bua kudilongolola biakane bua diyuki diende kusaka ku dienza.

⁸ Mu kujikija kua difesto dia Tshivulukilu, pa kusanga etu mêyi bua kuimba musambu wa 105, “Saluons le Premier-né de Dieu! ,” suayi tuikale bamue ba ku aba bikala ne disankishibua dia muvuabo benze bia bungi ne tshisumi mu mudimu munkatshi mua ngondo, bua butumbi bua Yehowa!