Tudimayi dijinga dia kumanya bia bungi mu makumbula mapiamapia
1 Mudimu wetu mmufuanyikija bushuwa ne didima budimi, kadi makumbula mapiamapia ne dimiamina dia mâyi. (Mat. 13:23; Luka 10:2; 2 Kol. 9:10) Tuetu badi “benzejanganyi ba mudimu ne Nzambi,” tudi ne bujitu bua kuambuluisha mamiinu wonso adibo bafuma ku dimiamina bua kukolawo ne kukuama mamuma. (1 Kol. 3:6, 9) Mmunyi mutudi mua kuenza mudimu eu bipite buimpe?
2 Tuikale bazanzuke bua kukumbula tshiakabidi buonso bavua baleja dijinga dia kumanya bia bungi. Tutangilayi tshiakabidi note ya ku nzubu ne ku nzubu, ne tupangadike batuikala mua kumonangana nabo tshiakabidi ne tshiena-bualu tshituikale mua kuyukila. Tshiena-bualu tshia diyukidilangana netshikale mu diumvuangana pa tshibidilu ne bituvua bayukila musangu wa kumpala. Tuikalayi bajoboke, ne ngenyi mikuabo ya mu Bible ku muoyo ituikala mua kubueja. Bitu bimpe misangu yonso bua kukuata mudimu ne Bible, bualu udi ne bukokeshi bua kulenga mutshima.—Eb. 4:12.
3 Biwikala mushiye broshire wa “Dieu se soucie-t-il vraiment de nous? ,” udi mua kuamba ne:
◼ “Bantu ba bungi badi bitaba ne muoyo umue ne: Nzambi nealue kubutula buloba, eku bakuabo batshina ne: bantu kabalu kudibutuilabu nkayabo. Udi wela meji kayi? [Lekela muntu andamune.] Bible udi utuambila ne: pamutu pa kubutula buloba, Nzambi neumushepu dipanga buakane ne kubukudimuna muaba wa ditalala kawuyi ne njiwu.” Koka ntema pa dibeji dia 22 ne bala Nsumuinu 2:21, 22 udibo batele. Pikala muntu uleja dijinga dia kumanya bia bungi, umumvuije mushindu udi dilonga dia Bible dienzeka, anyi umuleje bibejibeji bipiabipia ne nupunge bua dikumbula dipiadipia dinuakula pa bulongolodi bupiabupia bulaya kudi Nzambi.
4 Biwikala mushiye broshire wa “Monayi,” udi mua kuamba ne:
◼ “Mu dikumbula dianyi musangu mushale, tuvua babala mu Bible dilaya dia Nzambi dia kukudimuna buloba mparadizu mufuanangane ne eu udi muleja mu tshimfuanyi pa tshizubu tshia broshire umvua mukushila. Tudi mua kulabula masanka pa kulonga tshidi disua dia Nzambi ne kumanya buenzeji budi nabu disua edi pa nsombelu wetu.” Bala Yone 17:3, pashishe ubulule broshire mu bikoso 52 ne 53, dibeji dia 27. Umvuija mu miaku mikese bua tshinyi bidi bikengela kuikala ne dimanya dijalame dia Dîyi dia Nzambi.
5 Mumana kushiya broshire wa “But de la vie” kudi muntu udi munange malu a Nzambi, pamu’apa neumone bimpe bua kuamba ne:
◼ “Kabiyi mpata, ukadi mutele misangu mivule disambila dia Tatu Wetu. Utu wela meji ku tshinyi paudi ulomba Nzambi bua Bukalenge buende kuluabo? ” Kunyima kua diandamuna dia mukuyukidishi, utangile bikoso 8 ne 9 mu dibeji dia 26, pashishe ubale Danyele 2:44. Pamu’apa udi mua kutungunuka ne diyukidilangana pa kumvuija ne: dilua dia Bukalenge bua Nzambi nediumvuije ndekelu wa bubi ne wa makenga. Ushindike bualu ebu se: bituikala bakane ku mêsu kua Nzambi, netuikale mua kusanka ne muoyo wa tshiendelele mu Mparadizu pa buloba.
6 Tuvulukayi ne: tudi mua kukumbula tshiakabidi muntu yonso uvua mututeleja, nansha bituikala bamushile mukanda anyi katuyi bamushile. Tudibambe bua kulongolola ku lumingu luonso dîba dia kuenza makumbula mapiamapia. Yehowa neabeneshe madikolela etu bua kudima dijinga dia kumanya bia bungi dituvua bamone. Akuame mamuma bua butumbi buende!—Yone 15:8.