Broshire: Biamu bia mushinga bia mudimu wa buambi

¹ Nsenda mupiluke utu pa tshibidilu wangata biamu bia mudimu kabukabu, tshiamu tshionso tshifundila mudimu musunguluke. Tuetu badi bamanyishi ba Bukalenge, tudi ne bungi buvule bua broshire idi ituambuluisha bua kukumbaja ne meji majinga a mu nyuma a bantu batudi tulongesha Dîyi dia Nzambi. (Nsum. 22:29) Pamu’apa tudi mua kupeta muntu udi mubungame. Anyi kabidi, muntu udi ukeba bukalenge buakane, anyi udi udikonka bikala muoyo eu ne tshipatshila. Mmunyi mua kukuata mudimu ne broshire yetu bua kubambuluisha?

² Pa kuleja broshire wa “Dieu se soucie-t-il vraiment de nous?,” udi mua kuamba ne:

◼ “Bamue bantu badi bamona makenga ne dipanga buakane bidi pa buloba badi basua kuangata Nzambi bu muena tshilumbu. Badi bamba ne: bu mudi Nzambi wa-bukole-buonso, bu yeye bulelela uditatshisha buetu, uvua kujikija makenga etu wonso. Udi wela meji bishi? [Lekela muntu andamune.] Musambu wa 72:12-14 udi uleja mudi Nzambi uditatshisha buetu bulelela. Ki nyeye udi mfuki wa makenga ne dipanga buakane. Udi ulaya ne: benji ba malu mabi mu katupa kîpi nebabutudibue. Broshire eu wa Dieu se soucie-t-il vraiment de nous?, udi umvuija tshialuaye kuenza ne mushindu utudi mua kupetelaku masanka.” Pamu’apa udi mua kutungunuka ne diyukidilangana pa kumvuija tshikoso 22, mu dibeji dia 27.

³ Biwakuata mudimu ne broshire wa “But de la vie,” udi mua kutuadija diyukidilangana nunku:

◼ “Nansha ku shòò, bantu buonso anyi pamue ne buonso badi badiela nkonko pa tshipatshila tshia muoyo. Bidi amu bua kulala panu bidimu 70 anyi 80 pashishe kufua anyi? Peshi muoyo udi ne tshipatshila anyi? Udi wela meji bishi? [Lekela muntu andamune.] Mu Musambu wa 37:29, tudi tumona dilongolola dia dikema dia Nzambi bua muntu ne bua buloba.” Mumana kubala mvese, leja tshimfuanyi tshia mu dibeji dia 31, ne umvuija nsombelu utuikala nende mu Mparadizu.

⁴ Udi mua kutuadija diyukila ne broshire wa “Monayi” pa kuleja tshimfuanyi tshijima tshia pa tshizubu ne kuebeja ne:

◼ “Buebe wewe, bidi bikengela tshinyi bua kukudimuna buloba nunku? [Lekela muntu umvuije.] Pa tshimfuanyi etshi, muntu yonso udi ne nzubu ne mudimu mulengele. Ditalala didiku, biakudia mbivule ne buloba ki mbunyanga. Nansha mudi mbulamatadi ya bantu idibamba ne tshisumi, idi ifika ku dijingulula se: kayena mua kuasa bulongolodi bua nunku. Kadi, Bible udi utupesha dishindika dia se: Nzambi ‘neavuije bintu bionso bipiabipia.’ [Bulula broshire mu dibeji dia 30, ne bala Buakabuluibua 21:3, 4.] Broshire eu neakuleje tshiudi ne bua kuenza bua kuikala ne muoyo mu bulongolodi ebu bupiabupia.” Pikala muntu uleja bulelela dijinga dia kumanya bia bungi, bulula broshire mu dibeji 3, ne umuleje mushindu utudi tulombola dilonga dia Bible.

⁵ Ne broshire wa “Ikalayi ne muoyo wa kashidi ne disanka pa buloba! ,” udi mua kutumika ne mushindu eu:

◼ “Bantu ba bungi badi bela meji ne: nebikale ne bua kuya mu diulu bua kupetabo muoyo wa kashidi, kadi udi mumone munyi bua kuikala ne muoyo wa kashidi pa buloba? [Lekela muntu andamune.] Bible udi utushindikila ne: muoyo wa tshiendelele udi mua kupetshibua, ne udi utuambila mushindu wa kufika ku tshipatshila etshi.” Bala Yone 17:3. Pashishe leja mukuyukidishi tshimfuanyi No. 49, ne umuebeje ne: “Udi musue kuikala ne muoyo mu bulongolodi bu ebu anyi? ” Leja broshire ne numvuangane bua dikumbula dipiadipia.

⁶ Broshire idi ne biena-bualu pa mapiamapia, yandamuna ku nkonko idi bantu badiela ne ikolesha ku muoyo. Pa kutumika ne dizanzamuka ne biamu bia mudimu ebi, netuambuluishe bantu ba mmuenenu muakane bua ‘kufikabo ku dimanya dijalame dia bulelela.’—1 Tim. 2:4.