Mankenda adi atumbisha Nzambi

¹ Mu Mikenji ya Mose muvua mêyi avua muntu yonso ne bua kutumikila, avua ambuluisha bua kuikale mankenda. Mêyi aa avua atapulula tshisamba tshia Isalele ne bikuabu, enza bua tshikale tshisamba katshiyi katoba ku mubidi ne mu nyuma. (Lew. 11:35, 36; 15:1-11; Yesh. 52:11) Mankenda avua atumbisha Nzambi ne ambuluisha bua bantu bikale ne makanda a mubidi mimpe.

² Lelu’eu kabidi, mankenda nngikadilu wa basadidi ba Yehowa. Bikalabi nanku bua tuetu bonso mu tshibungi, kadi bidi mua kuikala bishi patudi tuya kudi muntu ne muntu? Patudi tuenza bukole bua kuikala ne bulongame ne mankenda, bidi bileja ne: dijinga dietu dinene ndia kutumikila malu adi Yehowa utulomba.

³ Tudi mua kuamba tshinyi bua nzubu wetu? Udi ubipisha mukenji wa Bukalenge utudi tumanyisha anyi? Bamue badi mua kubenga kuitaba paudi ubambila bualu bua ne: dimue dituku buloba ebu nebukudimuke mparadizu. Kabiena mua kuikala pamu’apa anu bualu badi bamona ne: nzubu webe kêna ne mankenda, kutu ukosa mashinde ne bilongo bia ku nzubu, ne lubanza nduwule ne bisosa anyi? Bikala nzubu wetu umueneka ne bukoya peshi muikale mupatuka mipuya mibi bualu katuena tumulongolola, tudiku mua kuamba ne: tudi tufila ‘tshilejilu tshimpe tshia mankenda tshidi tshileja muikala bantu babuela mu bulongolodi bupiabupia buikala mu bianza bia Bukalenge bua Nzambi’ anyi?​—om-F 130-131.

⁴ Kadi bidi bishi bua mashinyi autu uya nawu mu buambi (bua badi nawu)? Mmasukula bimpe munda ne pambelu bua kubenga kupendeshisha mudimu wa buambi utudi tuenza anyi? Tudi mua kuamba tshinyi bua bilamba biudi uvuala, tshibuta tshiebe tshia buambi ne nsuki yebe? Bidiku ne mankenda ne bia kupita nabi ku mêsu kua bantu kabiyi bibatonda anyi? Bua kuamba bimpe, padi muntu musue kuikala ne mankenda, udi ne bua kuowa mâyi misangu yonso ne kusukula bilamba biende bimpe.​—w89-F 1/6 16-19, Mfual.

⁵ Tudi mua kuenza tshinyi padi muanetu kampanda kayi udilama ne mankenda peshi nzubu wende muikale ne bukoya bifika too ne ku dipendeshisha tshisumbu? Mbimpe kumuambuluisha mu dinanga, nuangata ne mushinga bungi bua bidimu bikadiye nabi peshi tshintu tshidi mua kumupangisha bua kuikala ne mankenda. Kuenza nunku nkuleja bulenga. Muntu udi mua kuikala nanku kadi kayi mumanye to; mibelu mimupesha mu buimpe neyimusake pamu’apa bua kuakaja malu. Bantu badi kabayi bafila tshilejilu tshimpe pa bualu ebu ki mbakumbaje malu malomba bua kuambula majitu manene mu tshisumbu nansha. Bakulu pabu badi ne bua kuepuka dielela bantu mikenji anyi dibenzeja malu adi abasankisha buobu.

⁶ Tudi tubikila bantu badi banyisha bulelela bua kulua kudia biakudia bia mu nyuma ku Nzubu wa Bukalenge. Pa tshibidilu, tutu tubabikila ne disanka bualu tudi bamanye ne: nzubu eu udi ne mankenda ne kabidi mmulongolola bimpe. Kadi, tudi ne bua kuenza muetu muonso bua ikale anu ne mankenda. Tuanji tukenzakanayi. Bibasa, panshi ne ku bimanu kudi mankenda anyi? Tutu tukomba anyi tusukula nkumba yetu pa tshibidilu anyi? Tuetu bibidile kumona tapi wa panshi muikale ne makeji makeji a manyanu ne mukubu wa ku bimanu bilamulamu, ndekelu wa bionso mêsu etu kaakuikala abimona kabidi bu bualu to. Kadi bantu badi balua bua musangu wa kumpala ku Nzubu wa Bukalenge badi mua kubimona bibi. Tudi ne bua kuenza muetu muonso bua Nzubu wetu wa Bukalenge ikale anu ne mankenda pa kuikala ne tshibidilu tshia kumukomba ta kumusukula, tumulongolola dîba dionso padibu batulomba bua kuenza mudimu eu.

⁷ Tudi mua kutumbisha Nzambi katuyi tuamba muaku, ku mmuenekelu wetu, mankenda a nzubu wetu, a mashinyi ta a dikalu dietu ne ku mushindu udi Nzubu wetu wa Bukalenge. Tshilejilu tshietu tshimpe katshiakutonda muntu nansha, kadi netshimanyishe buakane ne bulelela bua ntendelelu wetu.​—1 Kol. 10:31, 32; Yak. 1:27.