‘Udifile ne muebe muonso’ mu mudimu wa buambi

¹ Tudi mua kuamba ne: mudimu wa dienza ntenta uvua mupostolo Paulo wenza pavuaye ku Kolinto, mushindu utudi tubala mu Bible, uvua umuangata dîba dia bungi divuaye nansha mua kuyisha. Kadi, mu Bienzedi 18:5 (Mukanda wa Mvidi Mukulu) badi bamba ne: ‘Paulo kudifila ne muende muonso bua kulongesha dîyi, ujadikila bena Yuda ne: Yezu udi Kristo.’ (Tuetu mbadi baladike maleta.) Paulo uvua udifila mu mudimu wa diyisha bua tshinyi? Nansha mukavua bantu ba bungi balue bena Kristo ku Kolinto, Mukalenge wakajadika ne: mudimu wa kuenza bantu bayidi mu musoko au utshivua wa bungi. (Bien. 18:8-11) Tudiku petu ne bua kudifila muetu muonso mu mudimu wa buambi anyi? Eyowa. Bualu kutshidi bantu ba bungi menemene batudi mua kupeta ne kubayisha bulelela.

² Yisha bikole mu Tshisanga: Pamu’apa udi mupangadije bua kuikala udifila bikole mu mudimu wa diyisha lumu luimpe ngondo yonso. Kadi kudi ngondo mikuabu idi itupesha mushindu wa ‘kudifila muetu muonso’ mu buambi. Munkatshi muayi tudi mua kutela ngondo muinayi, ngondo wenzeka Tshivulukilu. Nsombelu webe udiku ukupesha mushindu wa kulua mpanda-njila muambuluishi tshikondo etshi peshi kuvudija dienza diebe dia mudimu mu buambi anyi? Bamanyishi ba bungi batu benza nunku batu bapeta mabenesha a bungi. (2 Kol. 9:6) Wewe wenza muebe muonso, uvuluke ne: Yehowa udi ne disanka bua mudimu webe uudi wenza ne muoyo mujima. (Luka 21:2-4) Nansha wewe muikale mu nsombelu kayi, angata dipangadika dia ‘kudifila ne muebe muonso’ mu mudimu wa buambi mu Tshisanga emu. Kupu muoyo bua kufila luapolo luebe lua mudimu ku ndekelu kua ngondo bua mudimu uudi muenze ne bukole buebe buonso baubale pawu pamue ne wa basadidi bakuabu ba Yehowa.

³ Uye kutangila bapiabapia bavua babuele mu Tshivulukilu: Mu Congo yonso ibidi idi filiale wetu utangila, bantu bavua babuele mu Tshivulukilu mu 2000 bavua 604 160, nansha mutuvua katuyi bapete luapolo yonso. Kadi, luapolo idi ileja ne: kumpala eku ‘dinowa’ dinene menemene nedienzeke. (Mat. 9:37, 38) Bua nanku, dilongolola bua kuya kutangila pa lukasa bantu bavua banyishe bulelela, bavua balue mu Tshivulukilu bua ubaleje makuabu malu a mu nyuma. Wewe muikale uladikija bua kuya kubatangila, ‘mubi udi mua kulua kunyenga bualu buakamiaminabu mu mitshima yabu.’ (Mat. 13:19) Wewe mubapinganyine pa lukasa nebileje ne: udi bushuwa ‘mudifile ne muebe muonso’ mu mudimu wa buambi.

⁴ Tungunuka ne kuambuluisha bana betu badi kabatshiyi bayisha: Mu Luishi tuakatuadija mu mushindu wa pa buawu bua kuambuluisha bana betu badi kabatshiyi bayisha. Bikalaku bantu badibu kabayi banji kutangila mu makumbula a bulami, bakulu badi ne bua kudilongolola bua kubakumbula kumpala kua ngondo muinayi eu kujikaye. Bakulu nebenze muabu muonso bua kumanya bualu bunene budi bupangishe muntu eu bua kuikala uyisha ne kukeba tshia kuenza bua kumuleja tshidiye mua kuenza bua kutuadijaye kabidi kukuatshila Yehowa mudimu ne disanka. Diambuluisha dia mushindu eu didi dileja ne: bakulu badi ne dinanga ne kabidi badi bakumbaja bimpe mudimu wabu wa balami ba “mikoko ya Nzambi.” (1 Pet. 5:2; Bien. 20:28) Tshibumba tshia Nsentedi tshia dia 15 Kabitende 1993, dibeji dia 22-23, tshidi ne ngenyi mimpe idi bakulu mua kulonda padibu bakonkonona bualu nansha bumue bua ku atanu adi mua kuikala makuate bana betu badi kabatshiyi bayisha. Bilondeshile lungenyi elu, bamue badi mua kupetulula luya ne kuenza mudimu wa buambi mu ngondo muinayi.

⁵ Ambuluisha bantu ba bungi bua balue pabu bamanyishi: Bana bebe bakadiku bakumbaje malu malomba bua kulua bamanyishi ba lumu luimpe anyi? Kadi bakuabu bantu baudi ulonga nabu Bible? Bikala bakulu babanyishile, ngondo muinayi kênaku mua kuikala muakanyine bua kutuadijabu kupatuka mu buambi anyi? Bikala muntu wenda uya kumpala mu nyuma ne muikale mumane kulonga broshire wa Utulomba ne mukanda wa Dimanya, nudi mua kutungunuka dilonga dia Bible mu mukanda mukuabu bu mudi: wa Parole de Dieu, Paix véritable, anyi wa Tshitendelelu. Tshipatshila tshiebe ntshia bua mulongi webe amanye mua kujingulula bulelela, akumbaje malu adi akengela bua kuikala mumanyishi wa lumu luimpe, pashishe alue Ntemu wa Yehowa muditshipe ne mutambule.​—Ef. 3:17-19; 1 Tim. 1:12; 1 Pet. 3:21.

⁶ Paudi usuminyina ne muoyo mujima bua kuambuluisha bantu baudi ulonga nabu Bible, badi mua kufika ku ditumikila bulelela. Ntemu umue wakapetangana ne muntu mukuabu ne mukajende bakavua bantu bakulumpe ne kuanyishabu bikole bua kulonga Bible. Kadi bantu aba bakalomba bua kutuadija dilonga anu kunyima kua mbingu isatu. Bakatuadija kulonga kunyima kua mbingu isatu ayi. Pashishe bikavua anu elu lumingu balonga elu kabayi balonga. Kadi ndekelu wa bionso, mukaji wakaya kumpala ne dilonga, kutambulaye. Muanetu uvua ulonga nende au udi wamba ne: “Pakatambulaye, binsonji biakamutengabala muîsu bua disanka, disanka edi diakatupuekeshisha petu binsonji, meme ne muena kuanyi.” Bushuwa, ‘kudifila muetu muonso’ mu dimanyisha lumu luimpe kudi kuenza disanka dia bungi!

⁷ Milayi ya mu Bible ne malu adi enzeka lelu’eu bidi bileja ne: tshikondo tshia ku nshikidilu tshikadi pa kutua ku tshibungubungu. Mpindieu ke tshikondo tshidi bantu ba Nzambi bonso ne bua ‘kudifila muabu muonso’ bua kumanyisha bakuabu lumu luimpe. Mupostolo Paulo udi utujadikila ne: kakuyi mpata, mudimu eu utudi tuenza ‘mu Mukalenge kawena wa patupu.’​—1 Kol. 15:58.